Mayninakar yanaptʼasaw Diosar yupaycharaktanjja

1, 2. 1) ¿Kuna jan walinsa Judeankir cristianonakajj uñjasipjjäna? 2) Judeankirinakajja, ¿kuna yanaptʼanaksa yaqha markankir cristianonakat katoqapjjäna?

JUDEA markanjja, machʼaw 46 maran utjäna. Mä jukʼa manqʼa alañatakis walja qollqew munasïna, ukat ukan jakasir cristianonakajj janiw ukanak alañatakejj qollqenïpkänti. Ukatwa ‘manqʼatjam jiwjjañäni’ sasin amuyapjjpachäna. Ukampis Jehová Diosaw jupanakar yanaptʼäna, ukhakamajja, janiw cristianonakajj Diosan yanaptʼap ukhampun uñjapkänti. ¿Kunas paspachäna?

² Jerusalén ukat Judea markankir jilat kullakanakat sinttʼasisaw Antioquía (Siria) cheqankiri ukat yaqha markankir cristianonakajja, yanaptʼañatak qollqe ukat yaqha yanaptʼanak apthapipjjäna. Ukat uka yanaptʼanak Jerusalén markankir irpir chuymaninakar apayañatakejja, Bernabé ukat Saulo sat confiykañ chachanakaruw ajllipjjäna (Hechos 11:27-30 ukat 12:25 liytʼañataki). Antioquía markankir jilat kullakanakat yanaptʼanak katoqasajja, wali kusisitaw Judea markankir cristianonakajj jikjjatasipjjpachäna.

3. 1) Jichhürunakanjja, ¿kunjamsa cristianonakajj Antioquía markankir cristianonakat yateqasipjje? Uk mä uñachtʼäwimp qhanañchtʼam. (“Jilat kullakanakaruw yanaptʼasïna” siski uka recuadro uñjjattʼäta.) 2) ¿Kuna jisktʼanakarus qhanañchaskañäni?

³ Ukat ukhampuniw kunjamsa mä cheqankir cristianonakajj yaqha cheqankir cristianonakar yanaptʼapjjäna ukajj Qollan Qellqatanakan qellqtʼat uñsti. Jichhürunakanjja, Antioquía markankir cristianonakat yateqasisaw jan waltʼäwin uñjasipki uka jilat kullakanakar jankʼak yanaptʼtanjja.a Cheqas ukham yanaptʼasaw Jehová Diosar yupaycharaktanjja. Kunatsa ukham sistan uk yatiñatakejj aka kimsa jisktʼanakwa qhanañchaskañäni: Jan waltʼäwin uñjasipki ukanakar yanaptʼañajja, ¿kunatsa Diosar serviñamp sasejja? ¿Kuna amtampis ukanakajj lurasi? Ukat ¿kunjamsa ukajj jiwasar yanaptʼarakistu?

Jan waltʼäwinakan uñjasipki ukanakar yanaptʼasaw Diosar yupaycharaktanjja

4. Diosar serviñ toqetjja, ¿kunsa Pablojj Corintonkirinakar qhanañchäna?

⁴ Corinto markankir jilat kullakanakar payïr carta apaykäna ukanjja, kunjamsa mä cristianojj Diosar serviñapa uka toqetwa Pablojj parläna. Ajllit cristianonakarus uka carta apaykchïnjja, ‘yaqha uwijanakjam’ uñtʼatäpki uka cristianonakas uka arunakarjamaw jichhürunakan sarnaqapjjarakispa (Juan 10:16). Pablon arunakaparjamajja, kunanak lurañas waktʼistu uk pä toqetwa amuytanjja: Maya, ‘Diosampi sumankthapiñ arunakwa loqtañasa’, mä arunjja, taqeniruw Diosat yatiyañasa ukat yatichañasaraki (2 Cor. 5:18-20; 1 Tim. 2:3-6). Paya, jan waltʼäwin uñjasipki uka jilat kullakanakasaruw yanaptʼañasa. Uka toqet parlkasajja, akham sasaw Pablojj säna: ‘Tatitun markapar yanaptʼapjjam’ sasa (2 Cor. 8:4). ‘Loqtaña’ ukat ‘yanaptʼaña’ siski uka arunakajja, diakonía siski uka griego arut jaqokipatawa, uka arojj mayninakar serviña sañwa muni. ¿Kunatsa uk yatiñasajj wakisi?

