21 YATICHÄWI
¿Kunjamsa suma yatiyäwinakajj predicasiski?
Kuna jan walinakatï aka oraqen utjki ukanakjja, niyaw Jehová Diosajj Reinop toqejj chhaqtayani. Uka yatiyäwejj wali sumapuniwa, ukatwa taqe jaqenakan uk yatipjjañapajj wakisi. Jesusajja arkirinakapan uka suma yatiyäwi oraqpachan yatiyapjjañapwa munäna (Mateo 28:19, 20). Jesusan uka arunakapar istʼapjjatapjja, ¿kunjamsa Jehová Diosan Testigonakapajj uñachtʼayapjje?
1. ¿Kunjamsa Mateo 24:14 textojj jichha tiempon phoqasiski?
Jesusajj akham sänwa: “Reinon aka suma yatiyäwinakapajja, aka oraqpachanwa yatiyasini” sasa (Mateo 24:14). Uka suma yatiyäwinak yatiyañajj Jehová Diosan Testigonakaparojj walpun gustapjjetu. Aka oraqpachanjja, 1.000 jila arunakanwa uka suma yatiyäwinak yatiyapjjta. Ukham lurasiñapatakejja suma organiztʼatäña ukhamarak chʼamachasiñaw wakisi. Cheqas Jehová Diosan yanaptʼapampiw uk lurapjjta.
2. ¿Kunanaksa jaqenakar predicañatakejj lurapjjta?
Kawkjanakantï jaqenakajj utjki uka cheqanakanwa predicapjjta. Ukatjja nayrïr cristianonakjamaw ‘utat ut’ predicapjjarakta (Hechos 5:42). Ukham organiztʼatäsaw sapa marajj walja waranqa waranqa jaqenakar suma yatiyäwinak yatiyapjjta. Ukampis jaqenakajj janiw utapankapkapuniti, ukatwa kawkjantï walja jaqenakajj utjki uka cheqanakan yatiyapjjta. Jehová Diosatsa kun lurañtï jupajj amtki uka toqetsa, jaqenakar yatiyañatakejj chʼamachasipjjapuntwa.
3. ¿Khitinakas suma yatiyäwinak yatiyapjjañapa?
Cheqpach cristianonakaw suma yatiyäwinak yatiyapjjañapa. Uk lurañajj nanakatakejj wali importantewa. Jaqenakajj suma yatiyäwinak istʼasakiw salvasipjjaspa, ukatwa predicañatak wal chʼamachasipjjta (1 Timoteo 4:16 liytʼäta). Ukham lurapjjatajat janiw khitis pagapkituti, Bibliajja akham siwa: “Gratisakiw katoqapjjtajja, gratisakirak churapjjam” sasa (Mateo 10:7, 8). Jaqenakajj janis istʼañ munapkchejja predicasipkaktwa, ukham lurasaw Jehová Diosar istʼapjjataj uñachtʼayapjjta, juparus kusisiyapjjarakta.
JUKʼAMP YATJJATAÑÄNI
Aka oraqpachan predicasiñapatakejj kunanaksa Jehová Diosan Testigonakapajj lurasipkta, kunjamsa Jehová Diosajj yanaptʼapjjetu ukanakatwa jichhajj yatjjatañäni.
Oraqpachanwa predicapjjta: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Taqe jaqenakar yatiyañatakiw chʼamachasipjjta
Jehová Diosan Testigonakapajja, jaqenakar suma yatiyäwinak yatiyañatakiw taqe cheqan chʼamachasipjjta. VIDEO uñtasajja aka toqetwa parltʼapjjäta:
¿Kunanaktï Jehová Diosan Testigonakapajj lurapkta ukanakat kawkïris jumar wal musparaytamjja?
Mateo 22:39; Romanos 10:13-15 liytʼasajja aka toqetwa parltʼapjjäta:
¿Kunjamsa predicasajj jaqenakar munasipjjataj uñachtʼayaptjja?
