Jesusajj Mateoruw jawsäna

Mä suchu jaqer qollkäna uka qhepatjja, Jesusajj mä jukʼa tiempompiw Capernaúm cheqan qheparäna, Galilea Qota jakʼana. Ukanjja, jaqenakajj mayampiw Jesusan ukar jutapjjäna, ukatwa jupanakar yatichäna. Jesusajj impuesto cobririnakan oficinanakap jakʼa pasaskäna ukhajja, Mateoruw qontʼat uñjäna, jupajj Leví satarakïnwa. Ukhaw Jesusajj jupar akham sasin jawsäna: “Nayar arkita” sasa (Mateo 9:9).

Mateojj Jesusan yatichäwinakapatsa, kuna milagronaktï Capernaúm markan lurkäna ukanakatsa, Pedro, Andrés, Santiago, Juan jupanakjamarakiw yatpachäna. Uka pusi discipulonakajj Mateo chachjamarakiw ukaratpach Jesusar arkapjjäna. Mateojj akham sasaw jupa pachpat libropan qellqäna: “Ukaratpachaw sartasin arkjjaruwayäna” sasa (Mateo 9:9). Ukhamasti Mateojj impuesto cobrañ jaytjjänwa, Jesusan discipulopäjjänwa.

Uka qhepatsti, Mateojj mä jachʼa manqʼäwi utapan wakichäna, inas Jesusar yuspärañatak uk lurchïna. Ukar sarañatakejja, Jesusasa, discipulonakapasa, Mateon nayra amigonakapasa, impuesto cobririnakasa invitatäpjjarakïnwa. ‘Jucharar jaqenakasa’, mä arunjja, Diosan Leyiparjam jan sarnaqerit uñtʼat jaqenakasa ukankapjjarakïnwa (Lucas 7:37-39). Impuesto cobririnakajja, judionakajj uñisipkäna uka romanonakatakiw impuesto cobrapjjäna. ¿Khitinakatsa impuesto apsupjjerïna? Jupanakajj puertor puripkäna uka barconakata, markan jachʼa thakipnam pasapkäna uka alakip luririnakata, yaqha markanakat apanipkäna uka alatanakatwa impuesto cobrapjjerïna. ¿Kunjamsa judionakajj impuesto cobririnakar uñjapjjäna? Uka jaqenakajj wali uñisitäpjjänwa, jupanakajj engañjasaw jaqenakarojj impuestonak jukʼamp jila cobrapjjerïna.

Jesusaru ukham jaqenakampi chika manqʼer uñjasajja, suma jaqer tukuri fariseonakajj akham sasaw discipulonakar sapjjäna: “¿Kunatsa yatichirimajj impuesto cobririnakampi juchararanakampi manqʼe?” sasa (Mateo 9:11). Jesusajj uk istʼaskänwa, ukatwa akham säna: “Sano jaqenakatakejj janiw doctorajj munaskiti, jan ukasti khitinakatï usutäpki ukanakatakikiw munasi. Ukhamasti sarapjjam, kuntï Diosajj siskäna uka arunakajj kamsañsa muni uk yatjjatanipjjam, jupasti sänwa: ‘Nayajj jaqenakan khuyapayasirïñap munta, janiw sacrificionakap munkti’ sasa. Nayajj janiw cheqapar sarnaqerinakar jawsir jutkti, jan ukasti juchararanakar jawsiriw jutta” sasa (Mateo 9:12, 13; Oseas 6:6). Fariseonakajj “yatichiri” sasinsa Jesusar sapkchïnjja, janiw ukham uñjapkänti. Jupanakatï Jesusar istʼapjjaspäna ukhajja, cheqaparjam sarnaqañwa yateqapjjaspäna.

Mateojj impuesto cobrir jaqenakarusa juchararanakarusa, Jesusar istʼapjjañapatakiw invittʼpachäna. “Uka jaqenak taypinjja, waljaniw jupar arkirinakajj utjäna” (Marcos 2:15). Jupanakarojja Jesusajj Diosampi sum apasipjjañapatakiw yanaptʼañ munäna, janiw kunjamatï fariseonakajj yaqhachkäna ukham lurkänti. Jan ukasti khuyaptʼayasiñatjja, kunjamatï mä doctorajj mä usutar yanaptʼkejja, ukhamarakiw Jesusajj Diosamp jan sum apasipkäna ukanakarojj yanaptʼäna.

Jesusajj impuesto cobrir jaqenakatsa juchararanakatsa khuyaptʼayasïnwa. Ukham luratapajja, janiw uka jaqenakan juch lurapjjatapajj Jesusatak walikïkaspas ukham sañ munkänti, jan ukasti kunjamtï jupajj usutanakat khuyaptʼayaskänjja ukhamarakiw uka jaqenakat khuyaptʼayasïna. Amtañäni, lepra usuni jaqerojj khuyaptʼayasiñatwa amparampi loqjjatasin akham säna: “Muntwa, qollatäjjam” sasa (Mateo 8:3). ¿Kunsa ukajj yatichistu? Jiwasajj Jesusjamarakiw khuyaptʼayasirïñasa, Diosamp sum apasipjjañapatak jaqenakar yanaptʼañasa.