5. Jan waltʼäwin uñjasipki ukanakar yanaptʼasaw Diosar serviraktanjja sasajja, ¿kunatsa Pablojj sispachäna?

⁵ Diosan arunakap yatiyañasa ukat mayninakar yanaptʼañasa, kunja askisa uk qhanañchañatakejj mä arukwa Pablojj griego arun apnaqäna. Ukhamajja, jan waltʼäwin uñjasipki ukanakar yanaptʼasaw kuntï mä cristianojj phoqañapäki uk phoqaraktanjja. Pablojj nayratpachaw uka toqet akham sasin qhanañchjjäna: “Kunayman toqet serviñawa utjaraki, ukampis mä sapa Tatiturukiw sirvtanjja. Kunayman toqet lurañanakajj utjaraki, ukampis [...] mä sapa Ajayukiw luri” sasa (1 Cor. 12:4-6, 11). Cheqansa, taqe kunatï taman luraski ukajj ‘Diosar serviñawa’ (Rom. 12:1, 6-8).b Ukatwa Pablojj jilat kullakanakar yanaptʼañjja wali askit uñjpachäna (Rom. 15:25, 26).

6. 1) Pablon arunakaparjamajja, ¿kunatsa jan waltʼäwin uñjasipki ukanakar yanaptʼañajj Diosar yupaychañampi sasispa? 2) Jan waltʼäwin uñjasipki uka jilat kullakanakarojj kunjamsa yanaptʼasi uk qhanañchtʼam. (“Jan waltʼäwinakatak wakichtʼasiña” siski uka recuadro uñjjattʼäta.)

⁶ Jan waltʼäwin uñjasipki ukanakar yanaptʼasaw Jehová Diosar yupaycharaktanjja sasin Corinto markankir cristianonakar qhanañchañatakejja, Pablojj akham sänwa: ‘Criston suma arunakaparu jaysapjjatap’ laykuw jan waltʼäwinakan uñjasipki ukanakar yanaptʼapjje sasa (2 Cor. 9:13). Mä arunjja, Criston yatichäwinakaparjam sarnaqañ munasaw Corinto markankir cristianonakajj jilat kullakanakapar yanaptʼapjjäna. Ukhamatwa Jehová Diosajj kunja ‘khuyapayasirisa’ uk uñachtʼayapjje, sasaw Pablojj säna (2 Cor. 9:14; 1 Ped. 4:10). Ukatwa yanaptʼa munapki ukat jan waltʼäwin uñjasipki uka jilat kullakanakat parlkasajja, Yatiyañataki junio 1, 1976 maran mistkäna uka revistajj akham säna: “Mayninakar yanaptʼañjja wali askitwa Jehová Diosasa ukat Jesusas uñjapjje, uk janipuniw armañasäkiti” sasa. Cheqansa, jan waltʼäwin uñjasipki ukanakar yanaptʼasaw Diosar serviraktanjja (Rom. 12:1, 7; 2 Cor. 8:7; Heb. 13:16).

Jan waltʼäwin uñjasipki ukanakarojj ¿kuna amtampis yanaptʼasi?

7, 8. Nayraqatjja, ¿kuna amtampis jan waltʼäwin uñjasipki ukanakar yanaptʼtan?

⁷ ¿Kuna amtampis jan waltʼäwin uñjasipki uka jilat kullakanakarojj yanaptʼtanjja? Corinto markankir jilat kullakanakar payïr cartap apaykäna ukanwa Pablojj uka toqet parläna (2 Corintios 9:11-15 liytʼañataki). Kunatsa jilat kullakanakar ‘yanaptʼañajj’ wakisi uk kimsa toqetwa Pablojj qhanañchäna. Ukwa jichhajj yatjjatañäni.

⁸ Maya: jan waltʼäwin uñjasipki ukanakar yanaptʼasaw Jehová Diosar jachʼañchtanjja. 2 Corintios 9:11-15 tʼaqanakanjja, walja kutiw Pablojj jilat kullakanakar Jehová Diosat parläna. Jupajj akham sänwa: “Diosaruw yuspagarapjjaraki[ni]” ukat “Diosaruw jupanakarojj jukʼampi yuspagarayap[jjañäni]” sasa (11 ukat 12 tʼaqanaka). Jan waltʼäwin uñjasipki uka jilat kullakanakar yanaptʼasajja, kunjamsa cristianonakajj ‘Diosar yupaychapjje’ ukat ‘jachʼa khuyapayasiñapat’ jachʼañchapjje uka toqetwa Pablojj parlarakïna (13 ukat 14 tʼaqanaka). Ukat jan waltʼäwin uñjasipki ukanakar yanaptʼañat parlañ tukuyasajja, “¡yuspagaratäpan Diosajja!” sasaw jupajj sarakïna (15 tʼaqa; 1 Ped. 4:11).

