Diosan Reinopat yatiyirinakaruw wakichtʼasi

1-3. ¿Kunsa Jesusajj yaqha markanakan yatiyasiñapatak luräna, ukat kunsa uka toqet jisktʼassna?

PÄ MARAW Jesusajj Galilea markan Diosan arunakap yatiyäna (Mateo 9:35-38 liytʼañataki). Uka tiemponjja, sinagoganakan yatichañataki ukat Jehová Diosan Reinopat suma yatiyäwinak yatiyañatakiw Jesusajj jiskʼa markanakaru ukat jachʼa markanakar saräna. Ukat walja jaqenakaw jupar istʼapjjarakïna. Ukatwa akham säna: “Cosecha apthapiñajj waljawa, ukampis irnaqerinakajj jukʼanikirakiwa” sasa.

² ‘Diosan Reinopat yaqha markanakan parlapjjañapatakiw’ Jesusajj 12 apostolonakapar khitäna (Luc. 9:1, 2). Ukampis ‘¿kunjamsa uk phoqañäni?’ sasaw apostolonakapajj jisktʼasipjjpachäna. Ukatwa Jesusajj jupanakar janïr khitkasajj sum wakichtʼäna, kunjamtï Awkipajj jupamp lurkäna ukhama.

³ ¿Kunjamsa Awkipajj Jesusar wakichtʼpachäna? Ukat ¿kunjamsa Jesusajj apostolonakapar wakichtʼarakpachäna? Jichhürunakanjja, ¿Jehová Diosan arunakap yatiyapjjañapatak Reyejj servirinakapar wakichtʼarakpachati? Ukhamächi ukhajja, ¿kunjamsa uk lurpacha?

“Nayajj arstwa kuntejj Awkejj yatichkitu uka”

4. ¿Kunapachasa ukat kawkinsa Awkipajj Jesusar yatichäna?

⁴ Awkijaw yatichawayitu sasaw Jesusajj qhan säna. Ukatwa aka Oraqenkkasajj aka arunak arsüna: “Nayajj arstwa kuntejj Awkejj yatichkitu uka” sasa (Juan 8:28). ¿Kunapachasa ukat kawkinsa Awkipajj Jesusar yatichpachäna? Kunapachatï nayrïr wawapjam Jesusar lurkäna uka qhepatwa Diosajj jupar wakichañ qalltäna (Col. 1:15). Waranq waranqa maranak Awkipamp chika alajjpachan jakasajja, kuntï ‘Suma Yatichirejj’ siskäna uk sumwa Jesusajj istʼpachäna ukat kuntï lurkäna uksa uñjarakpachänwa (Isa. 30:20). Ukhamajj alajjpachankir Awkipajj kunjam chuymanisa, kunanaksa luri ukat jutïritak kuna amtanakanisa uk sumwa Jesusajj yateqäna.

5. ¿Kunjamsa Jehová Diosajj aka Oraqen yatiyañapatak Jesusar wakichtʼäna?

⁵ Aka Oraqen yatiyañapatakiw Jehová Diosajj horasaparu Jesusar wakichtʼäna. Suma Yatichir Jehová Diosajj kunjamsa jilïr Yoqapamp apasïna uka toqet parlir mä profecía uñjañäni (Isaías 50:4, 5 liytʼañataki). Jehová Diosajj “sapa qhantatiw” Yoqapar sartayäna sasaw uka profeciajj qhanañchi. ¿Kunsa uka arunakajj amuytʼayistu? Kunjamtï mä yatichirejj yateqeripar yatichañataki sapa alwajj sartayki, ukhamwa Jehová Diosajj Jesusar yaticharakïna. Uka toqet parlkasajj akham sasaw mä qellqatajj qhanañchi: “Jesusajj mä yateqerïkaspas ukhamwa Jehová Diosajj escuelar apäna ukat kunjamsa, kuna toqetsa yatiyañapäna ukwa ukan yaticharakïna” sasa. Cheqansa, alajjpachanwa Jehová Diosajj ‘kuntï arsuñapäkäna’ uk Yoqapar sum yatichäna (Juan 12:49). Ukatjja, kunjamsa yatichañapäna uksa yaticharakïnwa.a Aka Oraqenkkäna ukhajja, kuntï Awkipat yateqkäna ukarjamaw Jesusajj Jehová Diosan arunakap yatiyäna ukat ukham yatiyapjjañapatakiw arkirinakapar yaticharakïna.

6, 7. 1) ¿Kunjamsa Jesusajj apostolonakapar wakichtʼäna, ukat ukajj kun lurapjjañapatakis yanaptʼäna? 2) Jichhürunakanjja, ¿Jesusajj arkirinakapar wakichtʼarakiti?

