Jesusaruw katuntapjjäna

Jesusampi apostolonakampejj Cedrón valle pasasaw Olivos qollur sarapjjäna. Chika arumajj pasjjänwa, phajjsi qhana arumarakïnwa. Getsemaní jardinar purisajja, Jesusajj apostolonakar akham sänwa: ‘Akar quedasipjjam, jan ikjapjjamti’ sasa. Ukatjja khuri cheqar sarasaw qonqortʼasïna. Jesusajj wali llakitänwa, ukatwa Jehová Diosar akham orasïna: “Kunjamtï jumajj munkta ukham luraspan” sasa. Ukatsti Jesusar chʼamañchtʼañatakiw Diosajj mä angelar khitanïna. Uka pasatatjja Jesusajj kimsa apostolonakapan ukaruw kuttʼäna, ikiraskirwa katjarakïna. Ukatwa akham säna: ‘¡Sartapjjam! Janiw ikiñ horasäkiti. Enemigonakajar katuyatäñ horasajj purinjjewa’ sasa.

Uka ratuw Judasajj purinïna, jupamp chikajj walja jaqenakaw espadas aptʼasita, lawas aytʼasit purinipjjäna. Judasajj walja kutiw Jesusampi mayni apostolonakampejj uka jardinar sarapjjerïna, ukatwa kawkinkatapsa yatpachäna. Jesusar uñachtʼayañatakejj mä señalwa soldadonakar churatayna. Judasajj Jesusar cheqak jakʼachasisajj akham sänwa: ‘Yatichiri, kamisaki’ sasa, ukatsti jampʼattʼänwa. Jesusajj sänwa: ‘Judas, ¿jampʼattʼasat aljantista?’ sasa.

Jesusajj jaqenakar akhamwa jisktʼäna: ‘¿Khitirus thaqapjjta?’ sasa. Jupanakajj sapjjarakïnwa: “Nazareno Jesusaruw thaqasipkta” sasa. Jesusajj “nayätwa” sänwa. Jaqenakajj qhepar jittʼasaw oraqer jaqosipjjäna. Jesusajj wasitatwa ‘¿khitirus thaqapjjta?’ sasin jisktʼäna, jupanakajj wasitatwa “nazareno Jesusaruw thaqasipkta” sapjjäna. Jesusasti sarakïnwa: ‘Nayätwa sapjjaraksmasä. Nayar thaqapjjchistajja, discipulonakajar khitjjapjjam’ sasa.

Kunatï pasaskäna uk amuyasajja, Pedrojj jachʼa jilïr sacerdoten Malco sat esclavoparuw espadamp jiñchu thoqoqayäna. Ukampis Jesusajj jiñchut llamktʼasaw qolljjäna. Pedror akham sarakïnwa: ‘Uka espadam imam. Espadamp nuwasïtajja, espadamp jiwayataw uñjasïta’ sasa. Soldadonakajj Jesusar katuntasaw amparanakat ñachʼantapjjäna, apostolonakajj escapjjapjjarakïnwa. Ukatjja Anás sat jilïr sacerdoten ukaruw Jesusar apapjjäna. Jupajj wal Jesusar jiskhsüna, ukatsti Caifás sat jachʼa jilïr sacerdoten ukaruw Jesusar apayarakïna. ¿Kunas apostolonakamp paspachäna?