Mariajj janïr casaratäkasinwa usuriptäna

Mariajj pusi phajjsi usurëjjänwa. Usurëjjäna uka nayrïr phajjsinakajj Elisabet familiarapampiw jakasïna, Elisabetan utapajj Judeankir qollunak jakʼankänwa, ukajj Marian markapat aynach toqenkänwa. Qhepatjja Mariajj Nazaretaruw kuttʼjjäna, ukanwa jakasjjäna. Jaqenakajj niyaw ukanjja usurëjjatap amuyapjjani. ¡Ukajj Mariatak wali llakkañäpachänwa!

Mariajj José carpinterompi casarasiñatak parlatänwa, ukaw jukʼamp llakisiyäna. Diosajj Israel markar churkäna uka Leyirjamajja, casarasiñatak parlata mä warmitï yaqha chachampi ikintasïna ukhajja, qalamp kʼupjataw jiwayatäñapäna (Deuteronomio 22:23, 24). Mariajj janis yaqha chachampi sarnaqkchïnjja, inas akham sas jisktʼaschïna: ‘¿Kunjamsa Josearojj usurïtajat yatiyäjja, ukat kunas paspachäni?’ sasa.

Mariajj kimsa phajjsiw jan utapankkänti, ukhamasti Joseajj jupar wal uñjañ munpachäna. Jikisipjjäna ukhajja, ‘usurïtwa’ sasaw Mariajj Josear yatiypachäna, espíritu santo taypi usuriptäna uk qhanañchañatakis wal chʼamachaspachäna. Ukampis Joseatakejja Marian arunakap creyiñasa qhanañchatap amuyañasa chʼamäpachänwa.

Mariajj suma chuyman warmïnwa, jaqensa ukham warmit uñtʼatänwa, Joseajj uk sum yatïna, ukatwa jupar wal munasïna. Ukhamäkchïnsa Marian arunakapar creyiñajj Joseatak chʼamakïnwa, Mariajj yaqha chachatakiw usurïpacha sasaw jupajj amuypachäna. Ukampis Joseajj janiw Mariaru qalamp kʼupjasina jiwayapjjañapsa ni honrap aljañsa munkänti, ukatwa jamasat divorciasiñ amtäna. Uka tiemponakanjja, casarasiñatak parlat jaqenakajj casaratäjjapjjaspas ukham uñjatänwa, ukatwa jan casarasiñ munjjapjjäna ukhajj divorciasiñajj wakisïna.

Joseajj ukanakat wal lupʼïna, ukhamaw ikir sarjjäna. Uka qhepatjja Jehová Diosan angelapaw juparojj mä samkan uñstäna, ukatsti akham sänwa: “Jan ajjsaramti, María warmimarojj utamar irpaskakim. Espíritu santow jupjjar juti, ukatwa usurëjje. Jupasti mä yoqall wawa ususini, Jesús sasaw sutiyarakïta, jupaw markaparojj juchanakapat salvani” sasa (Mateo 1:20, 21).

Joseajj ikit sartjjasinjja, kunas Mariampejj pasaskäna uk sum yatjjäna, ukatwa Jehová Diosar wal yuspäräna. Kunjamtï Diosan angelapajj siskäna ukarjamaw lurarakïna, Mariarojj taqenin uñjkataw utapar irpasjjäna. Ukhamatwa jupampi casarasitap uñachtʼayäna. Ukhamarus Jesusan nasiñapkamajja, janiw chacha warmjam ikthapipkänti.

Mä qhawqha phajjsinak qhepatjja, Mariajj niya ususiñampëjjänwa. Ukhamäkchïnsa, Nazaretat jaya markar sarañatakiw wakichasipjjañapäna. ¿Kawkirus sarapjjañapäna?