Kunjamsa qollq sum apnaqapjjasma

Kunatï jakañatak wakiski uk familiar churañatakejja, qollqejj wakisipuniwa (Proverbios 30:8). Kunjamtï Bibliajj siskejja, ‘qollqejj jaqer arjjatiwa’ (Eclesiastés 7:12). Qollqe toqet parlañajj chʼamakïspawa, ukampis uka layku chacha warmi jan waltʼayasipjjañamajj janiw walïkaspati (Efesios 4:32). Qollqe toqetjja, purapatwa confiyasipjjañama ukat kunanaksa alapjjäta uksa panimaw amtapjjañamaraki.

1 PURAPATWA SUM AMTAPJJAÑAMA

BIBLIAJJ KAMSISA: “Maynitejj jumanakat mä torre lurañ munaspajja, ¿janit nayraqatajj qontʼasisin qawqhas qollqejj tukuyañatakejj munasispa ukjj amuytʼaskaspajja?” (Lucas 14:28.) Kunjamsa qollq apnaqapjjäta uk panimaw sum amtapjjañama (Amós 3:3). Ukatjja, kunanak alañas wakisi ukat qawqsa gastapjjasma uksa panimaw amtapjjañamaraki (Proverbios 31:16). Kuntï munkta uk alañatak inas qollqejj utjaskstam, ukampis ¿uk alañamajj wakisipuniti? Qawqha qollqetï utjapktam ukakwa gastapjjañama, yaqhanakat sapa kuti maytʼasipjjañamajj janiw walïkaspati (Proverbios 21:5; 22:7).

KUNSA LURASMA:

• Phajjsi tukuyaru qollqejj jiltʼapjjätam ukhajja, kunsa ukamp lurapjjäta uk panimaw amtapjjañama

• Qollq pistʼayasipjjäta ukhasti, jan sint gastañatakejj kunsa lurapjjasma ukwa amuytʼapjjañamaraki. Sañäni, manqʼa alañat sipansa, utanwa phaytʼasipjjasma

2 QAWQHAS UTJAPTAM UKARJAMAW QHAN PARLAPJJAÑAMA

BIBLIAJJ KAMSISA: “Taqe kunsa cheqaparuw lurañ munapjjtjja, janiw Tatitu nayraqatanakti jan ukasti jaqenak nayraqatanraki” (2 Corintios 8:21). Qawqha qollqes utjtam ukat kunanaksa alta taqe ukanakwa chachamaru jan ukajj warmimar yatiyañama.

Ukat qollqe toqet janïr mä amtar purkasaw sum parltʼasipjjañama (Proverbios 13:10). Ukham lurañaw sum jakasiñatakejj yanaptʼapjjätam. Trabajomat katoqkta uka qollqejj familiänkaspas ukham uñjañamawa, janiw juma sapatakïkiti (1 Timoteo 5:8).

KUNSA LURASMA:

• Sapa maynejj qawqha qollqsa gastapjjasma ukwa amtapjjañama

• Janiw jan walin uñjasisakejj qollqe toqet parlapjjañamäkiti