Jutañapäkäna uka wawa

Nazaretaru kuttʼañat sipansa Joseampi Mariampejj Belén markanwa quedasipjjäna. Jesusajj kimsaqallqo urunëjjäna ukhajja, Diosajj Israel markar churkäna uka Leyirjamaw circuncidayapjjäna (Levítico 12:2-4). Costumbrenakarjamajja yoqall wawarojj uka uruw sutiyapjjerïna. Joseampi Mariampejj Jesús sasaw wawapar sutiyapjjäna, kunjamtï Gabriel angelajj siskäna ukhama.

Jesusajj 40 urunëjjänwa. Joseampi Mariampejj Jerusalén markankkäna uka temploruw Jesusar apapjjäna. Quedasipkäna uka cheqatjja, Jerusalenajj janiw jayankkänti. Diosajj churkäna uka Leyirjamajj 40 urunak pasatatjja, yoqall wawa ususir warmejj temploruw qʼomachasiñatak ofrenda loqtirejj sarañapäna (Levítico 12:4-7).

Mariajj uka Leyirjamaw luräna. Ofrendatjja, pä jamachʼinakwa loqtäna. ¿Kunsa ukajj amuytʼayistu? Jupanakajj janiw walja qollqenïpkänti. Leyirjamajja, mä orqo ovejampi mä jamachʼimp loqtañapäna. Ukampis ususir mä warmitï mä orqo ovej jan alirjamäkäna ukhajja, pä qhorukutu jan ukajj pä wawa palomakwa sacrificiot loqtañapäna. Mariajj ukakwa sacrificiot loqtäna.

Templonjja, chuymankipstat mä jaqew Joseampiru Mariampirojj jakʼachasïna, jupajj Simeón satänwa. Diosajja, Mesiasar uñjañkamajj janiw jiwkätati sasaw jupar satayna. Uka urojja, Simeonajj espíritu santon irpataw templor mantäna, Joseasa Mariasa ukankapjjarakïnwa, ukanwa Simeonajj wawarojj ichjjarüna.

Wawar ichjjarusajj akham sasaw Simeonajj Diosar yuspäräna: “Taqe Kunjjar Munañani Tatitu, arsutamarjamaw jichhajj aka wawar nayrajamp uñjawayta. Jichhasti esclavomajj wali kusisitaw jiwjjani. Khititejj salvasiñ apankani ukaruw nayrajamp uñjawayta, taqe markanakan uñjkataw jumajj uk wakichtajja. Jupajj mä qhanawa, kunatejj markanakar chʼamaktʼayki uk apaqeriwa, Israel markaman jachʼañchäwipas juparakiwa” sasa (Lucas 2:29-32).

Uk istʼasajj Joseampi Mariampejj wal musparapjjäna. Simeonajj jupanakar bendisisinjja, Mariar akham sänwa: “Aka wawasti Israel markan waljani tinkupjjañapataki ukhamarak mayamp sartapjjañapataki uttʼayatawa” sasa. Ukatjja, llakisiñajj mä jachʼa espadar uñtataw maysat maysakam passütam sasaw sarakïna (Lucas 2:34).

Uka urojj 84 marani mä profetisa warmiw ukankarakïna, jupajj Ana satänwa. Uka warmejj templor sarapunirïnwa. Joseampi Mariampejj templonkasipkäna ukhaw Anajj jupanakar jakʼachasïna. Ukatjja Anajj Diosar yuspärañwa qalltäna, Jesusatsa taqeniruw parlarakïna.

Kunanaktï Simeonasa Anasa templon lurapkäna ukanak uñjasajj walpun Joseampi Mariampejj kusisipjjpachäna. Taqe uka luräwinakajja, Jesusajj Diosan wawapäskapunïtap jupanakar uñachtʼayäna.