“Jumanak taypin irpirïpki ukanakat amtasipjjam”

APÓSTOL PABLOJJA khitinakatï irpasipktam ukanakat amtasipjjam sasaw säna (Heb. 13:7). Khä 33 maran Pentecostés urunjja, mä arun cristiano congregacionajj uttʼayaskäna ukhajja, Jesucriston apostolonakapaw congregacionar pʼeqtʼapjjäna. Jupanakajj cuerpo gobernante taypinkirïpjjänwa, jupanakarakiw Diosan markapar irpapjjäna instruccionanaksa churapjjäna (Hech. 6:2-4). 49 maran circuncisión toqet jan waltʼayasiñanakajj utjkäna ukhajja, Jerusalén markan cuerpo gobernantenkir apostolonakampi ancianonakampiw utjäna (Hech. 15:1, 2). Jupanakaw kuna jan walinakatï utjkäna ukanaksa circuncisión toqet jan waltʼayasiñanaksa askichapjjäna. Ukatjja congregacionanakar chʼamañchtʼañatakejj cartanakampi instruccionanakampi apayapjjäna, ukhamatwa discipulonakarojj mayachtʼatäpjjañapatak yanaptʼapjjäna. Congregacionankirinakajj cuerpo gobernanten instruccionanakaparojj taqe chuymaw istʼapjjäna. Ukham lurapjjatapatwa Jehová Diosan bendicionapampejj jiltasipkakïna (Hech. 8:1, 14, 15; 15:22-31; 16:4, 5; Heb. 13:17).

² Apostolonakajj jiwjjapjjäna uka qhepatjja, Pablon arunakaparjamajj Dios contra saytʼañanakaw (apostasía) congregación taypin uñstäna (2 Tes. 2:3-12). Uka toqet parlkasajj trigo (ajllit cristianonaka) yapurojj jan wali qorampiw (falso cristianonaka) phawantasini sasaw Jesusajj säna. Uka pä gruponakajja, ‘akapachan tukusiñapkamaw’ junto jilapjjañapäna (Mat. 13:24-30, 36-43). Ukampis janïr cosecha tiempo purinkipanjja, ajllit cristianonak utjkipansa Jesusajj janiw mä cuerpo gobernante toqejj arkirinakapar pʼeqtʼkänti (Mat. 28:20). Ukampis cosecha tiemponjja ukajj mayjtʼañapänwa. ¿Kunjamatsa uk yattanjja?

³ Maysa toqetjja, Jesusajj “akapachajj niya tukusiñampïskani” ukhajj ‘suma phoqeri amuyasir esclavow’ utjani sasaw säna (Mat. 24:3, 42-47). Uka esclavow Diosan markaparojj “tiempopar” yanaptʼanak churañapäna, uka esclavojj janiw mä chachakïñapäkänti. Nayrïr patak maranakanjja, Jesusajj janiw mä chacha toqekejj cristiano congregacionar pʼeqtʼkänti, jan ukasti mä grupo chachanak toqew pʼeqtʼäna. Jichhürunakan ukaw pasaraki, Jesusajj mä grupo chachanakaruw congregacionar pʼeqtʼapjjañapatak uttʼayawayi.

“¿KHITIS SUMA PHOQERI AMUYASIR ESCLAVOJJA?”

⁴ ¿Khitinakas uka grupo taypinkapjje? Ajllit cristianonakaw uka taypinkapjje, Jesusajj jupanak toqew arkirinakaparojj Diosar servisipkakiñapatak yanaptʼanak churi. Bibliarjamajja uka grupojj ‘sacerdotenakjam servir reyinakawa’, Diosarakiw jupan ‘khuyapayasiñapat taqe cheqan yatiyapjjañapatak’ mä luräwi churi (1 Ped. 2:9; Mal. 2:7; Apoc. 12:17). Ukampis janiw taqe ajllitanakajj ‘suma phoqeri amuyasir esclavo’ taypinkapkiti. Aka toqet amuytʼañäni, kunapachatï Jesusajj 5.000 chachanakampiru, walja warminakampiru, walja wawanakampir manqʼa churkäna ukhajja, jupajj discipulonakaparuw jaqenakar manqʼa lakirapjjañapatak encargäna (Mat. 14:19). Uka tiemponjja, Jesusajj mä qhawqha discipulonakap toqew waljanir manqʼa churäna. Jichha tiemponjja mä qhawqha arkirinakap toqerakiw Diosar serviskakiñasatakejj yanaptʼanak churistu.

