Esdrasajj Diosan Leyipwa markpachar yatichäna

Israelitanakajj Jerusalén markar kuttʼjjapjjäna uka tiempotjja 70 maranakaw pasjjäna. Ukampis yaqhepajj janïraw kuttʼapkänti, Persia markan apnaqat lugaranakanwa jakasipkäna. Maynejj Esdras satänwa. Jupajj Jehová Diosan Leyip yatichir sacerdotënwa. Esdrasajja ‘Jerusalén markan janiw Diosan Leyipar istʼapkiti’ sasin parlir istʼäna ukhajja, yanaptʼir sarañwa munäna. Persia markan Artajerjes reyipajj akham sänwa: ‘Leyip yatichañamatakejj Diosaw yatiñ churtamjja. Ukhamajj Jerusalenar saram, khitinakatejj jumamp chik sarañ munapki ukanakamp sarapjjam’ sasa. Esdrasajj Jerusalenar kuttʼañ munapkäna ukanakaruw tantachthapïna. Ukatjja thakin jan kuna jan walis pasañapatakejj Jehová Diosaruw cuidasipjjeta sasin ruwtʼasipjjäna. Ukhamaw Jerusalenar kuttʼapjjäna.

Pusi phajjsitwa Jerusalenar puripjjäna. Jilïr jaqenakajj Esdrasar akham sapjjänwa: ‘Israelitanakajj janiw Jehová Diosar istʼjjapjjeti, falso diosanakar adoririnakampiw casarasipjje’ sasa. ¿Esdrasajj kuns luräna? Taqe jaqenak nayraqatan qonqortʼasisaw akham sasin orasïna: ‘Jehová Dios, jumajj walja kutiw yanaptʼapjjestajja, ukampis nanakajj juma contraw juchachasipjjta’ sasa. Israelitanakajj arrepentisipkchïnsa, jan walinak lurasipkakïnwa. Ukatwa Esdrasajj ancianonakampiru juezanakampir ajllïna, ukhamat kuna jan walinakas utji ukanak yatjjatapjjañapataki. Kimsa phajjsitjja khitinakatï Jehová Diosar adorañ jan munapkäna ukanakarojj alisnukjjapjjänwa.

12 maranakaw pasjjäna. Ukapachaw Jerusalén markan murallanakap lurañ tukuyjjapjjarakïna. Esdrasajj Diosan Leyip liytʼañatakejj plazaruw jaqenakar tantachthapïna. Diosan Leyipanïki uka libro jistʼaräna ukhajja, jaqenakajj taqeniw saytʼasipjjäna. Esdrasajj Jehová Diosaruw jachʼañchäna. Israelitanakasti jupamp acuerdöpjjatap uñachtʼayañatakejj amparanakapwa altor loqtapjjäna. Esdrasajj Diosan leyip liytʼasajj sum qhanañchäna. Jaqenakajj sum istʼapjjarakïna. Jehová Diosat mayamp jitheqtapjjatap amuyasipjjäna ukhajj jachapjjänwa. Qhepürojj Esdrasajj Diosan Leyip liytʼaskakïnwa. Ramanakamp Carpachasiñ Fiesta jakʼachasinitapwa amuyapjjarakïna. Ukatwa uka fiestatakejj wakichasiñ qalltapjjäna.

Uka fiestajj paqallqo urunakaw apasïna, uka paqallqo urunakan israelitanakajj wal kusisipjjäna. Jehová Diosaruw suma cosecha apthapisajj wal yuspärapjjäna. Josué chachajj jiwjjäna uka qhepatjja janiw uka fiesta ukham amtapjjerïkänti. Fiestajj tukuyjjäna ukhajja, tantachasisaw akham sasin Diosar orasipjjäna: ‘Jehová Dios, jumaw esclavöñat salvanipjjesta. Jumaw wasaransa manqʼayapjjesta, aka suma oraqsa churapjjarakista. Ukampis nanakajj walja kutiw jan istʼapksmati. Ewjjañatakejj walja profetanaksa khitanipkchistajja, janiw istʼapksmati. Ukhampachas pacienciampiw uñjapjjestajja. Abrahanar promesa lurkayäta ukatsa janiw armasktati. Jichhat uksarojj istʼjjapjjämawa’ sasa. Israelitanakajj uka promesapjja qellqtʼasipjjänwa. Ukatsti principenakampi, levitanakampi, sacerdotenakampiw firmapjjäna.