Diosajj alajjpachamp oraqemp luräna

Jehová Diosaw Luririsajja. Jupaw uñjktan ukanaksa, jan uñjktan ukanaksa luräna. Uñjktan ukanak janïr lurkasajja, walja angelanakwa luräna. ¿Khitinakäpjjes angelanakajja? Diosan servirinakapäpjjewa, Diosar uñtasit luratäpjjarakiwa. Jiwasajj janiw Jehová Diosarusa ni angelanakarus uñjksnati. Diosan nayrïr lurat angelajj jupan yanapiripänwa. Uka angelaw Jehová Diosarojj warawaranaksa, planetanaksa yaqha ukhamanak lurañs yanaptʼäna. Jupampiw aka suma oraqsa lurapjjäna.

Jehová Diosajj animalanakana ukhamarak jaqenakana jakasipjjañapatakiw aka oraqe wakichäna. Intimpiw oraqjjar qhantʼayanïna. Qollunaka, qotanaka, jawiranakwa lurarakïna.

¿Kunsa ukjjar luräna? Jehová Diosajj akham sänwa: “Oraqejj kunayman kasta chʼojjña alinaka, plantanaka, qoqanak jilaypan” sasa. Ukatwa oraqen kunayman frutanaka, verduranaka, panqaranakajj jilantäna. Jehová Diosajj kunayman animalanakwa lurarakïna: altnam jalnaqerinaka, uman jakirinaka, oraqen qatatnaqtirinaka. Jehová Diosajj wankʼur uñtat jiskʼa animalanaka, elefantjam jachʼa animalanakwa luräna. ¿Jumarojj kawkïr animalas gusttamjja?

Ukatsti Jehová Diosajj nayrïr angelarojj akham sänwa: ‘Jaqer lurañäni’ sasa. Jaqenakajj janiw animalanakjam luratäpkiti. Jupanakajj amuytʼasis kuns luriri, parliri, lartʼasiri, Diosarus orasiri ukham luratäpjjewa. Jupanakaw oraqsa animalanaksa cuidapjjañapäna. ¿Kamsatänsa nayrïr jaqejj uk yattati? Jichhajj uk yateqañäni.