Jesusajj mä qollun yatichäna

Jesusajj 12 apostolonakar ajlliñatakejj arum paqaraw Diosar mayisïna, ukhamajj wali qaritäpachänwa. Uröjjäna ukhajja, Jesusajj qaritäkchïnsa jaqenakar yanaptʼañ munaskakïnwa. Galileankir mä qollu jakʼanwa jaqenakar yanaptʼäna, uka qollojj Capernaúm marka jakʼankpachänwa, Jesusajj ukanwa jaqenakarojj jilpach yanaptʼirïna.

Jesusan ukarojja, walja jaqenakaw wali jaya markanakat jutapjjäna. Yaqhepanakajj Jerusalenata, Judeankir yaqha markanakat jutapjjäna. Qota jakʼankir Tiro, Sidón uka markanakatsa jutapjjarakïnwa. ¿Kunatsa jutapjjäna? Jupanakajj ‘usunakapat qollayasiñatakiw’ jutapjjäna. Jïsa, Jesusajj taqe usutanakaruw waliptayaskäna. Supayan ‘demonionakapajj tʼaqesiyapkänaʼ uka jaqenakarusa Jesusajj waliptayarakïnwa (Lucas 6:17-19).

Jesusajj qollut saraqasinjja mä pamparuw saräna, ukaruw jaqenakajj jutapjjarakïna. 12 apostolonakapasa mayni discipulonakapasa jupa jakʼankapjjpachänwa. Taqenirakiw milagronak luriri jachʼa yatichiriru istʼañ munapjjäna. Jesusajj ukanwa yatichañ qalltäna, yatichäwinakapajj taqeniruw yanaptʼäna. Qhepatjja, waljaniruw ukham yatichatapajj yanaptʼäna. Jiwasarojj ukhamarakiw Jesusan yatichäwinakapajj yanaptʼistaspa. Jupajja kunanakatï jaqenakar paski, kunanakatï uñtʼatäki ukanakampiw yatichirïna. Ukaw Diosan arunakaparjam sarnaqañ munapki ukanakarojj sum amuytʼañatak yanaptʼäna. ¿Jesusajj kuna toqenakatsa yatichäna?

¿KHITINAKAS CHEQPACH KUSISITÄPJJE?

Taqeniw kusisitäñ muntanjja. Ukatwa Jesusajj cheqpach kusisiñat parlañ qalltäna. Ukjja jaqenakajj wal istʼañ munapjjpachäna. Ukampis yaqhep yatichäwinakap janiw sum amuyapkpachänti.

Jesusajj akham sänwa: “Kusisiñanïpjjew Diosat yatjjatañajj kunja wakiskirisa uk amuyasirinakajja, alajjpachankir Reinojj jupanakankiwa. Kusisiñanïpjjew wali llakitanakajja, jupanakaw chuymachatäpjjani. [...] Kusisiñanïpjjew cheqapar sarnaqapjjatap layku jan waltʼayañatak arknaqata uñjasirinakajja, alajjpachankir Reinojj jupanakankiwa. Kusisiñanïpjjtawa naya layku jiskʼachata, jan waltʼayañatak arknaqata, [...] uñjasipjjsta ukanakajja. [...] Jumanakajj kusisipjjam, wal kʼuchisipjjarakim” sasa (Mateo 5:3-12).

“Kusisiñanïpjjew” sasajja, ¿kamsañsa Jesusajj munäna? Jesusajj janiw mä rato kusistʼañata lartʼasiñata parlkänti. Jan ukasti cheqpach kusisiñata, chuymatpach kusisiñatwa parlaskäna, kunanaktï lurktan taqe ukanakat kusisit jakasiñatwa parlaskäna.

Diosat yatjjatañajj kunja wakiskirisa uk amuyirinakasa, juchanïpjjatap layku llakisirinakasa, Diosar uñtʼasajj juparuw servipjje, jupanakaw cheqpach kusisiñanïpjje sasaw Jesusajj säna. Diosan munañap lurapjjatap laykojj uñisitasa arknaqatasa uñjasipkchejja, kusisitäpjjewa. Jupanakajj Diosaruw kusisiyapjje, wiñay jakañwa katoqapjjarakini uk yatisaw kusisitäpjje.

