LECCIÓN 8
Abrahanampi Sarampejj Diosaruw istʼapjjäna
Babel marka jakʼanjja, Ur sat mä markaw utjäna. Uka markankirinakajj janiw Jehová Diosar adorapkänti, jan ukasti walja yaqha diosanakaruw adorapjjäna. Ukampis Ur markanjja, Abrahán sat mä chachaw Jehová Diosar adoräna.
Diosajj Abrahanar akham sänwa: ‘Utamatsa familiaranakamatsa jayar sarjjam, kawki lugartï uñachtʼaykäma ukaru’ sasa. Ukatsti akham sarakïnwa: ‘Mä jachʼa markaruw jumar tukuyäma. Juma taypiw taqe markanakas bendisitäpjjani’ sasa.
Kawkir khitañsa Jehová Diosajj munäna uk janis Abrahanajj yatkchïnjja, Diosar confiyasaw saräna. Abrahanasa, Sara esposapasa, Taré sat tatapasa, Lot sobrinopas Diosaruw istʼapjjäna. Ukatwa cosasanakap wakichtʼasisajj wali jay viajipjjäna.
Jehová Diosajj churämaw siskäna uka oraqer Abrahanampi familiapamp puripkäna ukhajja, Abrahanajj 75 maranïnwa. Uka lugarajj Canaán satänwa. Uka markanwa Jehová Diosajj Abrahanar akham sasin mä promesa luräna: ‘Taqe aka oraqwa wawanakamar churäjja’ sasa. Abrahanasa esposapas jilirëjjapjjänwa, janirakiw wawanïpkänsa. Ukhamajj ¿kunjamsa Jehová Diosajj uka promesap phoqaspäna?
“Diosar confiyatap laykuw Abrahanajj [...] istʼäna, ukatwa markapat mistusajj herenciat katoqañapäkäna uka lugarar saräna; janis kawkir sarañapsa yatkchïnjja jupajj saränwa” (Hebreos 11:8).