9. Jilat kullakanakasar yanaptʼir uñjapjjestu ukhajja, ¿kunsa yaqhep jaqenakajj amuyapjje? Mä uñachtʼäwimp uk qhanañchtʼam.

⁹ Jichha tiemponjja, Jehová Diosan servirinakapajj apóstol Pabljamarakiw akham amuyapjje: ‘Jan waltʼäwinakan uñjasipki ukanakar yanaptʼasaw Diosar jachʼañchsna ukat yatichäwip sumätap uñachtʼaysna’ sasa (1 Cor. 10:31; Tito 2:10). Yaqhep jaqenakajja, jan walinakwa Jehová Diosatsa ukat servirinakapatsa amuyapjje. Ukampis kunapachatï jilat kullakanakar jaqe masipar yanaptʼir uñjapjje ukhajja, janiw ukham amuyjjapjjeti. Amuytʼañataki, mä warmejja akham sasaw uta punkupan mä letrero uchasïna: “Jehová Diosan Qhanañchirinakapa, jan aka punk leqtʼanipjjamti” sasa. 2005 maranjja, mä jachʼa thayaw markapan utanak qʼal tukjäna. Uka pasatatjja, kunjamsa utap jakʼan jilat kullakanakajj thayamp tukjat mä uta askichasipkäna ukwa uka warmejj uñjäna. Walja urunakaw jupanakar uñchʼukïna ukat mä urojja, akham sasaw jupanakar jakʼachasisajj jisktʼäna: ‘¿Khitinakäpjjtasa?’ sasa. Jehová Diosan Qhanañchirinakapäpjjatap yatisajj wal muspharäna. Ukat akham sänwa: “Jan sum yatisaw jumanakat jan wal amuyatätjja” sasa. Qhepatjja, punkupar letrero uchkäna uksa apaqjjänwa.

10, 11. 1) ‘Jilat kullakanakasaruw kunanakatï wakiski ukanak jilarkir churtanjja’ sasajja, ¿kunatsa sissna? 2) Jan waltʼäwin uñjasipki ukanakar yanaptʼir jilat kullakanakatakejja, ¿kuna folletos utji? (“Jan waltʼäwinakan yanaptʼir jilat kullakanakatak folleto” siski uka recuadro uñjjattʼäta.)

¹⁰ Paya: Jilat kullakanakaruw kunanakatï wakiski ukanakajj jilarkir churasi (2 Cor. 9:12a). Llakinakan uñjasipki uka jilat kullakanakasaruw yanaptʼaña ukat chuymachtʼañ wal muntanjja. ¿Kunatsa? Diosan servirinakapjamajja, ‘mä sapa cuerpor tukutakïtanwa’, ukhamajj ‘cuerposan mayawjatejj tʼaqheschi ukhajja, taqpachanirakiw tʼaqhestanjja’ (1 Cor. 12:20, 26). Cheqansa, sinttʼasiri ukat munasirïpjjatap laykuw walja jilat kullakanakajja, lurañanakap jaytasa ukat herramientanakap apjjarusisajj jan waltʼäwin uñjasipki uka jilat kullakanakar yanaptʼir sarapjje (Sant. 2:15, 16). Amuytʼañataki, 2011 maranjja, umaw qotat mistunisin Japón markan jan waltʼäwinak utjayäna. Ukatwa Estados Unidos markankir sucursalajja, uka markan utjki uka Comités Regionales de Construcción gruponakan irnaqtʼir jilat kullakanakarojj mä cartan akham sasin jisktʼäna: ‘Tantachasiñ Utanaka wasitat saytʼayañatakejja, ¿wakichtʼat mä qawqha jilat kullakanakajj yanaptʼañ munapjjasmati?’ sasa. Mä qawqha semananak qhepatjja, niya 600 jilat kullakanakaw yanaptʼir sarañ munapjjatap yatiyapjjäna ukat ‘Japón markar avionat sarañatakejj nanakaw pasaje pagasipjjä’ sasaw sapjjarakïna. “Janiw ukhamäniw sapkayätti” sasaw Estados Unidos markankir sucursalajj säna. Ukat Japón markankir mä jilatajj yaqha markankir jilataru ‘¿kunatsa akar jutawayta?’ sasin jisktʼkäna ukhajja, jupajj akham sänwa: “Taqe jilat kullakanakajj mä cuerpokïtanwa, Japón markankir jilat kullakanakas uka taypinkapjjarakiwa. Ukatwa jumanakamp chik tʼaqhesipjjarakta” sasa. Yaqhep jilat kullakanakajja, jaqe masipar munasisa ukat jupanakar yanaptʼañ munasaw awisajj jakäwip aptʼasirjam yanaptʼawayapjje (1 Juan 3:16).c

