Jesusajj 12 maranëjjänwa

Joseampi Mariampejja, Jesús wawapampi mayni wawanakapampejj Nazaretanwa jakapjjäna. Familiapar yanaptʼañatakejj carpinterotwa Joseajj trabajïna. Ukhamarakiw familiaparojj Jehová Diosampita Leyipampit yatichirïna. Diosar adorirejj sinagogar sarapjjapunirïnwa. Pascua amtañatakejj sapa maraw Jerusalenar sarapjjerïna.

Jesusajj 12 maranïkäna ukhajja, kunjamtï sapa marajj sarapjjerïkänjja, ukhamarakiw familpach Jerusalén markar sarapjjäna. Pascua amtañatakejj taqe cheqatwa Jerusalenar sarapjjerïna, ukatwa uka markajj wali phoqäna. Pascua fiestajj tukuyjjäna ukhajja, Joseampi Mariampejj utaparuw kuttʼjjapjjäna, ‘Jesusajj mayni familiaranakasampiw saraskpacha’ sasaw amuyapjjäna. Ukampis thaqtapjjäna ukhajj janiw jikjjatapkänti.

Ukatwa Jerusalén markar kuttʼapjjäna, kimsa ururakiw Jesusar thaqapjjäna. Ukhamaruw templon jikjjatapjjäna. Ukanwa Jesusajj yatichirinak taypin jupanakar istʼaskäna, jisktʼanak luraskarakïna. Uka yatichirinakajja Jesusan arunakap istʼasajj wal musparapjjäna, jupanakaw Jesusar jisktʼapjjarakïna. Kunjamsa Jesusajj jisktʼanakap qhanañchäna uk istʼasajj wal musparapjjäna. Jesusajj Jehová Diosan Leyip sum entiendetapwa amuyapjjarakïna.

Joseampi Mariampejj wali llakitaw Jesusar thaqapjjäna. Ukatwa Mariajj akham säna: ‘Wawa, taqe cheqan thaqapjjsma. ¿Kawkinkayätasa?’ sasa. Jesusajj sarakïnwa: ‘¿Janit Awkijan utapankañaj yatipkta?’ sasa.

Jesusajj awk taykapampiw Nazaret markar kuttʼjjäna. Ukanwa José tatapajj carpinteröñ yatichäna. Jumajj kamsasmasa, ¿Jesusajj waynäjjäna ukhajj kunjamäpachänsa? Jesusajj jiltaskakïnwa, jukʼamp yatiñanirakïnwa. Ukatwa Jehová Diosasa jaqenakas Jesusar jukʼamp munasipjjäna.