Cárcel uñjiriw kunatï cheqäki uk yateqäna

Filipos markanjja, jutïrit yatir mä tawaqow utjäna, jupajj demonion mantatäsaw kunas jutïrin pasani uk yatïna. Uywirinakapatakejj walja qollqwa ukham lurasajj ganäna. Pablompi Silasampejj uka markar puripjjäna ukhajja, uka tawaqojj walja urunakaw jupanakar arknaqäna. Demoniow akham arnaqayäna: “Aka jaqenakajj Jachʼa Diosan esclavonakapawa” sasa. Ukatwa Pablojj uka demonior akham säna: ‘Jesusan sutipjjaruw sissma, uka tawaqot mistum’ sasa. Ukatwa demoniojj mistjjäna.

Uka tawaqon uywirinakapatakejj janiw kawkit qollqechasiñas utj-jjänti. Ukatwa wal colerasisajj Pablompir Silasampirojj marka apnaqerinakan ukaru, magistradonakan ukar qatatipjjäna, akham sasa: ‘¡Aka jaqenakajj janiw ley phoqapkiti, markankirinakarus chʼajjwayapjjewa!’ sasa. Magistradonakajj Pablompir Silasampir jawqʼjayasaw carcelar llawintayapjjäna. Cárcel uñjirejj wali chʼamakäki uka manqharuw llawintäna, kayunakapsa pʼiyanakan tablanakaruw achuntayäna, ukajj cepo satänwa.

Carcelanjja Pablompi Silasampejj Jehová Diosar jachʼañchañatakiw arumajj cantapjjäna, mayni presonakas istʼapjjarakïnwa. Ukat chika arumarojj mä akatjamatwa mä jachʼa terremotojj cárcel khatatiyäna. Ukatwa punkunakajj jistʼartäna, cadenanakas jarartäna, cepos janiw presonakar katjjasjjänti. Cárcel uñjirejj tʼijukamaw manqhakam saräna, punkunak jistʼarat uñjasajja, presonakajj sarjjapjjpachawa sasin amuyasaw espadamp jupa pachp jiwayasiñ munäna.

Ukhamaruw Pablojj akham sasin artʼäna: “¡Jan jiwayasimti! ¡Taqeniw akankasipkta!” sasa. Ukatwa cárcel uñjirejj Pablon Silasan ukar tʼijusajj nayraqatapan qonqortʼasïna. Ukat akham sasaw jisktʼarakïna “¿salvasiñajatakejj kun lurañajas wakisi?” sasa. Jupanakajja ‘jumasa utamankirinakas Jesusar creyipjjañamawa’ sasaw sapjjäna. Ukatsti Pablompi Silasampejj Jehová Diosan arunakapwa yatichapjjäna, ukhamatwa cárcel uñjiris utapankirinakas taqen bautisasipjjäna.