Cristianonakajj walja markanakanwa predicapjje

‘Aka oraqpachanwa predicapjjäta’ sasaw Jesusajj mä mandato jaytäna. Apostolonakajj uka mandator istʼasaw sum phoqapjjäna. 47 maranjja, Antioquía markankir jilatanakajj Pablompir Bernabeampiruw yaqha markanakan predicapjjañapatak khitapjjäna. Jupanakajj taqe chuymaw Asia Menor cheqankir Derbe, Listra, Iconio markanakar sarasajj predicapjjäna.

Pablompi Bernabeampejj taqeniruw predicapjjäna: qamirinakaru, pobrenakaru, waynanakaru ukat jilïrinakaru. Waljaniw Cristjjat cheqa yatichäwinakar creyipjjäna. Pablompi Bernabeampejj Chipre markan Sergio Paulo sat gobernadoraparus predicapjjarakïnwa. Ukampis mä layqa jaqew jarkʼañ munäna. Ukatwa Pablojj uka jaqer akham säna: ‘Jehová Diosaw castigätam’ sasa. Ukaratpachaw uka layqa jaqejj juykhuptäna. Uk uñjasaw Sergio Paulo gobernadorajj creyentëjjäna.

Pablompi Bernabeampejj taqe cheqanwa predicapjjäna: utat uta, mercadonakana, thakinakana, sinagoganakana. Mä kutejj Listra markanwa mä cojo jaqer qollapjjäna. Uk uñjirinakajj ‘diosäpjjpachawa’ sasaw adorañ munapjjäna. Ukampis jupanakajj akham sasaw sapjjäna: ‘¡Diosarukiw adorañasa! Nanakajj jaqenakakïpjjtwa’ sasa. Yaqhep judionakajj ukar purinisaw Pablo contra jaqenakar saytʼayapjjäna. Jaqenakajj qalampiw Pablor jaqjapjjäna, ukatsti ‘jiwatäjjpachawa’ sasaw marka anqar qatatsupjjäna. Ukampis Pablojj ¡jakaskänwa! Jilat kullakanakajj jankʼakiw yanaptʼir jutapjjäna, markaruw apjjapjjarakïna. Qhepatjja Pablojj Antioquía markaruw kuttʼjjäna.

Pablojj 49 maran wasitatwa viajïna. Asia Menor toqenkiri cristianonakar tumptʼiriw saräna, ukatjja jukʼamp khurinkir Europa cheqaruw predikir sararakïna. Pablojj Atenas, Éfeso, Filipos, Tesalónica ukhamarak yaqha markanakaruw saräna. Uka viajenjja Silasampi, Lucasampi, Timoteo waynampiw compañapjjäna. Mayachtʼataw machaq congregacionanak uttʼayañataki ukat chʼamañchtʼañatak trabajipjjäna. Pablojj mara chikataniw Corintonkir jilat kullakanakar chʼamañchtʼañatakejj quedasïna. Jupajj wal predicäna, yatichäna, cartanakwa walja congregacionanakar qellqarakïna. Carpanak lurasaw trabajïna. Tiempompejj Antioquiaruw kuttʼjjarakïna.

Qhepatjja, 52 maranwa Pablojj Asia Menor toqen kimsïr viajep qalltäna. Jupajj norte toqeruw Filipos markakam saräna, ukatsti Corinto markakamaw saraqarakïna. Pablojj walja maranakaw Éfeso markan quedasïna, ukansti Diosan arunakapwa yatichäna, usutanak qolläna, congregacionaruw yanaptʼarakïna. Ukatsti sapürurakiw Tirano sat jaqen escuelapan jachʼa salapan discursonak arstʼirïna. Waljanirakiw jupar istʼasajj jan wali lurañanak jaytjjapjjäna. Walja markanakan Diosan suma yatiyäwinakap yatiyasajja, Pablojj Jerusalenaruw kuttʼjjäna.