Diosan organizacionapanjja Jesucristojj autoridadaniwa

“QALLTANJJA Diosaw alajjpachsa oraqsa luräna”, “ukanakasti wali sumapunïnwa” (Gén. 1:1, 31). Jehová Diosajj mä suma amtampiw jaqenakarojj lurawayi. Ukampis Edén jardinan Diosar jan istʼapjjatapatwa jaqenakajj jan walin uñjastanjja, janiw kusisitäkaraktanti. Ukhamäkchisa Diosan amtapajj aka oraqetakisa jaqenakatakis pachpakïskiwa. Diosajja, Adanat jutir jaqenakat khitinakatï istʼasirïpki ukanakajj librëjjapjjaniwa, mä sapa religionakiw utj-jjani, Supayasa jupan apnaqat aka jan wali pachas tukusjjaniwa sasaw säna (Gén. 3:15). Qalltan kunjamtï aka oraqejj ‘wali sumäkänjja’, jutïrin ukhamäjjarakiniwa. Ukatwa uka amtap phoqañatakejj Jehová Diosajj Jesús Yoqapar ajlliwayi (1 Juan 3:8). Ukhamasti kuna autoridadtï Jehová Diosajj Jesucristor churawayki uk sumwa amuyañasa (Hech. 4:12; Filip. 2:9, 11).

¿JESUSAJJ KUNA LURÄWINISA?

² Jesusajj Diosan organizacionapan kunayman luräwinakampiw phoqe, jupajj jaqenakar salviriwa, Jachʼa Jilïr Sacerdotewa, congregación Pʼeqtʼiriwa, Diosan Reinopan Reyïñatak ajllitarakiwa. Ukanakat lupʼiñajja, kuntï Jehová Diosajj jiwas layku lurawayki ukat yuspärañataki ukhamarak Jesusar jukʼamp munasiñatakiw yanaptʼistu. Kunjamsa Jesusajj uka luräwinakamp phoqe uk jichhajj yatjjatañäni.

³ Jesusajj jaqenakar salviriwa. Jupajj jakañ vidapwa churawayi, “ukhamat waljanir juchat kutsuyañataki” (Mat. 20:28). Jesusajj aka oraqen predickäna ukhajja, kunjamsa suma chuyman jaqenakajj jupa toqe Diosamp sumankthapipjjaspa ukaw qhanstawayi (Juan 14:6). Jesusajj janiw yateqaskay suma chuyman jaqekïkänti, jan ukasti Jehová Diosan amtap phoqasiñapatakejj jupajj wali importantewa. Jupakiw Diosamp sumankañasatakejj yanaptʼistaspa (Hech. 5:31; 2 Cor. 5:18, 19). Jesusan jiwatap laykusa jaktatap laykusa, Diosar istʼirinakajj jutïrin walja bendicionanakwa Reinop toqejj katoqañäni.

⁴ Jesusajj Jachʼa Jilïr Sacerdotewa. Jupajj arkirinakaparuw Jehová Diosamp sumankthapipjjañapatak yanaptʼi, juchanakapsa qʼomacharakiwa. Uka toqet apóstol Pablojj akham sänwa: “Jiwasanjja pantjasitanakasat khuyaptʼayasiri mä jachʼa jilïr sacerdotew utjistu, jupajj jiwasjamarakiw taqe kunan yantʼat uñjasïna, ukampis janiw juchar purkänti” sasa. Ukatjja Pablojj Jesusar confiyapki ukanakarojj Diosamp sumankthapipjjañapatakiw ewjjtʼäna, jupajj akham sänwa: “Wali khuyaptʼayasir Diosan tronopar jakʼachasipjjañäni, jan ajjsartʼas qhana arunakampi mayisipjjarakiñäni, ukhamat wali khuyaptʼayasirïtapatsa wali munasirïtapatsa horasapar jiwasar yanaptʼañapataki” sasa (Heb. 4:14-16; 1 Juan 2:2).

⁵ Jesusajj congregación Pʼeqtʼiriwa. Ukatwa cristianonakajj mä jaqen pʼeqtʼatäñ jan suyktanti. Jesusajja espíritu santo toqe ukat ‘Diosan congregacionapar’ uñjapki uka chachanak toqew Diosan markapar irpaski. Uka chachanakajj Diosampiru Jesusampiruw cuenta churapjjani (1 Ped. 5:2, 3; Heb. 13:17). Jehová Diosajj Jesusat akham sänwa: “Markanakatakejj mä testigoruw juparojj tukuyta, markanakatakejj mä pʼeqtʼiriru, mä gobernanteruw tukuyarakta” sasa (Is. 55:4). Ukatwa Jesusajj discipulonakapar akham sispachäna: “Janiraki ‘pʼeqtʼirinaka’ sayasipjjamti, maynikiw jumanakan Pʼeqtʼirimajja, jupasti Cristowa” sasa (Mat. 23:10).