¹¹ Jehová Diosar jan servirinakasa, kuntï Jehová Diosan Qhanañchirinakapajj lurapki uk wali askitwa uñjapjjaraki. Amuytʼañataki, 2013 maranwa Arkansas (Estados Unidos) markan mä jachʼa jan waltʼäwejj utjäna. Uka jan waltʼäwinjja, kunjamsa Jehová Diosan Qhanañchirinakapajj jilat kullakanakapar jankʼak yanaptʼapjjäna uk akham sasaw mä periodicojj yatiyäna: “Jehová Diosan Qhanañchirinakapajj suma wakichtʼatäpjjewa, ukatwa jan waltʼäwinak utjki ukhajj jankʼaki ukat yäpar sum yanaptʼapjje” sasa. Cheqas kunjamtï Pablojj siskänjja, kunanakatï munaski ukanak jilarkirwa jilat kullakanakasarojj churtanjja.

12-14. 1) Jan waltʼäwin uñjasipki uka jilat kullakanakaru Diosar servisipkakiñapatak yanaptʼañajja, ¿kunatsa wali wakiskirejja? 2) Diosatak irnaqtʼaskakiñajj wali wakiskirïtapjja, ¿kunjamsa yaqhep jilat kullakanakajj qhanañchapjje?

¹² Kimsa: Jan waltʼäwin uñjasipki ukanakarojj Diosar servisipkakiñapatakiw yanaptʼtanjja. ¿Kunatsa ukajj wali wakiskirïpacha? Yanaptʼa katoqerinakajj Diosaruw wal yuspärapjje sasaw Pablojj säna (2 Cor. 9:12b). Cheqas yanaptʼa katoqapki uka jilat kullakanakajja, kunjamtï nayrajj Diosar servipkäna ukham wasitat servisaw Jupar yuspärapjjatap uñachtʼayapjjaspa (Fili. 1:10). 1946 maran mistkäna uka Yatiyañataki revistajj akham sänwa: ‘Kunapachatï yanaptʼa munapkäna uka jilat kullakanakajj qollqe ukat yaqha ukham yanaptʼanak katoqapjjäna ukhajja, Diosan arunakap yatiyañatakejj jukʼamp tiemponïpjjänwa ukat chʼamanïpjjarakïnwa. Ukatwa Pablojj ukham yanaptʼasiñap amtpachäna’ sasa. Jichhürunakanjja, uka pachpa amtampiw jilat kullakanakasarojj yanaptʼtanjja. Cheqas Diosat wasitat yatiyjjapjje ukhajja, janiw jaqe masiparuk chʼamañchtʼapkiti, jan ukasti, jupanak pachpaw chʼamañchtʼasipjjaraki (2 Corintios 1:3, 4 liytʼañataki).

¹³ Ukwa yanaptʼa katoqawayapki uka jilat kullakanakajj uñjawayapjje. Cheqas uka yanaptʼanak katoqañaw Diosan arunakap yatiyasipkakiñapatakejj yanaptʼawayi ukat ukham yatisajj wali chʼamañchtʼataw jupanakajj jikjjatasipjjarakïna. Mä jilatajj akham sänwa: “Diosan arunakap yatiyir sarañaw familiajarojj wal yanaptʼawayi. Cheqas jaqe masisar yanaptʼañajja, jan sinti llakisiñatakiw yanaptʼawayapjjetu” sasa. Mä kullakajj akham sarakïnwa: “Diosatak jan tiempon irnaqañaw kuna jan waltʼäwinakatï utjkäna ukanakat jan sint lupʼiñatak yanaptʼawayitu. Chuymajan janiw kunar ajjsarañas utjkänti” sasa. Yaqha kullakajj akham sasaw arsurakïna: “Janiw taqpun lurirjamäpkayätti. Ukampis Diosan arunakap yatiyañaw kunatï jukʼamp wakiskirïki ukamp phoqañatakejj nayarusa ukat familiajarus yanaptʼawayapjjetu. Cheqas kunjamsa jutïr urunakan jakasiñäni uka toqet parlañajja, ‘Diosajj taqe kunwa machaqat lurani’ sasin jukʼamp confiyañatakiw yanaptʼapjjetäna” sasa.

