Jesusan nayrïr discipulonakapa

Jesusajj 40 urunak wasarankjjasinjja, Galilearuw kuttʼañ munäna. Janïr kuttʼasajj Bautisir Juanan ukaruw saräna. Jesusajj Juanan ukar purïna ukhajja, akham sasaw Juanajj jupar señaltʼasin säna: “¡Uñtapjjam, jupajj Diosan Corderopawa, khititejj akapachat juch apaqki ukawa! Jupatwa nayajj akham sista: ‘Mä jaqew nayan qhepaj juti, ukampis jupajj nayat sipans nayrankjjewa, nayat nayraw jupajj utj-jjäna’ sasa” (Juan 1:29, 30). Juanajj Jesusat sipansa mä jukʼa jilïrïkchïnsa, Jesusajj walja maranakaw alajjpachan espiritjam jakäna ukjja Juanajj yatïnwa.

Mä qhawqha semananak nayrajj Jesusajj bautisasir sarkäna ukhajja, Jesusajj Mesiasati janicha uk Juanajj janiw sum amuykpachänti, ukatwa akham sispachäna: “Janirakiw nayas jupar uñtʼkayätti, Israel markan jupar uñtʼapjjañapatakiw nayajj umamp bautisaskayäta” sasa (Juan 1:31).

Jesusar bautiskäna ukhajj kunas pasäna, uka toqetwa Juanajj jaqenakarojj akham säna: “Espíritu santoruw alajjpachat saraqanir uñjta, mä palomar uñtata, ukajj jupjjankarakïnwa. Janirakiw nayas jupar uñtʼkayätti. Umamp bautisir khitankitu ukajj akham sasaw nayar situ: ‘Espíritu santo saraqanir uñjäta, mayni patjjankatap uñjarakïta ukhajja, ak yatiñamawa, jupaw espíritu santompi bautisirejja’ sasa. Uksti naya pachpaw uñjta, jupaw Diosan Yoqapajja sasaw qhanañcharakta” sasa (Juan 1:32-34).

Qhepürusti Jesusajj Juanan ukar mayampi saräna ukhajja, Juanajj pä discipulopampïskänwa. Jesusar uñjasasti sänwa: “¡Uñtapjjam, jupajj Diosan Corderopawa!” sasa (Juan 1:36). Ukatwa Bautisir Juanan uka pä discipulonakapajj Jesusar arkapjjäna. Jupanakat maynïrejj Andrés satänwa, maynïristi inas uka toqet qellqkäna uka Juanächïna. Uka Juanajj Salomeampina Zebedeompina yoqapänwa. Salomeajj inas Marian kullakapächïna, ukhamäspa ukhajja, Juanajj Jesusan primopäpachänwa.

Jesusajj qhepar uñtasajj Andresampiru Juanampiruw uñjäna, jupanakajj Jesusaruw arkasipkäna, ukatwa Jesusajj jupanakar akham säna: “¿Kunsa thaqasipkta?” sasa.

Jupanakasti “Rabí, ¿kawkin alojatätasa?” sasaw jisktʼapjjäna.

Jesusasti “jutapjjam, uñjapjjätawa” sasaw jupanakar sarakïna (Juan 1:37-39).

Ukañkamasti niya pusi jaypʼu horasäjjänwa, Andresampi Juanampejj Jesusampiw uka jaypʼojj quedasipjjäna. Andresajj wali kusisitapunïnwa, ukatwa Simón jilapar thaqer saräna. Simonajj Pedro satarakïnwa. Simonar jikjjatasasti Andresajj akham sänwa: “Mesiasaruw jikjjatapjjta” sasa (Juan 1:41). Andresajja Jesusan ukaruw Pedror irpäna. Qhepatjja Juanajj ukhamarakiw Santiago jilapar jikjjatasajj Jesusan ukar irparakpachäna, Juanajj janiw uka toqet qhanañchkiti.

Qhepürusti Jesusajj Felipe chacharuw jikjjatarakïna. Felipe chachajj Betsaida markatänwa, Andresas Pedros uka markatäpjjarakïnwa. Uka markajj Galilea Qota jakʼankänwa, alay (norte) toqena. Jesusajj Feliper akham sänwa: “Nayar arkita” sasa (Juan 1:43).

Qhepatjja Felipejj Natanaelaruw jikjjatarakïna, Natanaelan yaqha sutipajj Bartolomé satänwa, ukatsti sarakïnwa: “Moisesan Leyipasa Profetanakasa parlki ukaruw jikjjatapjjta, jupajj Nazaretankir Jesusawa, Josean yoqapawa” sasa. Natanaelajj pächasisajja, akham sasaw Feliper säna: “¿Nazaret markat mä suma jaqejj mistuspati?” sasa.

Felipejj jupar sänwa: “Jutam, juma pachpaw uñjäta” sasa. Jesusajj Natanaelar jutaskir uñjäna ukhajja, akham sasaw säna: “Uñtapjjam, cheqas jupajj mä israelitawa, janirakiw kuna engaños jupan utjkiti” sasa.

Natanaelasti jupar sänwa: “¿Kunjamatsa jumajj nayar uñtʼista?” sasa.

Ukham satasti Jesusajj jupar sarakïnwa: “Felipejj janïr jawskayätam ukhaw nayajj higos árbol kʼuchun jumar uñjsmajja” sasa.

Ukatwa Natanaelajj jupar sarakïna: “Rabí, jumajj Diosan Yoqapätawa, jumarakiw Israel markan Reyipätajja” sasa.

Jesusajj jupar sarakïnwa: “¿Higos árbol kʼuchun jumar uñjsma satakit jumajj nayar creyista? Ukat sipansa jukʼamp musparkañanakwa jumajj uñjäta” sasa. Ukatsti saskakïnwa: “Cheqpachapuniw sapjjsma, jumanakajj jistʼaratwa alajjpach uñjapjjäta, kunjamsa Diosan angelanakapajj alajjpachar makatapjje, kunjamsa jaqen Yoqapan ukar saraqanipjje uksa uñjapjjarakïtawa” sasa (Juan 1:45-51).

Uka qhepatjja nayrïr discipulonakapampiw Jesusajj Jordán vallet Galilear sarjjapjjäna.