⁶ Jehová Diosan arunakap yatiyapjjañapatakiw Jesusajj apostolonakapar wakichtʼäna sasaw aka yatichäwi qalltan yatjjataniwaytanjja, ¿kunjamsa uk lurpachäna? Mateo 10 qellqatarjamajja, kawkinsa (5, 6 tʼaqanaka) ukat kunsa yatiyapjjañapäna (7 tʼaqa), kunatsa Jehová Diosar confiyasipjjañapäna (9, 10 tʼaqanaka), kunjamsa jaqenakamp parlapjjañapäna (11-13 tʼaqanaka), jaqenakajj jan istʼañ munapkani (14, 15 tʼaqanaka) ukat arknaqat uñjasipkani ukhajj kunsa lurapjjañapäna (16-23 tʼaqanaka), taqe ukanakwa Jesusajj apostolonakapar sum yatichäna.b Uka wakichtʼäwi katoqasaw apostolonakajj suma yatiyäwinak yatiyasiñapatakejj nayrïr patak maranakan sum pʼeqtʼapjjäna.

⁷ ¿Jichhürunakat kamsasirakispasa? ‘Jehová Diosan Reinopat aka suma yatiyäwinakjja aka Oraqpachanwa yatiyapjjäta’ sasaw Diosan Reinopan apnaqer Jesusajj arkirinakapar säna (Mat. 24:14). Ukampis uk phoqañatakejja, ¿arkirinakapar wakichtʼpachänti? ¡Jïsa, wakichtʼänwa! Yatiyapjjañapataki ukat taman utjki uka luräwinakamp phoqapjjañapatakiw Jesusajj arkirinakapar sum wakichtʼawayi.

Suma yatiyirinakäpjjañapatakiw jilat kullakanakar wakichtʼasi

8, 9. 1) Diosan Arunakap Yatiyañatak Escuelajja, ¿kuna amtampis apasiñ qalltäna? 2) Semanan apaski uka tantachäwejja, ¿kunjamsa Diosan arunakap sum yatiyañatak yanaptʼawaytam?

⁸ Jehová Diosajj nayratpachaw semanan apaski uka tantachäwinak toqe ukat jachʼa tantachäwinak toqejj yatiyapjjañapatak servirinakapar wakichtʼawayi. Sañäni, Yatiyañataki Tantachäwi toqew wakichtʼawayistu. Ukampis 1940 maratjja, Oraqpachan yatiyasiñapatak uñjapki uka jilatanakajj escuelanak toqew jilat kullakanakar wakichtʼañ amtawayapjje.

⁹ Diosan Arunakap Yatiyañatak Escuela. Kunjamtï pasïr yatichäwin uñjaniwayktanjja, uka escuelajj 1943 maratwa taqpach tamanakan apasiñ qalltäna. Kunjamsa taman sum arstʼapjjaspa ukat Diosan arunakap yatiyasajj kunjamsa Jehová Diosar jachʼañchapjjaspa ukwa jilat kullakanakajj uka tantachäwin yateqawayapjje. Cheqansa, uka amtampiw uka escuelajj nayratpach apasiwayi (Sal. 150:6). Jehová Diosan Reinopat suma yatiyirinakäpjjañapatakiw Diosan Arunakap Yatiyañatak Escuelajj ukan qellqtʼatäpkäna uka jilat kullakanakarojj wal yanaptʼawayi. Jichhajj semanan apaski uka tantachäwi toqew Diosajj servirinakapar wakichtʼaskaraki.

10, 11. Bibliat Yatjjatapjjañapatak Galaad Escuelarojja, ¿khitinakas sarapjjaspa, ukat kunsa ukan yateqapjje?

¹⁰ Bibliat Yatjjatapjjañapatak Galaad Escuela. Amtañäni, kunjamtï pasïr yatichäwin yatjjataniwayktanjja, uka escuelajj 1943 marana febrero phajjsit 1 uru saraqkäna uka lunesaw apasiñ qalltäna. Nayrajja, yaqha markanakan misioneronakjam irnaqtʼapjjañapatakiw precursoranakaru ukat Diosatak sapüru irnaqtʼapkäna uka jilat kullakanakar uka escuelan wakichtʼasïna. Ukampis 2011 marata octubre phajjsitjja, uka escuelar janïr sarapki uka misioneronakaru, precursor especialjam irnaqtʼapki ukanakaru, tamanak tumptʼirinakaru ukat Betel utan irnaqtʼirinakarukiw Galaad escuelar invittʼasjje.

