Nakhaskir chʼapi

Moisesajj 40 maraw Madián sat lugaran jakäna. Uka tiemponwa casarasïna, wawanakanirakïna. Mä urojja, ovejanakwa Sinaí qollu jakʼan awatiskäna, ukanwa nakhaskir mä chʼapi uñjäna. Janirakiw nakhantkänti. Moisesajj jakʼachasïna ukhajja, chʼapi taypit mä aru istʼäna, akham siri: ‘¡Moisés! Jan jukʼamp jakʼachasinimti. Wiskhumsa apsusim, taktʼkta uka oraqejj sagradowa’ sasa. Cheqas Jehová Diosaw mä ángel taypejj Moisesar parlaskäna.

Moisesajj wal sustjasïna, ukatwa ajanup imantasïna. Diosasti saskakïnwa: ‘Israelitanakajj wal tʼaqesisipki. Nayaw Egiptot salväjja, mä suma oraqe jupanakar churarakëjja. Ukampis jumaw Egiptot markajar irpsunïta’ sasa. Uk istʼasajja, ¿Moisesajj sustjaspachänti?

Moisesajj akham sasaw Diosar jisktʼäna: ‘¿Khitis khitantam sapjjetani ukhajj kamsäsa?’ sasa. Diosajj sänwa: ‘Abrahán, Isaac, Jacob chachanakan Jehová Diosapaw khitanitu sätawa’ sasa. Moisesasti sarakïnwa: ‘¿Jan istʼapkitani ukhasti?’ sasa. Jehová Diosajj nayaw yanapäma sasaw mä milagro uñjayäna. ‘Thujrum pampar liwtam’ sänwa. Liwtäna ukhasti, ¡thujrupajj asiruruw tukjjäna! Ukatjja Moisesajj wichʼinkatwa uka asirur katthapïna, ukatsti mayampiw thujrur tukjjäna. Ukjjarusti Diosajj akham sänwa: ‘Uka milagro lurasajja, nayan jumar khitatamwa uñachtʼayäta’ sasa.

Ukampis Moisesajj akham sänwa: ‘Janiw jaqenak nayraqatan sum parlañ yatkti’ sasa. Jehová Diosajj akham sarakïnwa: ‘Nayaw kuntï parlañamäki uk saskäma. Aarón jilamampiw sarapjjarakïta, jupaw yanaptʼarakïtam’ sasa. Cheqapuniw Jehová Diosajj yanaptʼitani sasaw Moisesajj Egipto markar saräna, esposaparusa wawanakaparus irpasjjarakïnwa.