⁵ Ukhamajja ‘suma phoqeri, amuyasiri mayordomo’ taypinjja, alajjpachar sarañatak ajllitäpki ukanakat mä qhawqha cristiano jilat kullakanakakiw ukankapjje, jupanakaw jichha tiempon Jehová Diosan markapar yanaptʼanak churasipki (Luc. 12:42). Aka “qhepa urunakanjja”, uka cristianonakajj central mundial ukanwa trabajipjje, mä arunjja Jehová Diosan Testigonakapar pʼeqtʼapki uk Cuerpo Gobernante taypinkirïpjjewa.

⁶ Jesusajj uka Cuerpo Gobernante taypiw Biblian profecianakap sum amuyañasatakejj yanaptʼistu, Biblian wiñay yatichäwinakaparjam (principios bíblicos) sarnaqañatakis yanaptʼarakistuwa. Ukatjja Jehová Diosan Testigonakapan utjki uka congregacionanak taypiw Diosar serviskakiñatak yanaptʼanak churarakistu (Is. 43:10; Gál. 6:16). Bibliajj qellqaskäna uka tiemponjja, mayordomojj patronapan utapankirinakaruw sum uñjäna. Jichha tiemponjja ukhamarakiw ‘suma phoqeri amuyasir esclavojj’ Diosan servirinakapar sum uñji, mä arunjja uka esclavow predicación pʼeqtʼi, Bibliat apstʼat qellqatanaksa lurayi. Maysa toqetjja asambleanakatak programwa wakichtʼi, ukatjja kunayman luräwinakamp phoqapjjañapatakiw jilatanakar uttʼayi. Janiw ukakïkiti, Diosan markapan utjki uka qollqsa, yänaksa, Diosar adorañatak utanaksa sumwa uñjaraki. Taqe ukanakajja ‘utapan servirinakaparojj’ walpun yanaptʼi (Mat. 24:45).

⁷ ¿‘Utapan servirinakajj’ khitinakäpjjesa? Taqe khitinakatï Diosar serviskakiñatakejj yanaptʼa katoqapki ukanakawa. Qhep qhepa urunakajj qalltkäna ukhajja, ‘utapan servirinakapajj’ alajjpachar sarañatak ajllitanakakïpjjänwa. Qhepatjja ‘yaqha ovejanakjam’ uñtʼatäpki ukanakaw uka taypinkjjapjjarakïna (Juan 10:16).

⁸ Jachʼa tʼaqesiñ tiemponjja, mä arun Jesusajj juzgañataki tʼunjañatak aka mundor jutkani ukhajja, “taqe utjirinakapjjaruw uka esclavor uttʼayani” (Mat. 24:46, 47). Khitinakatï suma phoqeri esclavo taypinkapki ukanakajj alajjpachar sarjjapjjani ukhaw premio katoqapjjani, ukanjja Jesusamp chika ukhamarak 144.000 ajllitanakamp chikaw reyjam apnaqanipjjani. Uka tiemponjja suma phoqeri amuyasiri esclavojj janiw aka oraqen utj-jjaniti; Jehová Diosampi Jesusampejja ‘principenakwa’ ukhajj uttʼayapjjani, jupanakaw Jesusajj waranqa maranak apnaqkani ukhajj aka oraqenkirinakar uñjapjjani (Sal. 45:16).