Walja jaqenakajja qollqenïsasa, qamirïsasa, munañaparjam sarnaqasas cheqpach kusisitäpjjaspa ukhamwa amuyapjje. Ukampis Jesusajj janiw ukham siskänti. Antisas jupajj akham sänwa: “Qamirinaka, ¡ay kamachapkakïta! Jumanakajj taqe kunsa phoqatpach katoqjjapjjtajja. Aka tiempon sistʼasirinaka, ¡ay kamachapkakïta! Jumanakajj awtjayasipjjätawa. Aka tiempon larusirinaka, ¡ay kamachapkakïta! Jumanakajj llakisipjjätawa, jachapjjarakïtawa. Jumanakat taqe jaqenakajj sum parlapjjani ukhajja, ¡ay kamachapkakïta! Jupanakan nayra awkinakapajj ukhamarakiw falso profetanakat sum parlapjjäna” sasa (Lucas 6:24-26).

¿Kunatsa Jesusajj qamirinakarusa, lartʼasirinakarusa, jachʼañchayasirinakarusa “¡ay kamachapkakïta!” sispachäna? Maynitejj ukham jakaspa jan ukajj ukham jakasiñ munaspa ukhamarak taqe ukanakan cheqpach kusisiñ thaqaspa ukhajja, Diosatjja jitheqtaspawa, ukatwa Jesusajj ukham sispachäna. Ukampis Jesusajj janiw taqpach pobrenakasa jan ukajj manqʼat awtjatanakasa cheqpach kusisitäpkaspas ukham sañ munkänti. Jan ukasti ukhaman jakasirinakaw jilapartejj Jesusan yatichäwiparjam sarnaqapjje, jupanakarakiw cheqpach kusisit jakasipjje, uka toqetwa Jesusajj parlaskäna.

Jesusajj discipulonakapar akham sänwa: “Jumanakaw aka oraqen jayupäpjjtajja” sasa (Mateo 5:13). Jesusajja janiw discipulonakapajj cheqpach jayüpkaspas uk sañ munkänti. Jayojja jaya tiempo walïskañapataki, aguantañapatakiw yanaptʼi. Templo altar jakʼanjja, ofrendanakar uchañatakejj walja jayuw utjirïna. Jayojj ofrendan walïskatapa uñachtʼayañatakiw uchasirïna (Levítico 2:13; Ezequiel 43:23, 24). Ukhamajj ¿kunatsa Jesusajj ‘aka oraqen jayupäpjjtawa’ sasin discipulonakaparojj sispachäna? Discipulonakajja, Dios nayraqatan walïsipkañapatakiw jaqenakar yanaptʼapjjäna, mä arunjja Diosat jan jitheqtapjjañapataki, mandamiento arunakaparjam sarnaqapjjañapatakiw yanaptʼapjjäna. Cheqansa kuntï yatichapkäna ukajj istʼasirinakarojja jakasipkakiñapatakiw yanaptʼäna.

Jesusajj discipulonakapar akham sarakïnwa: “Jumanakaw akapachan qhanapäpjjtajja” sasa. Janiw khitis michachuwa naktayasajj mä canastampi kʼumpjjatkaspati, jan ukasti kawkirutï uchañäki uka patjjaruw uchasi, ukhamata utankirinakar qhantʼañapataki. Jesusajj saskakïnwa: “Qhananakam jaqenak nayraqatan qhantʼayapjjam, ukhamat jupanakajj suma luratanakam uñjasin alajjpachankir Awkimaru jachʼañchapjjañapataki” sasa (Mateo 5:14-16).

JESUSAN ARKIRINAKAPATAKI EWJJANAKA

Judío religionan pʼeqtʼirinakajja, Jesusarojj Diosan Leyip pʼakintiritwa uñjapjjäna, jiwayañwa amtapjjarakïna. Ukatwa Jesusajj qhan säna: “Jan amuyapjjamti, nayajj Ley chhaqtayirisa Profetanakan Qellqatanakap chhaqtayirisa jutkirista ukhamjja. Janiw nayajj ukanak chhaqtayir jutkti, jan ukasti phoqeriw jutta” sasa (Mateo 5:17).

