Pedrojj Jesusar jan uñtʼiriw tuküna

Qhep qhepa cenanjja, Jesusajj apostolonakar akham sänwa: ‘Aka arumajj taqeniw nayar jaytapjjetäta’ sasa. Pedrojj sarakïnwa: “Taqenis jumar jaytapkchïtamjja, ¡janipuniw kunäkipansa nayajj jaytjkämati!” sasa. Ukampis Jesusajj Pedror sänwa: ‘Janïr wallpajj artʼkani ukhaw kimsa kuti nayar jan uñtʼir tuküta’ sasa.

Soldadonakajj Caifasan utapar Jesusar apapkäna ukhajja, niya taqpach apostolonakaw escapjjapjjäna. Jupanakat paninikiw jaqenak taypi arkapjjäna. Maynejj Pedrönwa. Jupajj Caifasan uta patioparuw mantäna, juntʼurtʼasiñatakiw ninar jakʼachasïna. Nina qhanampiw mä sirvientajj Pedror uñkatasin akham säna: ‘¡Nayajj uñtʼsmawa! ¡Jumajj Jesusampiw sarnaqayätajja!’ sasa.

Pedrojj akham sänwa: ‘Janiwa. Kunpun parlasksta’ sasa. Ukat punku toqeruw sarjjäna. Ukatjja yaqha sirvientaw mayninakar akham säna: ‘¡Jupajj Jesusampiw sarnaqerïna!’ sasa. Pedrojj ‘¡janiw Jesusar uñtʼkti!’ sasaw säna. Mä jaqejj akham sarakïnwa: ‘Jumajj jupanakat maynïrïtawa. Parlatamas qhanawa, Jesusjamarakiw galileonakjam parltajja’ sasa. Pedrojj juramentompiw akham säna: ‘¡Janipuniw uñtʼkti!’ sasa.

Ukaratpachaw mä wallpajj artʼäna. Jesusajj Pedror uñchʼukisinkänwa, uk uñjasaw Pedrojj Jesusan arunakap amtäna. Ukatwa sarjjasajj walpun jachäna.

Ukañkamajja Sanedrinajj Caifasan utapanwa Jesusar juzgañatak tantachasipjjäna. Sanedrinajj judionakar pʼeqtʼiri juezanakänwa. Jupanakajj Jesusar jiwayañwa amtapjjäna, jiwayañatakejj kunatsa juchañchsna sasaw thaqasipkäna. Ukampis janiw kunat juchañchañas utjkänti. Ukatwa Caifasajj Jesusar akham jisktʼäna: ‘¿Jumätati Diosan Yoqapajja?’ sasa. Jesusajj sarakïnwa: “Jïsa, nayätwa” sasa. Ukatwa Caifasajj akham säna: ‘Janiw yaqha testigonakajj munasjjeti. ¡Dios contraw qhan parlaski!’ sasa. Sanedrinajj mayakiw ‘aka jaqejj jiwañapawa’ sasin arsüna. Jesusarojj tʼajjllinoqapjjänwa, thuskatapjjänwa, nayranakap chʼoqantasaw akham sapjjarakïna: “Jumatï profetästajja, khitis nuwtam uk sapjjeta” sasa.

Alwajj Sanedrinan salaparuw Jesusar apapjjäna, ukanjja wasitatwa ‘¿jumätati Diosan Yoqapajja?’ sasin jisktʼapjjäna. Jesusajj sänwa: ‘Jïsa. Jumanak pachpaw sasipktajja’ sasa. Ukatwa Dios contraw parli sasin juchañchapjjäna, ukatsti Poncio Pilato gobernadoran palacioparuw apapjjäna. ¿Kunas ukan pasäna? Mayan uk yateqañäni.