¿KUNATSA IRPAPKISTU UKANAKAT AMTASIPJJAÑASA?

⁹ Jupanakat amtasitasa ukat jupanakar confiyatas uñachtʼayañatakejj walja razonanakaw utji. Uka razonanakat mayajj Hebreos 13:17 textonkiwa, ukan apóstol Pablojj akham sänwa: “Jupanakajj jumanakaruw cuidasipktamjja, uka luräwipatjja Diosaruw cuenta churapjjarakini. Ukhamat uka luräwip llakita phoqañat sipansa, wali kusisit phoqapjjañapataki, janitejj ukhamäkaspajja jumanak pachpatakejj jan walïspawa” sasa. Uka textorjamajja, irpapkistu uka jilatanakajj wal cuidapjjestu, Diosar serviskakiñatakis jan walinakat jarkʼaqapjjarakistuwa, ukatwa jupanakarusa instruccionanakaparus humilde chuymamp istʼañasa.

¹⁰ Yaqha razonajj 1 Corintios 16:14 textonkarakiwa, ukanjja Pablojj akham sänwa: “Taqe kunsa munasiñampi lurapjjam” sasa. Ukhamasti munasiñatwa irpapkistu ukanakajj Diosan markap laykojj mä kuns amtapjje. Uka toqet parlkasajj 1 Corintios 13:4-8 textojj akham siwa: “Munasir jaqejj paciencianiwa, khuyapayasiriwa. Munasir jaqejj janiw envidiasirïkiti, janiw jachʼa jachʼa tukurïkiti, janiw wali wal tukurïkiti, janiw kunatï jan lurañäki ukanak lurkiti, janiw kunatï jupatak walïki ukak thaqkiti, janirakiw jankʼak coleraskiti. Kuna jan wal luratas janiw amjjäskiti. Kunatï jan cheqapäki ukatjja janiw kusiskiti, jan ukasti kunatejj cheqäki ukatwa kusisi. Munasir jaqejj taqe kunansa amukiw tʼaqesi, taqe kun creyiraki, taqe kun suytʼi, taqe kun aguanti. Munasiñajj janipuniw tukuskiti” sasa. Cheqansa Jehová Diosan servirinakap laykojj munasiñatwa taqe kunas amtasi, ukajj qhawqsa Jehová Diosajj munasistu ukwa uñachtʼayistu. Ukatwa irpapkistu uka jilatanakar taqe chuyma confiytanjja.

¹¹ Jichhürunakanjja, kunjamtï nayrïr patak maranakan lurkäna ukhamarakiw Jehová Diosajj pantjasir chachanak toqe markapar irpaski. Nayra tiemponjja pantjasir chachanak toqew Diosajj munañap phoqäna. Amuytʼañataki, Noé chacharojj mä arca lurañapataki ukat uma juiciot jaqenakar predicañapatakiw mayïna (Gén. 6:13, 14, 22; 2 Ped. 2:5). Moisesarusti israelitanakar Egipto markat irpsuñapatakiw mayirakïna (Éx. 3:10). Ukatjja jaqenakampiw Biblia qellqayawayi (2 Tim. 3:16; 2 Ped. 1:21). Ukhamasti Diosajj pantjasir jaqenak toqe predicación pʼeqtʼatapat janiw markapat payachasktanti, jan ukasti jukʼamp chʼamañchtʼataw jikjjatastanjja. ¿Kunatsa ukham sistanjja? Kuna laykutejj Diosatï markapar jan yanaptʼkaspäna ukhajj janiw kuna askinakas jikjjataskaspänti. Suma phoqeri esclavojj walja experiencianakwa uñjawayi, jan walinakansa uñjasiwayarakiwa, ukhamäkchisa Diosan espíritu santopampiw irpayasiwayi, ukatwa aka oraqenkir Diosan organizacionapajj walja bendicionanak katoqawayi. Ukhamasti uka organizacionat janipuniw payachasiñasäkiti, antisas taqe chuymaw apoyañasa.