Jesusajj Diosan Leyiparojj respetänwa, mayninakarus ukham uñjapjjañapatakiw chʼamañchäna. Jupajj sänwa: “Ukhamasti khititejj uka jiskʼa mandamientonakat mayaksa pʼakintani, yaqhanakarus ukarjam yatichani ukajja, alajjpachankir Reinonjja wali jiskʼa satäniwa” sasa. Jesusajja ukham jaqejj janiw Diosan Reinopar mantkaniti sañwa munäna. Ukatjja sarakïnwa: “Khititejj ukanak phoqani, ukarjam yatichani ukajja, alajjpachankir Reinonjja jachʼa satäniwa” sasa (Mateo 5:19).

Diosan Leyip pʼakintir jaqenakarojj Jesusajj juchañcharakïnwa. Jupajj Leyitwa akham sasin aytäna: “Janiw jaqe masimar jiwayätati” sasa. Ukatjja sarakïnwa: “Khititejj jilatapataki wali colerat sarnaqki ukajja, tribunalar apatäniwa” sasa (Mateo 5:21, 22). Maynitaki colerat sarnaqañajj janiw walïkiti, ukham sarnaqasajja jiwayañaruw pursna. Ukatwa Jesusajj kunatsa mayninakampi sumankthapiñatakejj wal chʼamachasiñasa uka toqet akham säna: “Jumatejj altarar mä ofrenda apkasina jilatamajj juma conträtap amtassta ukhajja, uka ofrendam altar nayraqatar jaytasin jilatamar thaqtir saram. Jupampi nayraqat sumankthapinim, kuttʼanisaw ofrendam loqtaskäta” sasa (Mateo 5:23, 24).

Adulterio jucha lurañajja Diosan Leyiparjamajj wali jachʼa juchawa. Jesusajj sänwa: “Jumanakajj istʼapjjaraktaw akham siri: ‘Janiw adulterio jucha lurätati’ sasa. Ukhamarus nayajj sapjjsmawa, khititejj mä warmir jan wali amtampi uñchʼukiskaki ukajja, niyaw uka warmimpejj chuymapan adulterio juch lurjje” sasa (Mateo 5:27, 28). Jesusajj janiw jan wali amuyunak mä ratu lupʼiñat parlkänti, jan ukasti maynir ‘jan wali amtampi uñchʼukiskakiñatwa’ parläna. Maynitï maynir uñchʼukiskakispa ukhajja, jan wali qʼañu amuyunakwa lupʼispa, ukatjja adulterio jucharuw purtʼasispa. ¿Kunas ukhamar jan purtʼasiñatak maynir yanaptʼaspa? Maynejj jankʼakiw jan wali amuyunak apanukuñapa. Jesusajj akham sänwa: “Ukhamasti kupi nayramatejj juchar puriyaskstamjja, apsusisin jayar jaqtam. [...] Kupi amparamatejj juchar puriyaskstamjja, khareqasisin jayar liwtam” sasa (Mateo 5:29, 30).

Yaqhep jaqenakajja, jakañap jan aptʼasiñatakejj usut amparapsa jan ukajj usut kayupsa qhareqayasipjjewa. Ukatwa Jesusajja kunanakatï juchar purtʼasiykistaspa ukanakajja, nayrar uñtatäskpas jan ukajj amparar uñtatäskpas apanukuñasawa sasin sispachäna. Ukhamatwa kunatï adulterio juchar purtʼasiykistaspa ukanak apanukuñäni. Jesusajj saskakïnwa: “Walïspawa mä amparaki aptʼasiñamajja, Gehenar cuerppach jaqontatäñat sipansa” sasa. (Jerusalén markanjja, anqäjjanwa basuranak phichantapjjerïna uka cheqaw Gehena sasin uñtʼatäna). Uka arojj wiñayatak jiwaña sañ muni.

