Roma markaruw Pablor apapjjäna

Pablon kimsïr viajepajj Jerusalenanwa tukuyäna. Ukanwa katuntasajj carcelar llawintapjjäna. Mä arumajja, Jesusajj mä visionanwa Pablor akham säna: ‘Romaruw saräta, ukanwa predicarakïta’ sasa. Qhepatjja, Pablorojj Cesarea markaruw Jerusalenat apapjjäna. Ukanjja pä maraw carcelankäna. Mä urojj tribunalankaskän ukhajj Festo sat gobernadorar akham sasaw mayïna: ‘Nayajj Cesaran juzgatäñwa munta Roma markana’ sasa. Festo gobernadorajj akham sarakïnwa: ‘Niyakejjay Cesaramp juzgatäñ munstajja, Cesaran ukaruw apayäma’ sasa. Ukatwa Roma markar sarir mä barcot apapjjäna. Pablorojj Lucasampi Aristarcompiw compañapjjäna.

Qotankjjapjjäna ukhajj jallumpi thayamp jawqʼsutaw walja urunak uñjasipjjäna. ‘Akanwa jiwañäni’ sasaw jaqenakajj sapjjäna. Ukampis Pablojj akham sänwa: ‘Tatanaka, mä angelaw samkan akham situ: ‘Jan ajjsaramti. Romarojj purïtawa, jumamp chik barcot saririnakas salvasipjjaniwa’ sasa. Ukhamajj ¡jan ajjsarapjjamti! Janiw jiwarkañäniti’ sasaw säna.

Qotanjja 14 urunakaw thayamp jawqʼsut tʼaqesipjjäna, ukhamaruw mä isla uñjapjjäna. Uka islajj Malta satänwa. Barcojj chʼallaruw achuntäna, ukaruw oladajj jiskʼa jiskʼa tukjäna. Ukampis barconkapkäna uka 276 jaqenakajj salvasipjjänwa. Yaqhepajj nadasaw waña oraqer puripjjäna, yaqhepasti barcot jiltʼkäna uka tablanakat katuntasisaw salvasipjjarakïna. Malta islankir jaqenakajj jupanakar wal khuyaptʼayapjjäna, nina phichkatasaw taqenir juntʼuchtʼapjjarakïna.

Kimsa phajjsitwa yaqha barcot Pablorojj Roma markar apjjapjjäna. Pablojj purïna ukhajj jilatanakaw sum katoqapjjäna. Jupanakar uñjasajj wali chʼamañchtʼataw Pablojj uñjasïna, Diosarus wal yuspärarakïna. Pablojj preso katuntatäkchïnsa, mä alquilat utan jakañapatakiw permiso churapjjäna, ukanjja mä soldadow uñjäna. Pä maraw ukankäna. Walja jaqenakaw visitir sarapjjarakïna, Pablosti Diosan Reinopata Jesusjjatwa predicäna. Ukankkasajja Asia Menor, Judea toqenkir congregacionanakaruw cartanak qellqarakïna. Jehová Diosajj ukhamaw Pablo taypejj yaqha markanakar suma yatiyäwinak puriyäna.