Kunsa wawanïsajj lurapjjasma

Kunapachatï nayrïr wawapajj naski ukhajja, awk taykanakajj wal kusisipjje, ukampis llaktʼasipjjarakiwa. Cheqansa, wawa sum uywañatakejj chʼamachasiña ukat tiempo apstʼasiñaw wakisi. Awisajj jan sum ikipjjatap layku ukat qarit jikjjatasipjjatap laykuw awk taykanakajj jan sum apasjjapjjeti. Ukhamasti, wawar sum uñjañatakisa chacha warmjam sum apasiñatakisa, mä qawqha luräwinakam mayjtʼayañaw wakisispa. Jan aynachtʼañatakejja, ¿kunjamsa Biblian ewjjtʼanakapajj yanaptʼapjjeristam?

1 WAWANÏSAJJ JANIW JAKÄWIMAJJ NAYRJAMÄJJANITI

BIBLIAJJ KAMSISA: ‘Khititï munasirïki ukajja, llampʼu chuymaniwa, suma jaqewa, janiw kunsa jupatakiki munirïkiti, janirakiw colerasirïkiti’ (1 Corintios 13:4, 5). Wawanïpki uka taykanakajja, wawar sum uñjañatakiw jukʼamp chʼamachasipjje. Ukatwa chachajj janis warmipajj jupat llakiskaspa ukham amuyaspa. Ukhamajj janiw chachamat armasiñamäkiti. Kuntï jupajj wawar uñjañatak lurki ukajj wali askïtapa ukat jupan yanaptʼap munatamwa munasiñampi ukat pacienciamp uñachtʼayañama.

‘Chachanakasti warminakamampejj suma chuymanïpjjam’ (1 Pedro 3:7). Jichhat uksarojja, warmimajj wawar sum uñjañatakiw jukʼamp chʼamachasini. Ukat llakita, qarita, aynachtʼata, jumatakis colerata ukhamaw awisajj jikjjatasirakispa. Ukhamajj pacienciampiw warmimar uñjañama. Kunjamtï Bibliajj siskejja, “paciencianïñaw askejja, jan ajjsarir jaqet sipansa” (Proverbios 16:32). Amuytʼirïñamawa ukat warmimar yanaptʼañamarakiwa (Proverbios 14:29).

KUNSA LURASMA:

• Awki: Wawar uñjañwa warmimar yanaptʼañama, arumanakas yanaptʼañamarakiwa. Ukatjja, warmimampi ukat wawamampïñatakiw yaqha luräwinakat tiempo apstʼasiñama

• Tayka: Chachamatï wawa uñjañ yanaptʼañ munätam ukhajja, yanaptʼayasiñamawa. Ukat jan sum uñjkani ukhajja, janiw toqeñamäkiti, jan ukasti munasiñampiw kunjamsa lurañapa uk yatichañama

2 CHACHA WARMJAM SUM APASIÑATAK CHʼAMACHASIPJJAM

BIBLIAJJ KAMSISA: “Mä sapa jaqekïpkaspasa ukhamäpjjaniwa” (Génesis 2:24). Wawanëjjapjjsta ukhasa, jumanakajj ‘mä sapa jaqekïpkasmas’ ukhamäpjjtawa. Ukhamasti, chacha warmjam sum apasiñatakejj chʼamachasisipkakiñamawa.

Warminaka, kuntï chachamajj yanaptʼañatak lurki ukatjja yuspärapjjañamawa. Jan armasipjjamti, suma arunakamajj ‘mä qolljamäspawa’ (Proverbios 12:18). Chachanaka, kuntï warmimajj familiar sum uñjañatak lurki ukajj wali askïtapa ukat jupar wal munasipjjatamwa uñachtʼayapjjañama (Proverbios 31:10, 28).

‘Jaqe masisan askipwa munañasa, janiw jiwasan askisak munañasäkiti’ (1 Corintios 10:24). Janiw chachamat jan ukajj warmimat armasiñamäkiti. Purapat chʼamañchtʼasiñataki, istʼasiñataki ukat parltʼasiñatakiw tiempo apstʼasipjjañama. Chacha warmi ikthapiñ toqetsa, janiw juman askimak thaqhañamäkiti. Bibliajj akham siwa: ‘Jan “janiw” sasipjjamti, jumanak pura mä tiempo jan jakʼasiñataki, arustʼasipjjäta ukhakiw “janiw” sasipjjasma’ sasa (1 Corintios 7:3-5). Jumanakaw ukjjat qhan parltʼasipjjañama. Kunjamsa maynejj jikjjatasi uk amuytʼapjjäta ukat pacienciamp uñjasipjjäta ukhajja, jukʼamp sumaw apasipjjäta.

KUNSA LURASMA:

• Chacha warmjam sum parltʼasiñatakejj tiempo apstʼasiñamapuniwa

• Kun altʼarapisa jan ukajj yanaptʼasaw munasiñ uñachtʼayasma

3 WAWAR YATICHAPJJAÑAMAWA

BIBLIAJJ KAMSISA: “Wawatpachwa Tatitun arunakapjja yatta, uka arunakaw yatichiristam, ukhamarak qhespiyañaru irpiristam” (2 Timoteo 3:15). Kunjamsa wawar yatichapjjäta ukwa amuytʼapjjañama. Janïr nasipki ukhatpachaw wawanakajj yateqañ qalltapjje. Purakankasipki ukhajja, kunjamsa awk taykapajj parlasi, kunjamsa jikjjatasipjje uk amuyjjapjjewa. Ukhamasti, asu wawäsipki ukhatpachaw jupanakatak liytʼarapipjjañama. Inas arunak jan amuykchiniti, ukampis ukaw jachʼäjjan ukhajj liytʼañ munañapatak yanaptʼaspa.

“Diosat parlañatakejj wawäskiwa” sañajj janiw askïkaspati. Jan ukasti, jupa nayraqatanwa Diosat maytʼasiñama (Deuteronomio 11:19). Kunanaksa Diosajj lurawayi uka toqetwa anatkasajj jupamp parltʼasma (Salmo 78:3, 4). Ukhamatwa wawamajj qawqsa Jehová Diosar munasta uk amuyani, ukaw juparus Diosar munasiñapatak yanaptʼarakini.

KUNSA LURASMA:

• Kunjamsa wawamar sum yatichasma uk amuytʼañatakiw Diosat mayisiñama

• Wawaman kuntï yateqañap munkta ukwa kutin kutin parlañama