Kimsaqallqo jaqenakaw salvasipjjäna

Noé chachasa, familiapasa, animalanakas arcaruw mantjjapjjäna. Jehová Diosajj punku llawintjjäna ukhajja, jallojj wal purintäna. Arcajj umanwa tuyjjäna. Jukʼat jukʼatwa umajj oraq chhaqtayjjarakïna. Anqar quedasipkäna uka jan wali jaqenakajj taqeniw jiwarapjjäna. Noé chachampi familiapampikiw arca manqhan salvasipjjäna. Jehová Diosar istʼapjjatapat wal kusisipjjpachäna, ¿uk amuytati?

40 uruy arumaw jallojj wal purintäna. Jallojj pasarjjäna uka qhepatjja, jukʼat jukʼatwa umajj wañantjjäna. Arcasti mä qollu patjjaruw saytʼarakïna. Ukampis oraqen umajj utjaskakïnwa, ukatwa Noé chachampi familiapampejj arcat jan mistuñ puedipkänti.

Sapürutjamwa umajj wañaqaskäna. Noé chachampi familiapampejj mara jilaw arca manqhan jakapjjäna. Ukatjja Jehová Diosajj ‘arcat mistjjapjjam’ sasaw säna. ¡Oraqejj machaq oraqëkaspas ukhamänwa! Jupanakar salvatapatjja Jehová Diosar wal yuspärapjjäna, ukatwa mä ofrenda loqtapjjäna.

Uka ofrendajj Jehová Diosar wal kusisiyäna, ukatwa akham sasin mä promesa arsüna: ‘Janipuniw aka oraqen jakirinakarojj Uma Juiciomp tukj-jjäti’ sasa. Uka promesa amtapjjañapatakejj nayrïr kurmi (arcoíris) uñstayäna. ¿Jumajj mä kurmi uñjirïtati?

Ukatjja Jehová Diosajj ‘wawanakanïpjjam, aka oraq phoqantapjjarakim’ sasaw Noé chachampiru familiapampirojj säna.