Ukatjja chuym ustʼayapkistu ukanakarojj kunjamsa uñjañasa uka toqetwa Jesusajj yaticharakïna. Jupajj sänwa: “Jan wali jaqerojj jan kutkatasimti; antisas kupi ajanut tʼajjllintatajj maysa ajanumppach churam” sasa (Mateo 5:39). Ukhamasti familiasaru jan ukajj jiwasaru jan walinak lurapjjestani ukhajja, ¿janit jarkʼaqasiñasäkaspa? Jesusajj janiw uka toqet parlkänti. Jan ukasti kunatsa maynejj tʼajjllistaspa uka toqetwa parlaskäna. Maynejj chuyma ustʼayañatakikiw tʼajjllistaspa, janiw jiwayañ munasasa ni usuchjjañ munasas tʼajjllkistaspati. Ukhamasti maynitï nuwasiña jan ukajj jiskhisiñ munasin jiskʼachistani jan ukajj tʼajjllistani ukhajja, janiw ukhamat ukham kuttʼayañasäkiti.

Jesusan ewjjtʼapajj Diosan Leyiparjamänwa. Jupajj akham sasaw ewjjtʼäna: “Enemigonakamar munasiñampi uñjasipkakim, jan waltʼayañatak arknaqapktam ukanakatakis oración lurarapipjjarakim” sasa. Kunatsa ukham lurañasajj wakisi uka toqet Jesusajj akham sänwa: “Ukhamatwa jumanakajj alajjpachankir Awkiman wawanakapäpjjatam uñachtʼayapjjäta. Jupajj jan wali jaqetakisa suma jaqetakisa taqenitakiw intip jalsuyani” sasa (Mateo 5:44, 45).

Jesusajj uka toqet parlkasajj qheparojj akham sänwa: “Jumanakajj perfectöpjjañamawa, kunjamatejj alajjpachankiri Awkimajj perfectöki ukhama” sasa (Mateo 5:48). ¿Jesusajj perfecto jaqëpjjañamawa sañti munäna? Janiwa, jan ukasti Diosat yateqasisaw enemigonakamamppachar munasipjjañama sañwa munaskäna. Mä arunjja, “jumanakajj jaqe masimat khuyaptʼayasisipkakim, kunjamtï alajjpachankir Awkimajj khuyapayasirïki ukhama” sañwa munaskäna (Lucas 6:36).

ORACIÓN LURAÑAMPI DIOSAR CONFIYAÑAMPI

Jesusajj akham sasaw jaqenakar ewjjtʼarakïna: “Wal amuyasipjjam, janiw jaqenakamp uñjayasiñ laykukejj cheqapar sarnaqapjjañamäkiti” sasa. Jesusajj suma jaqer tukurinakarojj juchañchänwa, akham sarakïnwa: “Khuyapayasiñat khitir kun wajjtʼasas jan trompeta tuktʼasimti, kunjamtï kʼari chuyman jaqenakajj lurapki ukhama” sasa (Mateo 6:1, 2). Ukhamasti khuyapayasiñat maynir kuns churañäni ukhajja, janiw taqenin uñjkat churañasäkiti.

Ukatjja akham sarakïnwa: “Oración lurapjjäta ukhajja, jan kʼari chuymani jaqenakjam lurapjjamti; jupanakajj jaqenakampi uñjayasiñ laykukiw sinagoganakansa jachʼa thaki esquinanakansa mayisipjje. [...] Jumatejj oración lurañ munäta ukhajja, utamar mantam, punk llawkatasinim, ukat jamasankki uka alajjpachankir Awkimar mayisim” sasa (Mateo 6:5, 6). ¿Jesusajj janiw jaqenak nayraqatan oración lurañajj walïkiti sañti munäna? Janiwa, jupasa ukham orarakirïnwa. Antisas yaqhanakar musparayañ layku jan ukajj jachʼañchayasiñ layku orañaw jan walïkänti.

