Angelanakaw Jesusan nasïwip yatiyapjje

Romanonakan César Augusto apnaqeripajja, ‘taqpach judionakaw nasipki uka markan qellqayasipjjañapa’ sasaw mä ley apsüna. Ukatwa Joseampi Mariampejj Belén markar sarapjjäna, Josean familiapajj uka markatätap layku. Marian wawap nasiñapatakis tiempöjjarakïnwa.

Belén markar puripjjäna ukhajja, janiw kawkir alojasiñas utjkänti, uywa liwañ utakiw utjäna. Ukanwa Jesusajj nasïna. Mariajj suma qoña telanakamp llawuntasaw Jesusarojj uywa liwañjjar iktʼayäna.

Belén jakʼanjja, ovej awatirinakajj arum paqaraw pampanakan uywanakap uñjapjjerïna. Ukanjja akatjamatwa mä angelajj uñstäna, Jehová Diosan qhanapaw jupanakjjar qhanjjatarakïna. Awatirinakajj wal sustjasipjjäna, ukatwa angelajj jupanakar akham säna: ‘Jan ajjsarapjjamti, suma yatiyäwinak apantjja. Mesiasaw jichhürojj Belenan nasi’ sasa. Ukatjja walja angelanakaw alajjpachan uñstäna, akham sapjjarakïnwa: “Diosajj alajjpachan jachʼañchatäpan, aka oraqen sumankañajj utjarakpan” sasa. Ukatsti angelanakajj chhaqtjjapjjänwa. ¿Kunsa ovej awatirinakajj lurapjjpachäna?

Jupanakkamaw akham sasipjjäna: ‘Belenar jankʼak sarañäni’ sasa. Ukspachaw sarapjjarakïna, purisajj Joseampir Mariampiruw uywa liwañ utan uñjapjjäna, asu wawas ukankaskarakïnwa.

Kuntï angelajj ovej awatirinakar siskäna uk yatisajja jaqenakajj wal musparapjjäna. Marias angelan arunakapat wal piensäna, janipuniw uka arunak armkänti. Awatirinakajj pampanakaruw ovejanakapan ukar kuttʼjjapjjäna, kunanaktï uñjapkäna istʼapkarakïna ukanakatsa wal Jehová Diosar yuspärapjjäna.