Diosajj nayrïr chacha warmi luräna

Edén lugaranwa Jehová Diosajj mä suma jardín luräna. Ukanjja walja panqaranaka, qoqanaka, ukat kunayman animalanakaw utjäna. Ukatjja Diosajj Adán sat nayrïr chacharuw laqʼat luräna, nasapat phusantasaw vida churarakïna. Jehová Diosajj uka jardín cuidañapataki, ukhamarak taqpach animalanakar suti uchañapatakiw Adanar mayïna.

Jehová Diosajj Adanar mä mandato akham sasin churäna: ‘Jardinan utjki uka achunak taqpach manqʼaskasmawa. Ukampis mä qoqan achupakwa jan manqʼañamäkiti. Uk manqʼäta ukhajj jiwätawa’ sasa.

Qhepatjja Diosajj sänwa: ‘Adanatakejj mä yanapiri lurarapï’ sasa. Ukatwa Adanar iktʼayasajj mä jaraphipat mä esposa lurarapïna. Jupajj Eva satänwa. Adanampi Evampiw nayrïr familiäpjjäna. ¿Adanajj Evar uñjasajj kamsänsa? Wali kusisitaw akham säna: ‘¡Jaraphijatwa Jehová Diosajj mä esposa lurarapitu! ¡Jupajj nayjamawa!’ sasa.

Jehová Diosajj Adanampi Evampirojj ‘wawanakanïpjjam, aka oraq phoqantapjjarakim’ sasaw säna. Adanampi Evampejj wali kusisita juntuki trabajisajj aka oraq mä suma paraisor tukuyapjjaspa ukwa Diosajj munäna. Aka oraqejj Edenjam suma jardinäspa ukwa munarakïna. ¿Kunatsa jichhajj jan ukhamäkpacha? Jutïr yatichäwinwa uka toqet yateqañäni.