⁶ Jesusajj walpun yanaptʼañ munistu, ukatwa mä kutejj jupajj akham säna: “Nayan ukar jutapjjam, taqe qarjatanaka, jatjatanaka, nayaw jumanakar samartʼayapjjäma. Nayan yukuj jumanakjjar apapjjam, nayat yateqasipjjarakita. Nayajj llampʼu chuymanïtwa, humilde chuymanirakïtwa, ukatsti jumanakatakejj samarañsa jikjjatapjjätawa. Nayan yukuj apañajj facilakiwa, qʼepijas phisnakirakiwa” sasa (Mat. 11:28-30). Jesusajja Awkipjam suma awatirïtapwa uñachtʼayawayi. Jupajj wali munasiñampiw cristiano congregacionarojj pʼeqtʼi, uka congregación taypinkapki ukanakajj wali kusisitaw jikjjatasipjjaraki (Is. 40:11; Juan 10:11).

⁷ Kuna luräwsa Diosajj Jesusar churawayaraki ukajja, 1 Corintios libronwa qhansti. Ukanjja Pablojj jilat kullakanakar akham sänwa: “Cristojj reyjam apnaqañapawa, Diosajj taqe enemigonakaparu kayunakapampi takjjataykani ukapachkama. [...] Diosajj taqe kunsa Yoqapar katuyjjani ukhajja, Yoqajja taqe kun katuyir Awkiparuw katuyasjjarakini, ukhamat Diosajj taqeniru apnaqjjañapataki” sasa (1 Cor. 15:25, 28). Ak amtañäni, Diosajj Jesusaruw nayraqat lurawayi, ukatjja kunanakatï jichhajj utjki ukanak lurañan Jesusaw Diosar yanaptʼawayaraki (Prov. 8:22-31). Aka oraqenkkäna ukhajja, Jesusajj Awkipan munañap lurañatakiw wal chʼamachasïna, jiwañkamajj janipuniw Awkipat jitheqtkänti (Juan 4:34; 15:10). Ukatwa Diosajj jupar jaktayäna, Jupan Reinopan Reyjam apnaqañapatakis autoridadwa churarakïna (Hech. 2:32-36). Jehová Diosajj mä wakiskir luräwi Jesusar churawayaraki. Akat mä jukʼatjja, wali chʼamani angelanakaruw Jesusajj pʼeqtʼani, jupanakaw akapachankir gobiernonakar tukjapjjani, jan walinaksa chhaqtayapjjani (Prov. 2:21, 22; 2 Tes. 1:6-9; Apoc. 19:11-21; 20:1-3). Ukatjja Diosan Reinopakiw utj-jjani, uka Reinon apnaqeripajj Jesusawa (Apoc. 11:15).

JESUSAR RESPETOMP UÑJAPJJAÑÄNI

⁸ Taqe jiwasanakaw Jesusat yateqassna. Jehová Diosajj Jesusaruw jiwasar sum uñjañapatak jaytawayi. Jesusajj wali munasiñampiw arkirinakapar uñji, ukham uñjatäñatakejj janipuniw Diosat jitheqtañasäkiti, organizacionapamp chikaw sarañasaraki.

⁹ Nayrïr patak maranakan jakir cristianonakajja, Jesusarojj wali respetompiw uñjapjjäna. Ukatwa jupanakajj mayachtʼat trabajipjjäna, kun lurapjjañaptï Jesusajj maykäna ukarus istʼapjjarakïnwa (Hech. 15:12-21). Ajllit cristianonakajj kunja mayachtʼatäpjjänsa uka toqet Pablojj akham sänwa: “Cheqäki uk parlapjjañäni, munasirïpjjañäni, ukhamatwa Cristor uñtasitäñataki taqe kunansa jiltapjjañäni, jupaw jiwasan pʼeqesajja. Jupïpanwa cuerpon taqpach partenakapajj suma mayachtʼatajja, jupïpanrakwa kunanaktï cuerpojj munki ukarjam maynit maynikam yanaptʼasipjje. Kunapachatï cuerpon sapa partenakapajj lurañanakap phoqapki ukhajja, cuerporuw jiltañatak yanaptʼapjje, ukhamatwa taqpach cuerpojj munasiñan suma saytʼatarakejja” sasa (Efes. 4:15, 16).

¹⁰ Congregacionan jiltañapatakejj taqeniw yanaptʼasiñasa, Jesusarus istʼañasaraki. Ukhamatwa munasiñajj congregación taypin utjani, uka “munasiñajja jaqenakarojj wali sum mayachthapi” (Juan 10:16; Col. 3:14; 1 Cor. 12:14-26).

¹¹ Khä 1914 maranwa Jesusajj Diosan Reinopan Reyipat uttʼayasiwayi, uka marat aksaruw Biblian profecianakaparjamajj kunayman jan walinakajj pasaski. Jichhürunakanjja Jesusajj enemigonakap taypinwa Reyjam apnaqaski (Sal. 2:1-12; 110:1, 2). Ukampis niyaw Jesusajj enemigonakapar tukjasajj reyinakansa Reyipätapa, munañaninakansa Tatitupätap uñachtʼayani (Apoc. 11:15; 12:10; 19:16). Ukhamatwa Jehová Diosajj Edén jardinan arskäna uka amtap phoqani, Jesusan kupëjjapankapki jupamp sumat uñjatäpkaraki ukanakarus salvarakiniwa (Mat. 25:34). Jesusamp pʼeqtʼatäsajj wali kusisitätanwa. Ukhamasti Jesusan pʼeqtʼatajj kuntï lurañasäki uk taqe chuym phoqasipkakiñäni.