Bautisasiñ munirinakatak qhep qhepa arunaka

Jilapartejja Jehová Diosan Testigonakapan asambleanakapanwa bautisasipjje. Jupanakatak waktʼayat discurso tukuyarojja, arstʼir jilatajj saytʼasipjjañapatakiw bautisasirinakar mayi, ukjjarusti aka pä jisktʼanakar jachʼat jaysapjjañapatakiw mayiraki:

1. ¿Juchanakamat arrepentisjjtati, Jehová Diosar jakañ vidam katuyasjjtati, “Jesucristo toqew Diosajj salvistu” sasin confiyaraktati?

2. Bautisasisajj Jehová Diosan Testigopätama ukhamarak Diosan markapankjjatamwa uñachtʼayasktajja, ¿uk amuytati?

Uka jisktʼanakar “jïsa” sasin sapjjatapajja, Jesusajj sacrificiot loqtasiwayki ukar confiyapjjatapa ukhamarak Jehová Diosar jakañ vidap taqe chuyma katuyasipjjatapwa bautisasiñ munirinakajj uñachtʼayapjje (Rom. 10:9, 10). Ukampis bautisasiñ munirinakajja, janïräkipanwa oracionan Diosar mayisisajj uka jisktʼanakat lupʼipjjañapa. Ukhamatwa bautisasiñ urojj “jïsa” sasin taqe chuym sapjjani.

¿“Jumarukiw servïma, kuntï jumajj munkta uk lurañaw nayatakejj nayrankani” sasin Jehová Diosar jakañ vidam katuyasiñatak mä oración lurjjtati?

¿Bautisasiñatak wakichtʼatäjjatamti amuyasta?

¿Kunjam isinis maynejj bautisasiñapa? (1 Tim. 2:9, 10; Juan 15:19; Filip. 1:10).

‘Humilde chuymampi wali amuyumpiw’ isisiñasa, ukhamatwa ‘Dios chuymätas’ uñachtʼayañäni. Ukhamasti bautisasirinakajj janiw jan walinak piensayirjam isinak uchasipjjañapäkiti, isipajj janirakiw kuna letranakanïñapäkisa ni dibujonakanïñapäkisa. Uka isinakajj qʼomäñapawa, bautismor respetompi uñjatapwa uñachtʼayañaparaki.

Bautisasiñ horasajj ¿kunanak lurañas jan walïki? (Luc. 3:21, 22).

Jesusan bautisasitapajja cristianonakatakejj wali yateqaskayawa. Bautismojj wali respetomp uñjatäñapajj kunja wakiskirisa ukjja, Jesusajj luratanakapampiw uñachtʼayäna. Ukhamajj bautismo horasan mayninakar laruyirjam parlañasa, anatañasa, yaqha ukhamanak lurañas janiw walïkaspati, uman nadañas janirakiw walïkaspati. Umat mistjjasajja, mä jachʼa regalsa katoqkaspa ukham janiw bautisasirejj amuyañapäkiti, ni jachʼañchasiñapäkisa. Bautisasiñ urojj wali kusiskañ uruwa, ukampis wali respetomp uñjatäñapawa.

Tantachäwinakar jan faltasis sarañasa jilat kullakanakamp chikachasiñasa, ¿kunjamsa Jehová Diosar wiñayatak serviñ arsuwaykta uk phoqañatak yanaptʼätamjja?

Bautisaskäta uka qhepatjja, ¿kunatsa Bibliat yatjjataskakiñatakisa predicaskakiñatakis tiempo apstʼasiñama?

ANCIANONAKATAK EWJJTʼANAKA

Jan bautisat mä publicadoratï ancianonakar bautisasiñ munatap yatiyani ukhajja, “aka libron 185-207 paginanakan utjki uka jisktʼanak yatjjatam” sasaw ancianonakajj jupar chʼamañchtʼapjjañapa. “Jan bautisat publicadoratak mä qhawqha arunaka” siski uka cheq liytʼañapatakiw mayipjjañaparaki (página 182). Uka cheqanjja ancianonakamp parlañatakejj kunjamsa bautisasiñ munirejj wakichtʼasiñapa ukaw qhanañchasi. ‘Ancianonakamp parlkasajja, qellqtʼasiwaykta uka notanaksa aka librsa uñjjattʼasismawa’ sasaw qhanañchasiraki. Ancianonakamp janïr parlkasajja, janiw jisktʼanak yaqhamp yatjjatañapajj wakiskiti.

