7 JISKTʼA

Maynitï ikintasiñäni sitaspa ukhajj ¿kamachiristsa?

¿KUNATSA UK YATIÑAJJ WAKISI?

Kuntï lurañ amtkäta ukajja, jutïrinjja yanaptʼiristamwa jan ukajj jan walinwa uñjasiyiristamjja.

**¿KUNSA JUMAJJ LURASMA?**

Ana tawaqojj pä phajjsinak nayrakiw Pablo sat waynamp uñtʼasiski. Ukampis Anajj wali jaya tiempos Pablor uñtʼkaspa ukhamwa amuyasi. Uru jurnalaw jupanakajj mensajenak apayasipjje jan ukajj telefonot parlapjje. Wali sumsa uñtʼasipkaspa ukhamawa. Ukampis Pablojj janiw Anamp aleqak parlañ munkiti, yaqha amtaniwa.

Jichhakamajja, Anampi Pablompejj amparat kattʼasisa awisajj jampʼattʼasisa ukhamaw sarnaqawayapjje. Anajj janiw kuna jan walsa lurañ munkiti, ni Pablon jupar jaytjañapsa munkarakiti. Uka waynakis jupatak utjkaspa ukham Anajj amuyasi. Ukatwa akham lupʼi: “Pablompejj wal munasipjjta, ukhamajj jupamp ikintasiñajajj walikïskaspawa” sasa.

Jumatï Ana tawaqjam jikjjatasisma ukhajja, ¿kuns lurasma?

NAYRAQAT SUM AMUYTʼASIM

Mä suma isjja jan serviri trapökaspas ukhamwa maynejj apnaqaski — Casaratäpki ukanakakiw ikintasipjjaspa, jupanakaruw Diosajj ukjja mä regaljam churi. Janïr casaratäkasin maynimp ikintasisma ukhajja, uka regalo janis askit uñjkasma ukhamäspawa. Mä suma isi katoqasisas jan serviri trapor tukuykasma ukhamäspawa.

Jumatï mä qoqat thoqtanisin jamachʼjam jalnaqañ munasma ukhajja, ¿janit jan walir purtʼaskasma? Diosajj qʼom sarnaqañ toqet leyinak churkistu ukanak jan istʼkasma ukhajja, ukhamarakïspawa. Sañäni, janïr casaratäkasin maynimp ikintasisma ukhajja, jan waliruw purtʼasisma (1 Tesalonicenses 4:3).

Diosan leyinakap jan istʼkasma ukhajja, ¿kunjamanakansa uñjasisma? Bibliajj akham siwa: “Wachoqa jucha lurañajj pachpa janchimpi jucha lurañawa” sasa (1 Corintios 6:18). Uka arunakajj ¿kamsañsa muni?

Yatjjatasiwayki ukarjamajja, janïr casaratäkasin ikintasir wayn tawaqonakajj akham jan waltʼäwinakanwa uñjasipjje:

CHUYMAPAN WAL PISAYASIPJJE. Janïr casaratäkasin maynimp ikintasipki ukanakat waljanejja, “ukham luratajat walpun pisayasta” sasaw sapjje.
PÄCHASIÑAW UTJASPA. Maynimp ikintasisajja, yaqhep wayn tawaqonakajj akham jisktʼasipjje: “¿Janit jupajj yaqhanakamp ikintaskarakpacha?” sasa.
CHUYMAS USTʼATAW JIKJJATASIPJJE. Tawaqonakajj jupanakar sum uñjiri, jan walinakats jarkʼaqeri ukham waynampiw uñtʼasiñ munapjje, janiw jan wali amtani waynamp uñtʼasiñ munapkiti. Waynanakasti, jan respetayasiri jankʼak iyawsiri tawaqonakampejj janiw uñtʼasiñ munapkiti.
Qhepa arunaka: Jumatï janïr casaratäkasin maynimp ikintasisma ukhajja, juma pachpaw jiskʼachasisma, honramsa aptʼasismawa (Romanos 1:24). Cuerpomajj wali valoraniwa, jan ukhamak aptʼasimti.

Chʼamachasim, jan casaratäkasinjja janipun khitimpis ikintasimti (1 Tesalonicenses 4:3). Casarasjjäta ukhakam suytʼam. Ukhaw jan kunats llakisisa, jan pisayasisa kusisit jikjjatasïta, chachamatsa jan ukajj warmimatsa janiw pächaskätati. Janïr casaratäkasin ikintasipki uka wayn tawaqonakajj janiw ukham jikjjatasipkiti (Proverbios 7:22, 23; 1 Corintios 7:3).

¿JUMAJJ AKANAKAT KAMSASMASA?

Maynitï cheqapun muniristam ukhajja, ¿janit juman sum jikjjatasiñam munkaspa?
Cheqapun jumat llakischi ukhajja, ¿Diosamp sum apasitam aptʼasiñamajj ‘walikiw’ saspati? (Hebreos 13:4.)