Jesusajj akham sasaw ewjjtʼarakïna: “Oración luräta ukhajja, jan pachpa arunakak kutin kutin arsumti, kunjamtï akapachankir jaqenakajj lurapki ukhamjja” sasa (Mateo 6:7). Uka arunakampejja, janiw kutin kutin mä toqet mayisiñajj janis walïkaspa ukham sañ munkänti, jan ukasti pʼeqer yatsuta “pachpa arunakak kutin kutin” mayisiñaw jan walïkänti. Ukatjja oración lurasajj kuna paqallqo toqenakatsa mayiñasa ukwa Jesusajj yaticharakïna. Nayraqatjja aka kimsa toqenakatwa mayisiñ yatichäna: 1) Diosan sutip jachʼañchasiñapataki, 2) Reinop jutañapataki, 3) munañap lurasiñapataki. Ukanakaw Diosajj aka oraqe apnaqañatakisa amtanakap phoqañatakis munañanïtap qhanstayi. Ukanak mayisakiw akham sasajj mayisiraksna: ‘Jichhürutak manqʼa churapjjeta, juchanaksa perdonapjjeta, janirak jan aguantañjam yantʼarus puriyapjjestati, Supayatsa salvapjjeta’ sasa.

Maysa toqetjja, ¿kunjamsa yänakasarusa cosasanakarus uñjañasäspa? Jesusajj akham ewjjtʼäna: “Jan jumanakajj kunatï valoranïki ukanak aka oraqen jukʼamp imkatapjjamti. Aka oraqenjja, thuthan thuthantata, saruntata ukhamaw tukusipjje jan ukajj lunthatanakaw mantasin qʼepsupjje” sasa. Uka arunakajj cheqäskapuniwa. Kunatï aka oraqen utjki ukanakajj tukusirikiwa, Dios nayraqatan sum uñjatäñatakisa janiw yanaptʼkistuti. Ukatwa Jesusajj akham sarakïna: “Kunatï valoranïki ukanak alajjpachar imkatapjjam” sasa. Jiwasatakejj Diosan munañap lurañaw nayrankañapa, ukhamatwa kunatï valoranïki uk alajjpacharus imkatksna ukhamäni. Dios nayraqatan suma uñjatäñsa jan ukajj wiñay jakañsa janiw khitis apaqkistaspati. Ukhamasti Jesusan aka arunakapajj cheqäskapuniwa, jupajj sänwa: “Kawkintï suma imatanakamajj utjki ukankarakiniw chuymamajja” sasa (Mateo 6:19-21).

Uk sum amuytʼañatakejja, Jesusajj mä uñachtʼäwimpiw qhanañchäna akham sasa: “Nayrajj cuerpon qhanapawa. Ukhamasti nayramatejj sumächi ukhajja, taqpach cuerpomaw qhantani; nayramatejj envidiasirïchi ukhajja, taqpach cuerpomaw chʼamakarakïni” sasa (Mateo 6:22, 23). Nayrasatï walikïskchi ukhajja, mä suma qhanar uñtataw sum irpistani. Ukhamäñapatakejja mä cheqarukiw uñtañasa, janitï ukhamäkaspa ukhajja, jakañarojj janiw kunjamtï uñjañasäki ukham uñj-jjsnati. Mä arunjja, Diosan Reinop nayrar uchañat sipansa akapachan wali qollqenïñ munaskañäni ukhajja, ‘taqpach cuerposaw chʼamakäni’, kunatï jan walïki ukanak lurañaruw purirakiñäni.

Ukatjja Jesusajj yaqha uñachtʼäwimpiw qhanañcharakïna, akham sasa: “Janiw khitis pä patronar esclavot sirvkaspati. Maynirojj uñisiniwa, maynirusti munasirakiniwa; maynirojj jakʼachasiniwa, maynirusti yaqhacharakiniwa. Janiw jumanakajj Diosampir Qollqempir esclavot servipkasmati” sasa (Mateo 6:24).

Uka arunak istʼasajja, kunjamsa kunatï jakañatak wakiski ukanakar uñjapjjañapäna uka toqetwa yaqhepajj llakisipjjäna. Ukatwa Jesusajj Diosarutï nayraqat servipjjäta ukhajja, janiw ukanakat llakisipjjañamäkiti sasin säna. Ukatsti sarakïnwa: “Jamachʼinakar sum uñtapjjam, jupanakajj janiw phawapkisa, ni yawipkisa, janirakiw manqʼsa imañanakar apthapipkiti. Jupanakarojj alajjpachankir Awkimaw manqʼayi” sasa (Mateo 6:26).