Maynitï bautisasiñ munchi ukhajja, coordinador del cuerpo de ancianos jilataruw yatiyañapa. “Bautisasiñ munirinakatak jisktʼanaka” siski uka cheqat yatjjatkani uka qhepatjja, coordinadorajj ‘¿Jehová Diosar jakañ vidam oracionan katuyasjjtati? ¿Diosarus munañam luräjja sasin sisjjtati?’ sasaw jupar jisktʼani. Bautisasiñ muniritï Jehová Diosar vidap katuyasjjchejja, coordinadorajj “Bautisasiñ munirinakatak jisktʼanaka” siski uka cheqat bautisasiñ munirimpi yatjjatapjjañapatakiw pä ancianonakar mayiñapa. Jilatajja mä ancianorojj aka libron Parte 1 uk bautisasiñ munirimpi yatjjatañapatakiw mayiñapa, Parte 2 uk yatjjatañapatakejja, yaqha ancianoruw mayiñaparaki. Jutïr asambleajj kunapachas apasini uk anunciasiñap suyañajj janiw wakiskapuniti.

Parte 1 ukajja mä horana jan ukajj jukʼamp tiemponwa bautisasiñ munirimpejj yatjjatasispa, Parte 2 ukampejj ukhamarakiw lurasispa. Oracionampiw qalltasiñapa tukuyasiñaparaki. Janiw bautisasiñ munirisa ancianosa jankʼak tukuyañ munapjjañapäkiti. Jisktʼanak lurapkani uka ancianonakajja, jankʼakiw bautisasiñ munirimpejj tantachasipjjañapa.

Bautisasiñ munirinakampi juntuk tantachasiñat sipansa, sapa maynimp tantachtʼasiñaw jukʼamp askejja. Ukhamatwa ancianonakajj kunjamsa bautisasirinakajj sapa jisktʼar qhanañchapjjani, bautisasiñatakis wakichtʼatäpjjeti janicha uk sum amuyapjjani. Bautisasiñ muniris jan ajjsarasaw kuntï amuyki uk ancianonakar sani. Casarat chacha warminakarojja, panpachaniruw jisktʼasirakispa.

Bautisasiñ muniritï mä warmïchejja, ancianonakajj kawkjantï yaqhanakajj jupanakar uñjapkaspa ukampis jan istʼapkaspa ukanwa tantachasipjjañapa. Wakisini ukhajja, jisktʼanak lurkani uka ancianojj yaqha ancianompi, jan ukajj mä siervo ministerialampiw saraspa. Ukjja aka librot kuna cheqatsa jisktʼasini ukarjamaw ancianojj amtañapa, kunjamtï akjjar jutki uka parrafon qhanañchaski ukhama.

Yaqhep congregacionanakanjja ancianonakajj jukʼanikïpjjewa. Uka congregacionanakanjja, suma wakichtʼat siervo ministerialanakaw “Cristianonakan creencianakapa” (Parte 1) siski uka cheqat bautisasiñ munirinakar jisktʼapjjaspa. “Diosan leyinakaparjam sarnaqaña” (Parte 2) siski uka cheqatjja, mä ancianopuniw jisktʼañapa. Congregacionantï wakichtʼat jilatanakajj jukʼanikïpjjchi ukhajja, superintendente de circuito jilataruw yatiyasispa, ukhamat jupajj yaqha congregacionankir ancianonakan yanaptʼap mayiñapataki.

Bautisasiñ muniritï minus maranïchi ukhajja, ancianonakajj jisktʼanak lurapkani ukhajj awk taykapaw jupamp chikäpjjañapa. Awk taykapatï jan ukankañ puedipkani ukhajja, pä ancianonakaw jisktʼapjjañapa (jan ukajj mä ancianompi mä siervo ministerialampiw jisktʼapjjaspa, ukampis Parte 1 ukankir jisktʼanak jisktʼapkani ukhakiw ukajj lurasispa).

Bautisasiñ munirejj janis taqpachpun yatkchinejja, Biblian wakiskir yatichäwinakap sumti amuyaski janicha ukwa ancianonakajj uñjapjjañapa. Janiw ukakïkiti, Diosan leyinakaparojj kunjamsa uñji, Jehová Diosan markaparus wali respetompit uñji janicha ukwa ancianonakajj amuyapjjañaparaki. Bautisasiñ muniritï Biblian yatichäwinakap jan sum amuykchi ukhajja, jupar yanaptʼasipkakiñapatakiw ancianonakajj amtapjjani, ukhamat qhepat bautisasiñapataki. Awisajj tiempow munasispa, ukhamat bautisasiñ munirin predicacionar wali valoranit uñjañapataki ukat Diosan markapan ewjjtʼanakapar istʼañapataki. Maynejj bautisasiñatak wakichtʼatäjjeti janicha uk amuyañatakejja, sapa jisktʼar qhanañchasiñapatakejj qhawqha tiempos munasini uk ancianonakaw amtapjjañapa. Ukampis taqpach jisktʼanakaw jisktʼasiñapa.

