CAPÍTULO 1
Jehová Diosan munañap lurañatak organiztʼatätanwa
ORAQPACHANJJA walja organizacionanakaw religión toqensa, política toqensa, negocionak lurañ toqensa, jan ukajj yaqha ukhamanakansa utji. Uka organizacionanakajj janiw igualäpkiti, kunayman amtanakanïpjjarakiwa. Ukampis ukanakat sipansa yaqha suma organizacionaw utji, kunanaktï uka organizacionajj lurki ukajj Bibliarjamapuniwa. Jupanakajj Jehová Diosan Testigonakapawa.
2 Jehová Diosan organizacionap taypinkatamajj wali kusiskañawa. Diosan munañapajj kunasa uk yateqasajja ukarjamaw jumajj lurasktajja (Sal. 143:10; Rom. 12:2). Diosan serviripjamajja, walja jilat kullakanakampiw oraqpachan servisktajja (2 Cor. 6:4; 1 Ped. 2:17; 5:9). Kunjamtï Bibliajj siski ukarjamas Jehová Diosan bendicionanakapwa katoqtajja, wali kusisitarakïtawa (Prov. 10:22; Mar. 10:30). Ukatjja Diosan munañap lurasajj jutïrin wiñay jakañatakiw wakichtʼasisktajja (1 Tim. 6:18, 19; 1 Juan 2:17).
3 Taqe kun Lurir Jehová Diosajj oraqpachan mä suma organizacionaniwa, jupa pachpaw apnaqaraki. Kuna laykutejj jupaw jiwasan Juezasasa, Leyinak Churirisasa, Reyisasa. Juparuw taqe chuyma confiytanjja (Is. 33:22). Ukatjja Jehová Diosajj taqe kunsa suma organiztʼat lurir Diosawa, ukatwa jupamp chik trabajiñasatakejj taqe kuns sum organiztʼawayi (2 Cor. 6:1, 2).
4 Aka jan wali tiempon tukusiñapajj wali jakʼankjjewa, ukatwa Diosan uttʼayat Jesús Reyisar arkañatak wal chʼamachasiñasa (Is. 55:4; Apoc. 6:2; 11:15). Jesusajja arkirinakajajj ‘jukʼamp jachʼa luräwinakwa lurapjjani’ sasaw säna (Juan 14:12). Ukajj ukhamapuniw phoqasiwayi, arkirinakapajj nayratpachaw jukʼamp lugaranakan walja jaqenakar predicawayapjje. Cheqansa Reinon suma yatiyäwinakapajj taqe aka oraqpachanwa yatiyasiski (Mat. 24:14; 28:19, 20; Hech. 1:8).
5 Diosan Reinopat oraqpachanwa yatiyasiski, ukampis janiw wiñayapunejj predicaskaniti. Kunjamtï Jesusajj siskänjja, Jehová Diosajj ‘ukhakamak predikjjapjjam’ sasin siskani ukhakamakiw predicasini. Biblian profecianakaparjamajja “Jehová Diosan wali musparkañ jachʼa urupajj” wali jakʼankjjewa (Joel 2:31; Sof. 1:14-18; 2:2, 3; 1 Ped. 4:7).
Jehová Diosan munañap phoqañatakiw jukʼamp chʼamachasiñasa. Ukampis uk sum phoqañatakejj Diosan organizacionapajj kunjamasa ukwa nayraqatajj yatjjatañasa.
6 Jichha tiempotakejj kunas Jehová Diosan munañapajja uk yatisajja, jukʼampiw uk phoqañatakejj chʼamachasiñasa. Ukampis uk sum phoqañatakejj Diosan organizacionapajj kunjamasa ukwa nayraqatajj yatjjatañasa, ukatjja taqe chuymaw yanaptʼañasaraki. Uka organizacionanjja, Biblian wiñay yatichäwinakaparjamaw (principios bíblicos) taqe kunas lurasi, Diosan mandamientonakaparjamasa, leyinakaparjamasa, ordenanakaparjamas lurasirakiwa (Sal. 19:7-9).
7 Kunapachatï Diosan servirinakapajj Biblian yatichäwinakapar istʼtan ukhajja, sumankañaw utji, mayachtʼatarakïtanwa (Sal. 133:1; Is. 60:17; Rom. 14:19). Oraqpachankir jilat kullakanakamp sum apasiñatakejj munasiñaw yanaptʼistu. Taqe kunsa munasiñatwa lurtanjja, mayninakarus munasiñampiw uñjaraktanjja (Juan 13:34, 35; Col. 3:14). Jehová Diosan yanaptʼapampiw wali mayachtʼatätanjja. Ukham mayachtʼatätasatwa Diosan organizacionapat mä partejj alajjpachankki ukanakat yateqasisajj Diosar sirvtanjja.