¿Uka qollun lirio panqaranakajj utjkäna ukanakat Jesusajj kamsänsa? “Janiw ni Salomonas wali qamirïkasajj uka panqaranakjam sum isthapiskänti” sasaw jupajj säna. Jesusajj saskakïnwa: “Uka alinakarojj Diosaw ukha sum isthapiyi. Jichhürojj sumaw alisipki, qharürusti hornor jaqontatäpjjaniwa. [...] ¿Janit jumanakarojj ukham isthapiyapkätamjja?” sasa (Mateo 6:29, 30). Ukatwa Jesusajj mä suma ewjjtʼa churäna, akham sasa: “Ukhamajja ‘¿kuns manqʼañäni?’, ‘¿kuns umañäni?’ jan ukajj ‘¿kunampis isisiñäni?’ sasajj janipun llakisipjjamti. [...] Taqe ukanakajj qhawqha wakiskiris jumanakatakejj ukjja alajjpachankir Awkimajj sum yati. Ukhamasti nayraqatajj Diosan Reinopa, kunatï Dios nayraqatan cheqapäki ukanak thaqasipkakim, Diosajj [kunatï wakiski uk] churapjjätamwa” sasa (Mateo 6:31-33).

¿KUNSA WIÑAY JAKAÑ KATOQAÑATAK LURSNA?

Apostolonakasa suma chuyman jaqenakasa Diosan munañaparjamaw jakañ munapjjäna, ukampis ukham jakañajj chʼamakïnwa. Uka tiemponjja, fariseonakat waljaniw jaqenakarojj juzgasin jiskʼachapjjerïna. Ukatwa Jesusajj akham ewjjtʼäna: “Jan khitirus juzgapjjamti, ukhamat jan juzgatäñataki, kunjamtï jumanakajj juzgapktajja, ukham juzgatäpjjätawa” sasa (Mateo 7:1, 2).

Fariseonakajj jaqenakar wal jiskʼachapjjäna, ukhamajj maynitï fariseonakan yatichäwipar arkaspäna ukhajj jan walinwa uñjasispäna. Jesusajj akham sänwa: “¿Mä juykhojj yaqha juykhur irpaspati? ¿Janit panpachanejj mä pʼiyar jalantapkaspa?” sasa. Ukhamajja, ¿kunjamsa jaqenakajj mayninakar uñjapjjañapäna? Janiw mayninakar jiskʼachapjjañapäkänti. Jesusajj saskakïnwa: “¿Kunjamaraki jilatamar sasmasti: ‘Jila, nayramankki uka jiskʼa paja apsüma’ sasasti, nayramankki uka jachʼa lawa jan uñjkasasti? ¡Kʼari chuyman jaqe! Nayraqatjja nayramankki uka jachʼa lawa apsusim, ukhamatwa jilataman nayrapankki uka jiskʼa paja apsuñatakejj sum uñjäta” sasa (Lucas 6:39-42).

Jesusajj ukham sasinjja, janiw discipulonakapajj janipunis juzgapjjañapäkäspa ukham sañ munkänti. Antisas mä kutejj akham sänwa: “Kunanakatï Diosankki ukanakjja jan anunakar churapjjamti, janiraki perlanakamsa khuchinakar warjjaruyapjjamti” sasa (Mateo 7:6). Diosan cheqa yatichäwinakapajj perlanakjam wali valoraniwa. Diosan cheqa yatichäwinakapar animalanakjam jiskʼachapki ukanakatjja, Jesusan discipulonakapajj jitheqtapjjañapänwa, ukat sipansa istʼasirinakaruw yatichapjjañapäna.

Oración toqet mayampi parlkasajja, kunatsa orañasapuni uka toqet akham sasaw Jesusajj säna: “Mayisipkakim, churatäpjjätawa” sasa. Diosajj oracionanakas istʼañatakejj listukiwa, Jesusajj uk qhanañchañatakejj akham säna: “¿Khitis jumanak taypitjja tʼantʼa mayitajj wawapar mä qala irjjaruyaspa? [...] Jumanakajj jucharar jaqëkasinsa, wawanakamar suma regalonak kunjam churañsa yatipjjtawa. Ukhamajj ¿janit alajjpachankir Awkimajj mayipki ukanakarojj ukham sumanak churkarakini?” sasa (Mateo 7:7-11).