¿KUNJAMSA IRPAPKISTU UKANAKAR CONFIYATAS UÑACHTʼAYSNA?

¹² Congregacionan lurañanakamp phoqapki uka jilatanakajja, Jehová Diosampiru organizacionapampir confiyapjjatapwa uñachtʼayapjje, kuna laykutejj taqe chuymaw kuna lurañanaktï katoqapki ukanakamp phoqapjje (Hech. 20:28). Diosan Reinopat yatiyirinakajj akanak lurasaw Diosan organizacionapar confiyatas uñachtʼaytanjja: utat uta predicasa, revisitanak lurasa, jaqenakar Bibliat yatichasa (Mat. 24:14; 28:19, 20). Ukatjja suma phoqeri esclavojj Diosar jukʼamp sum serviñatak yanaptʼanak churkistu uk taqe chuyma katoqasisaw confiyatas uñachtʼayaraktanjja. Uka yanaptʼanak valoranit uñjatasjja, tantachäwinakatak wakichtʼasisa, ukanakar jan faltasis sarasa ukhamarak asambleanakar jan faltasis sarasaw uñachtʼaytanjja. Cheqas uka tantachäwinakanwa jilat kullakanakamp kusistʼtanjja, wali chʼamañchtʼataw jikjjatasiraktanjja (Heb. 10:24, 25).

¹³ Maysa toqetjja, donacionanak churasaw Diosan organizacionapar confiyatas uñachtʼaysna (Prov. 3:9, 10). Jehová Diosan servirinakapajja, jilat kullakanakasajj yänak toqet yanaptʼa munapki ukhajj jankʼakiw yanaptʼtanjja (Gál. 6:10; 1 Tim. 6:18). Jupanakar munasitasatwa uk lurtanjja. Ukatjja kunanaktï Jehová Diosasa, organizacionapas jiwas layku lurawayapki ukanakat yuspärañatakiw uk luraraktanjja (Juan 13:35).

¹⁴ Diosan markapajj amtanakar purki ukhajj taqe chuymaw ukar apoytanjja, ukhamatwa Diosan organizacionapar confiyatas uñachtʼayaraktanjja. Ukhamajj superintendente de circuito jilatanakasa ancianonakas mä kun amtapjjani ukhajja, humilde chuymampiw istʼañasa. Jupanakajj Diosan markapar pʼeqtʼapki uka taypinkapjjewa, ukatwa jupanakar taqe chuym istʼañasa (Heb. 13:7, 17). Yaqhep amtanakapajj janis walïkaspa ukhamwa awisajj amuysna, ukampis jiwasan askisatakïtap yatisajj istʼaskañasakiwa. Diosan organizacionapar istʼasasa Biblian mayitaparjam sarnaqasasa, Jesusar respetataswa uñachtʼaytanjja. Ukham luratasat Jehová Diosajj wal bendisistani.

¹⁵ Suma phoqeri amuyasir esclavot janiw kunäkipansa payachasktanti. Akapachan diosapäki uka Supayajja, Jehová Diosan sutip qʼañuchañatakisa organizacionapar jan wal uñjayañatakis walpun chʼamachasiski (2 Cor. 4:4). Janipun trampapar jaltʼapjjañäniti (2 Cor. 2:11). Janïr mikʼayar jaqontatäkipan “jukʼa tiemponikïtap” jupajj sum yatisi, ukatwa walja jaqenakarojj Jehová Diosat jitheqtayañatakejj wal chʼamachasiski (Apoc. 12:12). Jiwasarutï Jehová Diosat jitheqtayañ munistani ukhajja, jukʼampiw Jehová Diosar jakʼachasiñasa. Ukhamasti Jehová Diosar taqe chuyma confiyapjjañäni, khitinak toqetï markapar irpki ukanakarus confiyapjjarakiñäni. Ukhamatwa mä wawaki Jehová Diosar serviskakiñäni.