¹¹ ¿Kuna amtampis uka escuelajj wakichasiwayi? Uka escuelan walja maranak yatichiri mä jilatajj akham siwa: “Bibliat sum yatjjatasa Diosar jukʼamp confiyapjjañapatakiw yateqerinakar yanaptʼasi. Ukat jan waltʼäwinakar saykatapjjañapatakejja, kunjam chuymanïpjjañapas wakisi ukaw ukan yatichasiraki. Janiw ukakïkiti, Jehová Diosan arunakap jukʼamp parlañ munapjjañapatakiw uka escuelar saririnakarojj yanaptʼasiraki” sasa (Efe. 4:11).

12, 13. ¿Kunjamsa Galaad Escuelajj aka Oraqpachan yatiyasiñapatak yanaptʼawayi? Uk mä uñachtʼäwimp qhanañchtʼam.

¹² ¿Kunjamsa Galaad Escuelajj aka Oraqpachan yatiyasiñapatak yanaptʼawayi? 1943 maratjja, 8.500 jilat kullakanakaruw ukan wakichtʼasiwayic ukat 170 jila markanakaruw khitasiwayaraki. Jupanakajja, kuntï yateqawayapki ukarjamaw Diosan arunakap wal yatiyasipki ukat ukham lurapjjañapatakiw yaqha jilat kullakanakarus yanaptʼasipkaraki. Kawkhantï yatiyirinakajj jukʼak utjki uka cheqanakansa jupanakaw yatiyasiñapatak pʼeqtʼawayapjje.

¹³ Kunas Japón markan pasäna uk amuytʼañäni. Payïr Jachʼa Chʼajjwäwi tiemponjja, janiw tamjam yatiyañajj añch utj-jjänti. 1949 maran agosto phajjsinjja, jilat kullakanakajj janiw ni tunkarus uka markan puripkänti. Ukampis uka mara tukuyarojja, 13 misioneronakaw Jehová Diosan arunakap sapür yatiyasipkäna. Tiempompejja, jukʼamp misioneronakaw uka markar puripjjäna. Jupanakajj jachʼa markanakanwa nayraqat yatiyapjjäna, ukatjja yaqha cheqanakaruw Diosan arunakap yatiyir sarapjjarakïna. Misioneronakajj precursorjam irnaqtʼapjjañapatakiw Bibliat yateqerinakaparu ukat mayni jilat kullakanakar chʼamañchtʼapjjäna. Ukham irnaqtʼapjjatapajj janiw inamayäkänti. Jichhajj 216.000 jila yatiyirinakaw Japón markan utj-jje, ukat sapa patakatjja, niya pusi tunkaniw precursorjam irnaqtʼasipki.d

14. Diosan markapan utjki uka escuelanakajja, ¿kunsa uñachtʼayistu? (“Yatiyirinakar wakichtʼañatak escuelanaka” siski uka recuadro uñjjattʼäta.)

¹⁴ Yaqha escuelanaka. Aka escuelanakaw utjaraki: Precursoranakatak Escuela, Cristiano Matrimonionakan Bibliat Yatjjatapjjañapatak Escuela ukat Soltero Jilatanakan Bibliat Yatjjatapjjañapatak Escuela. Taqe uka wakichäwinakajja, Diosar yupaychäwipan nayrar sartapjjañapataki ukat Diosan arunakap sum yatiyapjjañapatakiw jilat kullakanakar yanaptʼawayi.e ¿Kunsa taqe ukanakajj uñachtʼayistu? Kunjamsa Reyejj Diosan arunakap yatiyapjjañapatak servirinakapar sum wakichtʼaski ukwa uñachtʼayistu (2 Tim. 4:5).

Jilatanakaruw luräwinakap phoqapjjañapatakejj wakichtʼasi

15. Tama sarayapki uka jilatanakajja, ¿kunjamanakatsa Jesusat yateqasipjje?

¹⁵ Kunjamsa Jehová Diosajj Jesusar yatichäna ukwa Isaías sat profetajj qhanañchäna. Uka profeciarjamajja, kunjamsa ‘qaritanakaru suma arunakampi chuymachtʼaspa’ ukwa Jesusajj alajjpachan yateqäna (Isa. 50:4). Ukat aka Oraqenkkasajja, kuntï alajjpachan yateqkäna ukarjamaw Jesusajj ‘taqe qarjatanakaru ukat jatjatanakar’ chuymachtʼäna (Mat. 11:28-30). Jichhürunakanjja, tama sarayapki uka jilatanakajj Jesusat yateqasisaw jilat kullakanakar chuymachtʼapjje. Ukampis tamankirinakar jukʼamp sum uñjapjjañapatakiw jilatanakatakejj yaqha escuelanak utjañap amtasiwayi.

16, 17. ¿Kuna amtampis Irpir Chuymaninakataki ukat Yanapirinakapatak Escuelajj wakichasiwayi? (Qhanañchäwip uñjjattʼäta.)