Ukjjarusti Jesusajj yaqha yatichäwitwa parlarakïna, jupajj sänwa: “Ukhamasti taqe kunans kunjamtï jaqenakampi uñjatäñ munapktajja, ukhamaraki jumanakajj jupanakar uñjapjjam” sasa. Mayninakar sum uñjatakejj taqeniw chʼamachasiñasa. Ukampis ukajj chʼamakïspawa, ukatwa Jesusajj akham säna: “Kʼullkʼu punknam mantapjjam, jiwañar apir punkojj wali jachʼawa, thakipas anchorakiwa, waljanirakiw uknam mantasipki. Ukampis jakañar apir punkojj wali kʼullkʼuwa, thakipas kʼullkʼurakiwa, jukʼanikiw uka thaki jikjjatapjje” sasa (Mateo 7:12-14).

Jesusan discipulonakaparojja, wiñay jakañar apir thakitwa apaqañ munapjjaspa, ukatwa Jesusajj akham säna: “Falso profetanakat wal amuyasipjjam, jupanakajj ovejat isthapitaw jumanakan ukar jutapjje. Ukampis manqhatjja, manqʼat jiwat qamaqenakar uñtatäpjjewa” sasa (Mateo 7:15). Ukatjja suma arbolati janicha, ukajja achunakapanwa yatisi sasaw Jesusajj sarakïna. Jaqenakampejj niya ukhamarakiwa, kʼari profetanakarojj yatichäwinakapata luratanakapatwa uñtʼasiraki. Jesusan mä discipulopajja, janiw aru mayakejj discipulopätwa sañapäkiti jan ukasti luratanakapampiw cheqpach discipulötap uñachtʼayañapa. Waljaniw Jesusarojj Tatay Tatay sapjje ukampis janitï Diosan munañap lurapkani ukhajja, Jesusajj akham sasaw jupanakarojj sani: “¡Janipuniw jumanakar uñtʼapksmati! ¡Nayat jitheqtapjjeta, jan walinak lurir jaqenaka!” sasa (Mateo 7:23).

Jesusajj akham sasaw yatichañ tukuyäna: “Aka arunakaj istʼasin ukarjam phoqki ukajja, amuyasir jaqer uñtatawa, utapjja mä qarqa patjjarus utachkaspa ukhamawa. Kunapachatï jallojj wal purintki, umas wal sartaraki, thayas wali chʼamamp thaytʼaraki ukhajja, uka utajj wali jawqʼsutaw uñjasi. Qarqa patjjan utachatätap laykojja janiw allthaptkiti” sasa (Mateo 7:24, 25). ¿Kunatsa utajj jan allthaptkäna? Ut utachirejja, ‘oraq wali manqhakam allsusaw mä qarqa patjjar uta cimiento uskuntäna’ ukatwa jan allthaptkänti (Lucas 6:48). Ukhamajj janiw Jesusan arunakap aleqak istʼañasäkiti, jan ukasti ukarjam phoqañatakiw chʼamachasiñasa.

‘Khititï uka arunak istʼki ukat janirak phoqki’ uka jaqet ¿kamsnasa? Uka jaqejja, “jan amuytʼasir jaqer uñtatawa, utapjja chʼalla patjjarus utachkaspa ukhamawa” (Mateo 7:26). Kunapachatï jallus wal purinti, umas wal sartaraki, thayas wali chʼamamp thaytʼaraki ukhajja, uka utapajj qʼalaw allthaptjjaraki.

Jesusan yatichatap istʼasajj jaqenakajj wal musparapjjäna. Jupajj janiw religión pʼeqtʼirinakjam yatichkänti, jan ukasti mä jilïr jaqjamaw yatichäna. Jesusar istʼirinakatjja, waljaniw discipulopäjjapjjpachäna.