“Juchanakamajj perdonatäjjewa”

Taqe cheqanwa Jesusat istʼapjjäna. Waljanirakiw Jesusan yatichäwinakap istʼañatakisa milagronakap uñjañatakisa jaya cheqanakat jutapjjäna. Ukampis mä qhawqha urunakatjja, Capernaúm markaruw Jesusajj kuttʼjjäna, ukanwa jila parte quedasirïna. Capernaúm markankir jaqenakajj ‘Jesusajj kuttʼanjjataynawa’ sasin ratukiw yatiykipasipjjäna, uka markajj Galilea Qota jakʼankänwa. Ukhamasti walja jaqenakaw kawkintï Jesusajj quedaskäna ukan tantachasipjjäna. Uka jaqenakat yaqhepajj fariseonaka, Ley yatichirinakäpjjänwa. Jupanakajj Galilea, Judea uka cheqanakatwa jutapjjäna, Jerusalenatsa jutapjjarakïnwa.

Ukhamasti waljaniw ukan tantachasipjjäna, utajj wali phoqapunïnwa, punkus ukham phoqarakïnwa, Jesusasti Diosan arupatwa parlañ qalltäna (Marcos 2:2). Ukhamäkipanjja uka utankir jaqenakajj mä musparkañ milagro uñjapjjañapäna. Uka milagrojja, Jesusajj qhawqha chʼamanisa uk sum amuytʼañatakiw yanaptʼistu, jupaw kunanakatï tʼaqesiykistu ukanak chhaqtayani, khitirutï munki ukarus qollarakini.

Jesusajj jaqenakar yatichaskäna ukhajja, pusi chachanakaw mä camilla patjjarojj mä suchu jaqer apanipjjäna. Ukhamat amigopajj Jesusampi qollatäñapataki. Ukampis jaqejj wali phoqätap laykojja, “janiw Jesusan ukar cheqaki puriyirjamäpkänti” (Marcos 2:4). Ukajj llakkañäpachänwa. Jesusan ukar jan puriyirjamäsajja, uta techoruw makatapjjäna. Uta techo jartasajja mä camilla patjjaruw uka suchu jaqerojj uta manqhar apaqanipjjäna.

¿Jesusajj ukham lurapjjatapat coleraspachänti? Janiwa, jan ukasti uka jaqenakan Diosar confiyatap uñjasinjja, akham sasaw suchu jaqer säna: “Juchanakamajj perdonatäjjewa” sasa (Mateo 9:2). ¿Jesusajj juchanak perdonaspati? Escribanakasa fariseonakasa, kuntï Jesusajj säna uk istʼasajj colerasipjjänwa, akham sasaw chuymanakapan amuyapjjarakïna: “¿Kunatsa aka jaqejj ukham parli? Ukham parlasajj Dios contraw jan wal parli. Janiw khitis juchanak perdonkaspati, jan ukasti Diosakiw perdonaspajja” sasa (Marcos 2:7).

Jesusasti kuntï uka jaqenakajj amuyapkäna uk yatisajja, akham sänwa: “¿Kunatsa jumanakajj chuymanakaman ukham amuyapjjta? ¿Aka suchu jaqer kamsañas jukʼamp facilakejja, ‘juchanakamajj perdonatäjjewa’ sañati, jan ukajj ‘sarthapim, camillam apjjarusisin sarnaqam’ sañacha?” sasa (Marcos 2:8, 9). Jesusajj jakañap sacrificiot loqtañapäkäna ukarjamajja, uka jaqen juchanakap perdonaspänwa.

Jesusajj jupar istʼirinakarusa, jupa contra parlirinakarusa, juchanak perdonañatakejj aka oraqen munañanïtapwa uñachtʼayäna. Suchu jaqer uñtasinsti akham sasaw säna: “Nayajj sissmawa, sarthapim, camillam apjjarusisin utamar sarjjam” sasa. Uka jaqejj jankʼakiw uk luräna, camillap apjjarusisinsti taqe ukankirinakan uñjkataw sarjjäna. Uk uñjasasti jaqenakajj wal musparapjjäna, Diosar jachʼañchasajj akham sapjjänwa: “Janipuniw kunapachas ukham uñjirïktanti” sasa (Marcos 2:11, 12).

“Juchanakamajj perdonatäjjewa” sasinjja, juchanïpjjatapatwa jaqenakajj usuntapjje sañwa Jesusajj munäna. Maynejj juchanakapata perdonatäjjaspa ukhajj janiw usuntjjaspati. Bibliajja, nayrïr Adán awkisan juchar purtʼasitapatwa taqenis usunttanjja jiwaraktansa sasaw yatichi. Ukampis Diosan Reinopajj aka oraqjjar apnaqjjani ukhajja, Jesusajj Diosar munasipki servipkaraki ukanakan juchanakap perdonjjaniwa, ukhamasti usuntañajj wiñayatakiw chhaqtjjani (Romanos 5:12, 18, 19).