¹⁴ Maysa toqetjja, jan waltʼäwin uñjasipki uka jilat kullakanakajja, tantachäwinakar saraskakiñatakiw chʼamachasipjjañaparaki. Niya 60 marani Kiyoko sat kullakajja, markapan tsunami sat jan waltʼäwejj utjkäna ukhajj jan kunaniw uñjasïna. Uchatäkäna uka isipampikiw uka jan waltʼäwit qhespïna. Jupajj wali llakit jikjjatasisajj janiw jutïrit kuns suyjjänti. Ukampis mä irpir chuyman jilataw ‘autojanwa tantachäw apañäni’ sasin uka kullakar säna. Kiyoko sat kullakajj uka tantachäw amtasajj akham siwa: “Irpir chuymani jilatampi, warmipampi ukat mä kullakampiw auton qontʼasipjjayäta. Uka tantachäwejj janiw jachʼäkänti, ukampis jan waltʼäwinak utjkäna ukanakat armasiñatakiw yanaptʼitäna. Chuymajans sumakiw jikjjatasiyäta. Ukhaw tantachäwinakajj wal yanaptʼirïtap uñjawayta” sasa. Jan waltʼäwi pasatat kunjamsa tantachäwir sarasajj jikjjatasïna, uk akham sasaw yaqha kullakajj sarakïna: “Ukaw jan aynachtʼañatak yanaptʼawayitu” sasa (Rom. 1:11, 12; 12:12).

Jan waltʼäwin uñjasipki ukanakar yanaptʼañajj janiw inamayäkiti

15, 16. 1) Mayninakar yanaptʼasajja, ¿kuna askinaksa Corinto markankir cristianonakasa ukat yaqha cheqankir cristianonakas katoqapjjäna? 2) Mayninakar yanaptʼasajja, ¿kuna askinaksa jiwasajj katoqaraksna?

¹⁵ Yanaptʼirinakasa ukat yanaptʼa katoqerinakasa, kuna askinaksa katoqapjjaspa, ukwa Pablojj Corintonkir cristianonakar qhanañchäna. Jupajj akham sänwa: “Jupanakasti [mä arunjja, Jerusalén markan yanap katoqapkäna uka judío cristianonakajja,] jumanakatakejj taqe munasiñampiw Diosat mayipjjarakini, Diosajj jumanakar jachʼa khuyapayasiñap uñachtʼayatapata” sasa (2 Cor. 9:14). Cheqas Judea markankir cristianonakajja, Corinto markankir cristianonakat yanaptʼa katoqasaw jupanakataki ukat yaqha markankir cristianonakataki Diosat mayirapipjjäna, ukat jukʼampirakiw jupanakar munasipjjäna.

¹⁶ Jan waltʼäwin uñjasipki ukanakar yanaptʼasajj kuna askinaksa jichhürunakan jikjjataraksna uka toqet parlkasajja, Yatiyañataki abril 15, 1946 maran mistkäna uka revistajj akham sänwa: “Diosar katuyat markankir yaqhep jilat kullakanakajj yaqha cheqankir jilat kullakanakar yanaptʼapjje ukhajja, Diosan servirinakapajj jukʼamp mayachtʼatäpjjewa” sasa. Jan waltʼäwin uñjasipki ukanakar yanaptʼir jilat kullakanakajja, uka arunakan cheqätapwa sum amuyapjje. Amuytʼañataki, mä markan umajj utanak apasjjäna uka jan waltʼäwin yanaptʼir mä irpir chuymanejj akham sänwa: “Ukan yanaptʼañaw jilat kullakanakar jukʼamp munasiñatak yanaptʼawayitu” sasa. Ukat yanaptʼa katoqer mä kullakajj akham sasaw qhanañcharaki: “Jilat kullakanakasan munasiñap uñjañajja, niyas Paraison jaksna ukhamwa amuyayitu” sasa (Proverbios 17:17 liytʼañataki).

