Awkimpejj mayakïkchisa, janiw Diosäkiti

Templojj Diosar katuyaskäna uka fiesta amtiriw Jesusajj Jerusalenar saräna. Niya patak maranak nayrajja, Antíoco Epífanes IV (cuarto) sirio reyiw templo katuntasïna, ukatjja templon altaraparojj yaqha altarwa lurayäna. Qhepatjja mä judío sacerdoten yoqanakapaw Jerusalén marka mayampi katjjapjjäna, ukatwa mayampi Diosar templo katuyapjjarakïna. Uka urut qalltasinwa sapa marajj 25 de kislev urun uka fiesta amtapjjerïna. Uka kislev phajjsejja noviembre tukuy urunakata diciembre qallta urunakkamaw jichhürunakan waktʼaspa.

Uka phajjsejj wali thayänwa, Jesusajj Salomonan Machonanakapa sat cheqan sarnaqaskäna. Judionakaw jupar muyuntasin akham sapjjäna: “¿Kunapachkamarak nanakar pächasiyapjjetätasti? Jumatejj Cristöstajja, qhanay sapjjeta” sasa (Juan 10:22-24). Jesusajj sänwa: “Nayajj sisjjapjjsmawa, jumanakajj janiw creyipktati” sasa. Jesusajja mä phuju jakʼan mä samaritanarojj ‘nayaw Cristötjja’ sasin säna, ukampis janiw Jerusalenankir uka judionakarojj ukham qhana arunakampi siskänti (Juan 4:25, 26). Jupanakarojj jupajj khitïnsa ukjja akham sasakiw qhanañchäna: “Cheqpachapuniw sapjjsma, janïr Abrahanajj naskäna ukhaw nayajj utj-jjayäta” sasa (Juan 8:58).

Jesusajja, jaqenakajj luratanakap uñjapjjaspa, ukarjam Mesiasätap creyipjjaspa ukwa munäna. Ukatwa Mesiasätap jan yatiyapjjañapatakejj discipulonakapar ewjjäna. Ukampis jichhajja, jupa contra saytʼiri judionakarojj akham sasaw qhana arunakampi säna: “Kunanaktï nayajj Awkijan sutipjjar luraskta ukanakaw nayjjat qhanañchi. Ukampis jumanakajj janiw [...] creyipktati” sasa (Juan 10:25, 26).

¿Kunatsa Jesusajj Cristötap jan creyipkäna? Jesusajj sänwa: “Jumanakajj janiw ovejanakajäpktati, ukatwa jan creyipktati. Ovejanakajasti aruj istʼapjjewa. Nayajj jupanakar uñtʼtwa, jupanakajj arkapjjarakituwa. Nayaw jupanakarojj wiñay jakañ churta, jupanakajj janipuniw kunapachas tukjatäpkaniti, janirakiw khitis uka ovejanakjja amparajat aparkitaniti. Kuntï Awkijajj nayar churkitu ukajja, taqe kunat sipansa wali valoraniwa” sasa. Ukatjja kunjamsa Awkipampi apasïna ukjja akham sasaw qhanañcharakïna: “Nayampi Awkimpejj mayakïpjjtwa” sasa (Juan 10:26-30). Jesusajj aka oraqenkaskänwa Awkipasti alajjpachankaskarakïnwa, ukhamajja janiw mä jaqekïpjjtwa sañ munkänti. Jan ukasti mä amtanikïpjjtwa, mayachtʼatäpjjtwa sañ munaskäna.

Jesusan arunakap istʼasajja, judionakajja wal colerasipjjäna, mä kutimpiw jiwayañatakejj qalanak irtasipjjäna. Jesusasti janiw ajjsarkänti, jupanakarojj sänwa: “Alajjpachankir Awkit jutir walja suma luräwinakwa nayajj uñachtʼayapjjsma. ¿Kawkïr luräwitsa jumanakajj kʼupjañ munapjjesta?” sasa. Judionakajj sapjjarakïnwa: “Janiw nanakajj suma luräwinakat kʼupjañ munapksmati, jan ukasti [...] Diosätwa sasaw parltajja” sasa (Juan 10:31-33). Jesusajj janipuniw Diosätwa sasin siskänti, ukhamajj ¿kunatsa ukham sapjjpachäna?

Jesusajj suma luräwinak lurañatakejj chʼamanïtwa sasaw säna, judionakatakejja Diosakiw ukham chʼamanïspäna. Amuytʼañataki, ovejanakatjja Jesusajj akham sänwa: “Nayaw jupanakarojj wiñay jakañ churta” sasa. Cheqas jaqejj janiw uk lurapkaspati (Juan 10:28). Ukampis Jesusarojja Diosaw chʼam churäna, ukwa Jesusajj jupanakar qhan säna, judionakasti janiw uk amuyapkänti.

Judionakan parlatapajj kʼarïtap qhanstayañatakejja Jesusajj sänwa: “¿Janit jumanakan Leyiman qellqatäki? [Salmo 82:6 qellqatan] Diosajj akham sänwa: ‘Nayajj sapjjsmawa: “Jumanakajj diosanakäpjjtawa”’ sasa. Diosajja arunakapan juchañchat jaqenakarojj ‘diosanakäpjjtawa’ sasaw säna. [...] Awkiw nayarojj santor tukuyitu, juparakiw akapachar khitanitu. ¿Nayajj Diosan Yoqapätwa sataj laykuti jumanakajj ‘Dios contraw jan wal parltajja’ sasin sapjjesta?” sasa (Juan 10:34-36).

Biblianjja pantjasiri juezanakarus ‘diosanakäpjjtawa’ sasaw qhanañchi. Ukhamasti ¿kunatsa uka judionakajj “Diosan Yoqapätwa” satap laykojj Jesusar juchañchapjjpachäna? Jesusajj amuytʼapjjañapatakejj akham sänwa: “Janitï nayajj Awkijan luräwinakap lurkstjja, jan creyipjjestati. Nayatï ukanak lurstjja, janisay nayar creyipkita, uka luratanakar creyipjjam. Ukhamatwa jumanakajj yatipjjäta, qhan amuyapjjarakïta, alajjpachankir Awkejj nayamp mayakiwa, nayas jupampejj mayakirakïtwa” sasa (Juan 10:37, 38).

Judionakajja Jesusar mayamp katuntañ yantʼapjjäna, ukampis jupajj jaltjjänwa. Jerusalenat sarjjasajja Jordán Jawir paskatasaw alayar sarjjäna, kawkintï Bautisir Juanajj pusi mara nayrajj bautisañ qalltkäna ukaru. Uka cheqajj Galilea Qotat aynach toqenkpachänwa.

Waljaniw jupan ukar jutapjjäna, sapjjarakïnwa: “Juanajj janiw mä señalsa lurkänti, ukampis taqe kunanaktï jupajj aka jaqet siskäna ukanakajj cheqäskapunitaynawa” sasa (Juan 10:41). Ukatwa walja judionakajj Jesusar creyipjjäna.