Aka libron Parte 2 tukuyasajja, bautisasiñ munirejj wakichtʼatäjjeti janicha uk amtañatakiw jisktʼanak lurapki uka ancianonakajj tantachasipjjañapa. Bautisasiñ munirejj liytʼasiriti janicha, yateqatapajj utjiti janicha, ukat yaqha ukhamanakat sum amuytʼasaw jupanakajj mä amtar puripjjañapa. Ak amtapjjapuniñäni, jaqenakajj Biblian wakiskir yatichäwinakap sum amuytʼapjjañapa, Jehová Diosar taqe chuym munasipjjañapwa jiwasajj muntanjja. Ancianonakan yanaptʼapampejja, bautisasipkani ukanakajj suma yatiyäwinak yatiyañatakejj wakichtʼatäpjjaniwa.

Ukjjarusti jisktʼanak lurawayapki uka ancianonakaw (jupanakat mayniki jan ukajj panini) bautisasiñ munki ukamp tantachasipjjañapa, ukhamat kuna amtarus puriwayapjje uk yatiyañataki. Bautisasïtawa sasin sapjjani ukhajja, aka libron “Bautisasiñ munirinakatak qhep qhepa arunaka” siski uka cheqwa jupamp uñakipapjjañapa (páginas 206-207). Bautisasiñ muniritï ¡Wiñayatakiw kusisit jakasisma! sat librot yatjjatañ jan tukuykchi ukhajja, bautisasjjani uka qhepat tukuyañkam yatjjataskakiñapatakiw ancianonakajj chʼamañchtʼapjjañapa. Bautisasiñ munirirojja, kuna fechansa bautisasini uk Registro de Publicador de la congregación ukaruw qellqantasini sasaw yatiyapjjañapa. Aka pä razonatwa uka datonakajj mayisi sasaw qhanañchtʼapjjañapa: Jehová Diosan Testigonakapajj kunjamsa aka oraqpachan nayrar sarantasipki uk yatiñataki, ukat Jehová Diosan markapan kuna lurañanakatï utjki ukanakamp phoqañapataki ukhamarak Diosar serviñan yanaptʼa katoqañapataki. Ukatjja jupan datonakapajj kunjamtï jw.org cheqan utjki uka “Política global de protección de datos personales de los testigos de Jehová” siski ukarjamaw apnaqasini sasaw bautisasiñ munirirojj yatiyasiñaparaki. Ukanak yatiyañatak tantachäwejj janiw tunka minutonakats jiläñapäkiti.

Jilatana jan ukajj kullakan mä mara bautisasitapatjja, pä ancianonakaw chʼamañchtʼañataki mä qhawqha ewjjtʼanak churañatak jupamp tantachasipjjañapa. Uka ancianonakat maynejja, predicañatak grupop uñjiri jilatäñapawa (superintendente de grupo). Bautisasiritï minus maranïchi ukhajja, ancianonakajj jupamp parltʼañatakejj Testigo awk taykapampiruw tantachäwir jawsapjjañapa. Ancianonakajj munasiñampi suma arunakampiw parlapjjañapa. Diosar serviñan kunjamsa nayrar sartaski uka toqetwa parlapjjañapa. Bibliat sapak yatjjataskakiñapataki, Biblia sapüru liyiñapataki, familiampi Bibliat yatjjataskakiñapataki, tantachäwinakar jan faltasis sarañapataki, Diosan arunakap sapa semana yatiyaskakiñapatakiw ancianonakajj chʼamañchtʼapjjañapa (Efes. 5:15, 16). Bautisasiritï ¡Wiñayatakiw kusisit jakasisma! librot yatjjatañ jan tukuykchi ukhajja, mä jilatampi jan ukajj mä kullakampi yatjjatañ tukuyañapatakiw ancianonakajj amtapjjani. Kunanakansa jukʼamp chʼamachasiñapa uka toqenakat wal ewjjsuñat sipansa, nayrar sartaskakiñapatakiw chʼamañchtʼapjjañapa.