Suma yatiyäwinak yatiyapki ukanakarojja, ¿kunjamsa Jehová Diosajj uñji? (Romanos 10:15 uñjjattʼapjjäta).
5. Diosamp chikaw trabajipjjta
Jehová Diosajj predicacionan pʼeqtʼaskatapjja, kunaymaninakatwa yattanjja. Kunatï Nueva Zelanda markan paskäna uk uñjañäni, Paul sat mä Testigojja mä jaypʼojj utat uta yatiykasajj mä warmiruw predicäna. Uka alwajja uka warmejj Jehová Diosarojj sutipatwa orasïna, jupar maynin visittʼañapwa mayirakïna. Kimsa hora pasatatsti Paul jilataw punkup leqtʼäna.
1 Corintios 3:9 liytʼasajja aka toqetwa parltʼapjjäta:
Kunatï Nueva Zelanda markan paskäna ukajja, ¿kunjamsa Jehová Diosajj predicación pʼeqtʼaskatap uñachtʼayi?
Hechos 1:8 liytʼasajja aka toqetwa parltʼapjjäta:
¿Kunatsa predicaskakiñatakejj Jehová Diosan yanaptʼapajj munasi?
¿Yatiyätati?
Chika semanan apaski uka tantachäwinakanjja, kunjamsa predicapjjerista ukwa yatichapjjetu. Uka tantachäwirutï sarsta ukhajja, ¿jumatakejj ukham yatichasitapajj kunjamakisa?
6. Predicasajj Diosaruw istʼasipkta
Nayrïr patak maranakanjja, Jesusan arkirinakaparojj enemigonakapaw predicañ jarkʼapjjäna. Ukampis uka cristianonakajj ‘suma yatiyäwinak yatiyasiñapatakejj leyinakarjamaw arjjatapjjäna’ (Filipenses 1:7). Jichhürunakanjja ukhamarakwa Jehová Diosan Testigonakapajj lurapjjta.a
Hechos 5:27-42 liytʼasajja aka toqetwa parltʼapjjäta:
¿Kunatsa Jehová Diosan Testigonakapajj predicasipkakëjja? (Hechos 5:29, 38, 39 uñjjattʼapjjäta).
YAQHEPANAKAJJ AKHAM SAPJJEWA: “¿Kunatsa Jehová Diosan Testigonakapajj utat ut predicapjje?” sasa.
¿Jumajj uka toqet kamsasmasa?
¿KUNSA YATEQAWAYTAN?
Jesusajja taqe markanakan suma yatiyäwinak yatiyapjjañapatakiw arkirinakaparojj khitäna. Jehová Diosaw markaparojj suma yatiyäwinak yatiyapjjañapatak yanaptʼaski.
Amtañataki
Suma yatiyäwinak oraqpachan yatiyañatakejja, ¿kunanakas lurasiski?
¿Kunjamsa predicasajj jaqenakar munasitas uñachtʼaytanjja?
¿Predicasajj kusisitäsnawa sasmati? ¿Kunatsa ukham amuyta?
JUKʼAMP YATJJATAÑAMATAKI
Kunjamsa jachʼa markanakan Jehová Diosan Testigonakapajj predicapjje uk videon uñtam.
Walja jaqenakajj utjki uka cheqanakanwa París markan predicapjje (5:11)
Campos de refugiados ukan jakirinakarojja, ¿kunjamsa Jehová Diosan Testigonakapajj predicawayapjje?
Mä kullakarojj kunjamsa misionerat serviñajj kusisita jakasiñatak yanaptʼäna uk videon uñtam.
Jehová Diosan Testigonakapajj tribunalanakanwa atipjawayapjje, ukajj kunjamsa suma yatiyäwinak yatiyasiskakiñapatakejj yanaptʼawayi uk yatjjatam.
a Diosan mayitaparjamaw Jehová Diosan Testigonakapajj predicapjjta, ukatwa suma yatiyäwinak yatiyañatakejj autoridädanakat permiso mayiñajj jan wakiskiti.