17. 1) Jan waltʼäwin uñjasipki uka jilat kullakanakajja, ¿kunjamsa Isaías 41:13 qellqatan phoqasitap uñjapjje? 2) Jan waltʼäwin uñjasirinakar yanaptʼtan ukhajja, ¿kunjamsa Jehová Diosar jachʼañchtan ukat jilat kullakanakasarus jukʼamp jakʼachasiraktan? (“Oraqpachanwa jilat kullakanakarojj yanaptʼasi” siski uka recuadro uñjjattʼäta.)

¹⁷ Kunapachatï jilat kullakanakajj jan waltʼäwinak utjki uka cheqar yanaptʼañatak puripki ukhajja, uka cheqan jakasir cristianonakajj Diosan aka arunakap cheqätapwa amuyapjje: “Naya, juman Tatitu Diosamaw, jumarojj amparat wayjjarsma, irparaksma; nayaw saraksma: ‘Jan ajjsaramti, nayaw yanapaskäma’” sasa (Isa. 41:13). Jan waltʼäwit qhespiri mä kullakajj akham sänwa: “Jan waltʼäwinakajj utjkäna ukhajja, jan yanaptʼirinjamaw amuyasiyäta. Ukampis Jehová Diosaw yanaptʼawayitu. Jilat kullakanakajj kunjamsa yanaptʼawayapjjetu uk sañatakejj janiw arunakajas utjkituti” sasa. Oraq khatatejj utjkäna uka markan jakasir pä irpir chuymanejja, kunjamsa tamanakapankir jilat kullakanakajj jikjjatasipjjäna uk akham sasaw qellqapjjäna: “Oraq khatatejj utjkäna ukhajj wali llakkañänwa, ukampis Jehová Diosaw jilat kullakanak toqejj yanaptʼawayapjjetu. ‘Jan waltʼäwin uñjasipki ukanakaruw jilat kullakanakajj yanaptʼapjje’ sasinwa qellqatanakan liytʼapjjerïta, ukampis jichhajj nanak pachpaw uk uñjawayapjjta” sasa.

¿Jumajj yanaptʼasmati?

18. Jan waltʼäwin uñjasipki ukanakar yanaptʼañatakejja, ¿kun lurañamas wakisispa? (“Kunsa jakäwipamp lurani uk amuyañatakiw yanaptʼawayi” siski uka recuadro uñjjattʼäta.)

¹⁸ ¿Jan waltʼäwin uñjasipki ukanakar yanaptʼañ munarakismati? Ukhamächi ukhajja, ak amtañamaw wakisi: jan waltʼäwinakan uñjasipki ukanakar yanaptʼir saririnakarojja, Tantachasiñ Utanak lurañan yanaptʼapki uka jilat kullakanak taypitwa ajllisi. Ukhamajj ukan irnaqtʼañatakejja, ¿janit irpir chuymaninakat mä solicitud maykasma? Jan waltʼäwin uñjasipki ukanakar yanaptʼiri wali experienciani mä irpir chuymanejj akham siwa: “Mä cheqantï jan waltʼäwejj utjchi ukhajja, yanaptʼañatak uttʼayatäpki (Comité de Socorro) uka jilatanakan satakiw uka cheqarojj sarañasa” sasa. Ukhamatwa ukankirinakarojj yäparu sum yanaptʼasispa.

19. Jan waltʼäwin uñjasipki ukanakar yanaptʼañajja, ¿kunjamsa Jesusan cheqpach arkirinakapäpjjatas uñachtʼayi?

¹⁹ “Maynit maynikama munasipjjam” sasaw Jesusajj säna. Cheqas jan waltʼäwinakan uñjasipki ukanakar yanaptʼasaw uka arunakarjam sarnaqatassa ukat Jesusan cheqpach arkirinakapäpjjatas uñachtʼaysna (Juan 13:34, 35). Walja jilat kullakanakaw Diosan Reinopamp apnaqatäpki ukanakar taqe chuym yanaptʼasajj Jehová Diosar jachʼañchasipki. Uk uñjañajj ¿janit jiwasatakejj wali askïki?