DIOSAN ORGANIZACIONAPAT MÄ PARTEJJ ALAJJPACHANKKI UKAJJ KUNJAMASA
8 Isaías, Ezequiel, Daniel profetanakajja, Diosan organizacionapat mä partejj alajjpachankki ukwa visionanak toqejj uñjapjjäna (Is., cap. 6; Ezeq., cap. 1; Dan. 7:9, 10). Apóstol Juanajj niya uka pachpa visión uñjarakïna, Apocalipsis libron qellqawayki ukaw Diosan organizacionapajj kunjamasa uk amuyañatak yanaptʼistu. Apóstol Juanajja Jehová Diosarojj mä tronon qontʼatwa uñjäna, angelanakajj jupar akham sapjjarakïnwa: “Khititejj jakaski, nayras jakaskarakïna, jichhas jutaskaraki uka Taqe Chʼamani Jehová Diosajja, santo, santo, santo Diosawa” sasa (Apoc. 4:8). Ukat ‘trono taypin’ “mä corderoruw” uñjarakïna, mä arunjja Diosan Corderopäki uka Jesusaruw uñjäna (Apoc. 5:6, 13, 14; Juan 1:29).
9 Uka visionan Jehová Diosar mä tronon qontʼat uñjasitapajja, jupa pachpa alajjpachan organizacionapar Pʼeqtʼatapwa uñachtʼayistu. Diosatsa, jupajj qhawqha autoridadanisa uka toqetsa Bibliajj akham siwa: “Jehová Dios Tata, taqe kunanakatï alajjpachansa aka oraqens utjki ukanakajj jumankiwa, ukatwa jumajj jachʼätajja, chʼamanïtasa, sutimas wali sumawa, kʼajkir qhanätawa, musparkañarakïtawa. Jehová Dios Tata, jumankiw reinojja. Jumaw taqe kunjjar mä pʼeqtʼirjamajj jachʼañchatätajja. Kunanakatï wali valoranïki ukanakasa jachʼañchatäñasa jumankiwa, jumarakiw taqe kunjjar apnaqtajja, wali chʼamanirakïtawa, juman amparamaw maynirojj jachʼar tukuyaspa, taqenirus chʼam churarakispa” sasa (1 Crón. 29:11, 12).
10 Jehová Diosan yanapiripjamajja, Jesusajj alajjpachan wali autoridadanirakiwa. Jupajj Jehová Diosatwa autoridad katoqe. Cheqansa Diosaw “taqe kunsa Criston kayunakapar katuyäna, juparakiw congregacionan taqe kunjjar pʼeqtʼañapatakis uttʼayäna” (Efes. 1:22). Apóstol Pablojj Jesusat akham sänwa: “Diosajj jukʼamp jilankki uka puesto churäna, munasiñatwa taqe sutinakat sipansa jukʼamp suma suti churäna, ukhamat alajjpachankirinakasa, oraqenkirinakasa, oraq manqhankirinakasa, taqeni Jesusan sutipjjar qonqortʼasipjjañapataki, taqenisa Jesucristojj Tatitütap qhan reconosipjjañapataki, ukhamat Dios Awkir jachʼañchasiñapataki” sasa (Filip. 2:9-11). Ukhamasti Jesusarojj taqe chuymaw confiysna, jupajj cheqaparuw irpistani.
11 Mä visionanjja, Daniel profetajj Nayra Tiempotpach Jakir Awkïki uka Jachʼa Diosaruw tronopan qontʼat uñjäna. Ukatjja ‘waranqa waranqa, millón millón’ angelanakaruw uñjarakïna, jupanakajj Dios nayraqatankasipkänwa (Dan. 7:10). Bibliarjamajja, uka angelanakajj ‘Diosar servir espiritunakäpjjewa, salvación katoqerinakar yanaptʼañatak khitanitäpjjarakiwa’ (Heb. 1:14). Ukatsti uka angelanakajj trononakaru, munañaninakaru, gobiernonakaru, autoridadanakar jaljatäpjjewa sasaw Bibliajj qhanañchi (Col. 1:16).
