Oraqpachan Jilïr Irpirinakan cartapa

Jehová Diosaru Bibliaru wal munasirinaka:

Jesusajj akham sänwa: “Kunatï cheqäki ukwa uñtʼapjjäta, ukaw libre jakasiñ churapjjarakïtam” sasa (Juan 8:32). Kunatï cheqäki uk Bibliat yateqasajj jumajj wal kusispachätajja. Akapachajj kʼari yatichäwinakampi phoqantatawa, ukampis kunatï cheqäki uk yatiñajj wal kusisiyistu (2 Timoteo 3:1).

Jehová Diosajj kunatï cheqäki uk yatiñaswa muni. Jiwasasti munasirïtas laykojj uka cheqa yatichäwinak yatiyañwa munaraktanjja. Diosar serviñatakejj janiw yatiyañakejj wakiskiti. Jan ukasti Biblian wiñay yatichäwinakapar respetatas laykojja, cristianjam sum sarnaqañatakiw chʼamachasiñasa. Jesusajja kunjamsa Diosar munassna ukwa akham qhanañchäna: “Jumanakatï mandamientonakaj phoqapjjätajja, nayan munasiñajan sarnaqasipkakïtawa, kunjamtï nayajj alajjpachankir Awkin mandamientonakap phoqkta, munasiñapan sarnaqkarakta ukhama” sasa (Juan 15:10).

Jesusajj Awkipar wal munasi, ukatwa taqe kuntï Awkipajj mayki uk luri. Jiwasatï Jesusat yateqasis sarnaqañäni ukhajja, Jehová Diosajj wal munasistani, wali kusisitaw jakasirakiñäni. Jesusajj akham sänwa: “Jumanakatejj ukanak yatipjjsta, ukarjamarak lurapjjsta ukhajja, kusisipjjam” sasa (Juan 13:17).

Aka librojja, Biblian yatichki uka cheqa yatichäwinakarjam sarnaqañataki ukhamarak Diosan amigopäñatak yanaptʼiristam ukwa munapjjta. Diosar jukʼamp munasiskakiñamataki, wiñay jakañ suyaskakiñamataki, munasir Diosat janipun jitheqtañamatakiw orasipjjta (Judas 21).