¹⁶ Irpir Chuymaninakataki ukat Yanapirinakapatak Escuela. Uka escuelajj South Lansing (Nueva York) sat markanwa marzo 9, 1959 maran apasiñ qalltäna. Tamanak tumptʼirinakaru ukat siervos de congregación sasin uñtʼatäpkäna ukanakaruw mä phajjsitak invittʼasïna (uka tiempon siervos de congregación sasin uñtʼatäpkäna uka jilatanakajja, jichhajj irpir chuymaninakat sarayiri sasin uñtʼatäjjapjjewa). Qhepatjja, kuntï uka escuelan inglés arut yatichaskäna ukajj yaqha arunakaruw jaqokipasirakïna, ukhamat uka escuela toqejj aka Oraqpachankir jilatanakaru jukʼat jukʼat sum wakichtʼañataki.f

¹⁷ ¿Kuna amtampis uka escuelajj wakichtʼasiwaypachäna? Anuario de los Testigos de Jehová (1962) sat librojj akham siwa: “Akapachanjja, kunayman lurañanakaw utji. Ukhamajj tamankirinakaru sum uñjañataki ukat yanaptʼañatakejja, tama pʼeqtʼapki uka jilatanakajj kunanaksa jakäwipan lurapjjani uk sumwa amuytʼasipjjañapa. Ukat janiw tama uñjañ laykukejj familiapat armasipjjañapäkiti, ‘taqe amuytʼampiw kuns amtapjjañapa’. Jichhajj siervos de congregación sasin uñtʼatäpki uka jilatanakajja, irpir chuymaninakatak utjki uka escuelaruw sarapjjaspa. Ukaw jupanakarojj Biblian mayitanakaparjam sarnaqañ yanaptʼani” sasa (1 Tim. 3:1-7; Tito 1:5-9).

18. Irpir Chuymaninakataki ukat Yanapirinakapatak Escuelajja, ¿kunjamsa taqpach jilat kullakanakar yanaptʼi?

¹⁸ Irpir Chuymaninakataki ukat Yanapirinakapatak Escuelajj taqpach jilat kullakanakaruw yanaptʼawayi, ¿kunatsa ukham sistan? Kunapachatï irpir chuymaninakasa ukat yanapirinakapasa kuntï uka escuelan yateqapki ukarjam lurapjje ukhajja, Jesusjamaw jilat kullakanakar wal chuymachtʼapjje. Ak amuytʼañäni, mä irpir chuymanisa jan ukajj yanapiripasa utar jutasin suma arunakamp chʼamañchtʼistu ukat sum istʼistu ukhajja, wali sumaw chuymasan jikjjatastan (1 Tes. 5:11). Cheqansa, uka jilatanakajj tamatak mä suma bendicionäpjjewa.

19. Yatichañ toqet Uñjirinakjam irnaqtʼapki uka jilatanakajja, ¿kuna yaqha escuelanaksa wakichapjje, ukat kunjamsa ukanakajj jilatanakar yanaptʼi?

¹⁹ Yaqha escuelanaka. Tamanak sarayañatak uttʼayatäpki uka jilatanakar wakichtʼañatakejja, Oraqpachan Jilïr Irpirinakat Yatichañ toqet Uñjirinakjam irnaqtʼapki (Comité de Enseñanza del Cuerpo Gobernante) uka jilatanakaw yaqha escuelanak apasiñapatak pʼeqtʼapjje. Kuntï lurapjjañapäki uk sum phoqapjjañapatakiw uka escuelanakajj irpiri chuymaninakaru, tamanak tumptʼirinakaru ukat Sucursal Sarayirinakar yanaptʼi. Diosamp sum apasipjjañapatakisa ukat jupanakar katuyata Diosan uwijanakaparu Bibliarjam sum uñjapjjañapatakisa yanaptʼarakiwa (1 Ped. 5:1-3).

20. 1) “Diosajj taqeniruw yatichi” sasajja, ¿kunatsa Jesusajj säna? 2) ¿Kun lurañsa amtañasajja?

²⁰ Kunjamtï uñjawayktanjja, Diosan Reinopan apnaqeri Jesucristojj sumwa arkirinakaparojj wakichtʼawayi. Cheqansa, Jehová Diosajj Jesusaruw nayraqat wakichtʼawayi, Jesusajj arkirinakaparuw wakichtʼawayaraki. Ukatwa Jesusajj akham säna: “Diosajj taqeniruw yatichi” sasa (Juan 6:45; Isa. 54:13). Ukhamajj Jesucristo Reyisamp yatichayasiskakiñäni. ¿Kunatakis Jehová Diosajj ukham sum wakichtʼistu? Jupamp sum apasiñasatakiw wakichtʼistu, ukhamat arunakap sum yatiyañasataki.