12 Diosan organizacionapat mä partejj alajjpachankki uka toqet lupʼtan ukhajja, Isaías profetajj kunjamas jikjjatasïna uk sumwa amuytanjja. Jupajj Jehová Diosaruw “jachʼa ukhamarak alto tronon qontʼat” uñjäna, ‘jupa muytpachanjja serafín angelanakaruw’ uñjarakïna. Ukatwa jupajj akham säna: “¡Ay nayat kunakïkani! ¡Jichhajj cheqpachapuniw jiwäjja, kuna laykutejj nayajj jucharar jaqëtwa, kunatï jan qʼomäki ukwa parlarakta, kunatï jan qʼomäki uk parlir marka taypinwa jakarakta, nayranakajajj Reyiruw uñjapjje, ejercitonakan pachpa Jehová Diosaparuw uñjapjje!” sasa. Isaiasarojja, uka visión uñjañaw Diosan organizacionapajj kunja jachʼasa uk amuyañatak yanaptʼäna, jukʼamp humildëñapatakis yanaptʼarakïnwa. Jehová Diosajj juchañchir arunak yatiyañap mayïna ukhajja, Isaiasajj jankʼakiw akham säna: “¡Nayajj akankasktwa! ¡Nayar khitita!” sasa (Is. 6:1-5, 8).
13 Jiwasampejj ukaw pasaraki. Jehová Diosan organizacionapar uñtʼasajja, wali kusisitaw jikjjatastanjja, yuspärañwa munaraktanjja. Ukatwa Diosan organizacionapamp sarañatak chʼamachastanjja, taqe chuymaw uka organizacionar confiyaraktanjja.
JEHOVÁ DIOSAN ORGANIZACIONAPAJJ NAYRARUW SARTI
14 Ezequiel 1 capitulonjja, Jehová Diosajj alajjpachankir mä jachʼa carro apaskatapaw qhanañchasi. Uka carrojja jan uñjaski uka Diosan organizacionapamp sasiwa. Jehová Diosaw uka organizacionarojj munasiñamp pʼeqtʼaski, uka organización toqew amtanakapsa phoqaskaraki (Sal. 103:20).
15 Ezequielajj visionan uñjkäna uka carron ruedanakap manqhanjja yaqha ruedanakaw utjäna, ukhamatwa mayachtʼat uka ruedanakajj cruzjasitäpjjäna. Ukham luratätapatwa uka carrojj “pusi toqenakar” saraspäna (Ezeq. 1:17). Uka ruedanakajj mä chʼipjjtanakwa maysar kutjtawayaspa, ukampis janiw aleq ukhamakejj sarkaspati. Jehová Diosaw organizacionapar pʼeqtʼi, janiw munañaparjamakejj kawkirutï sarañ munki uksar sarkaspati. Jan ukasti kunjamtï Ezequiel 1:20 textojj siskejja, “kawki cheqarutï espiritojj” irpañ munki uksaruw sari, mä arunjja Jehová Diosaw organizacionapajj kawkirus sarañapa uk amti. Ukatwa akham sasin jisktʼasiñasa: “¿Kawksarutï Jehová Diosajj sarañas munki uksarut nayajj sarasktjja? ¿Diosan organizacionap chikarakit sarasktjja?” sasa.
16 Jehová Diosan markapamp chik sarañatakejja, janiw tantachäwinakaru ukat predikir sarañ mayakejj wakiskiti, jan ukasti Diosar serviñan nayrar sartaskañasakiwa. Ukatwa “kunanakatejj jukʼamp importantëki” ukanak lurañatak chʼamachasiñasa, Diosar serviskakiñatakejj kuna yanaptʼanakatï qellqatanakatsa videonakatsa utjki ukanak jankʼakiw liytʼañasa, uñtañasaraki (Filip. 1:10; 4:8, 9; Juan 17:3). Diosan munañap lurañatakejja, kunanaktï jupajj churkistu ukanak sum apnaqañasawa, mä arunjja, yänakasasa, suma chuymanïtasasa, mä kun sum lurtʼañ yatitasas Diosar jachʼañchañatakïñapawa. Diosan organizacionaparojj yanaptʼañasapuniwa, taqenitï lurañanakas sum phoqañäni yanaptʼasirakiñäni ukhajja, taqe kunas sumaruw sarani. Maysa toqetjja, Diosan carropamp sarkasajj kuntï jaqenakar predicktan ukarjamaw sarnaqañasaraki.
17 Organizacionapan yanaptʼapampiw Jehová Diosan munañap lurasktanjja. Jupaw alajjpachankir carro apaski. Kunapachatï uka carromp chik sartan ukhajja, jiwasan Qarqasäki uka Jehová Diosar confiyataswa uñachtʼaytanjja, juparojj wal respetaraktanjja (Sal. 18:31). Bibliajj akham siwa: “Jehová Diosaw markaparojj chʼam churani. Jehová Diosaw markaparojj sumankañamp bendisini” sasa (Sal. 29:11). Niyakejjay Jehová Diosan organizacionap taypinkstanjja, kuntï uka texton siski uka arunak phoqasir sum uñjtanjja. Jiwasatï Diosan munañap lurañäni ukhajja, walja bendicionanakwa katoqañäni.