Diosar jakʼachasipxam
Diosax chuymasarjam kuns luriri lurtʼasiwayistu
WAWÄKASIN jan walinakan uñjasitaj laykux Dios contrax juchachasipuniw sasaw mä kullakax amuyäna, ukatwa akham säna: “Diosan chuymapch ustʼaykä sasin wal axsarayasta” sasa. Ukampis ¿ukham amuyatapax walikïspachänti? ¿Nayra jakäwisarjamapunit jan walin uñjassna? Janiwa. Diosax chuymasarjam kuns luriri lurtʼasiwayistu, ukhamat kunjamänis jakäwisax uk ajlliraksna. Chiqansa, Jupax suma amtanakar puriñaswa muni, ukat Arupaw kunjamsa suma amtar pursna uk qhanañchistu. Kuntï Moisesax Deuteronomio 30 jaljan qillqkäna uk yatxatañäni.
Diosar istʼañax janiw faciläkiti ukat Jupax kuntï jiwasat maykistu uk amuyañax chʼamakiwa sasin inas awisax amuyirïstan.a Ukampis aka arunakat amuykiptʼañäni: “Aka mandamiento arunak jichhüruna churapksma ukanakax janiw jumanakatakix sinti chʼamäkiti, janirakiw jan phuqhañjamäkarakisa” (11 jiskʼa tʼaqa). Ukhamawa, Jehová Diosax janiw jan phuqañjamäki ukanak maykistuti. Ukhamarus kawkïrinakas mandamientonakapax ukxa taqiniw yatxatsna. Ukatakix janiw “alaxpacharu” makatañasax wakiskiti, janirakiw “jachʼa quta” khurkataru makatañäkarakisa (12, 13 jiskʼa tʼaqanaka). Kunatï lurañasäki ukxa Bibliax wali sum qhanañchtʼistu (Miqueas 6:8).
Jehová Diosax janiw Jupar istʼañasatakix waytʼkistuti. Moisés tuqnamxa akham sasaw säna: “Jichhüruw ajllisiñamataki churapxsma, mä tuqitxa jakañampi, suma sarnaqañampi; mä tuqitsti jiwañampi jan waltʼañampiraki” sasa (15 jiskʼa tʼaqa). Mä arunxa, Diosar istʼañänixa bendicionanak katuqañäni, ukampis jan istʼkañänixa jan walinakaruw purtʼasiñäni. Chiqansa, sapa mayniw jakañampi, suma sarnaqañampi, jan ukasti jiwañampi, jan waltʼañampi ajllsnaxa. Kawkïrsa ajlliñäni ukax sapa maynitäxiwa (16-18 jiskʼa tʼaqakama; Gálatas 6:7, 8).
¿Kuna amtarutï purkañäni ukxa Diosax uñjaskpachati? Jïsa, kunattix “jakaña ajllisipxam” sasaw Moisesax Diosan amuytʼayatäsin arsüna (19 jiskʼa tʼaqa). Ukampis ¿kunjamsa jakañ ajllssna? Moisés pachpaw akham sas qhanañchäna: “[Jehová] Diosamarusti munapxam, istʼapxarakim, suma iyawsañampi arkapxarakim” sasa (20 jiskʼa tʼaqa). Chiqpachansa, jan walin uñjaskasasa Jehová Diosar munatas laykuw Jupar istʼaskakiñäni ukat janirakiw Jupat jithiqtkañäniti. Ukhamatwa jakañ ajllitas uñachtʼaytanxa. Uka jakañasti wali suma jakäwïwa janirakiw ukham jakañax jichhürun utjkaspati. Jiwasatï Diosat jan jithiqtkañänixa, jutïrpachan wiñay jakañwa katuqaraksna (2 Pedro 3:11-13; 1 Juan 5:3).
Moisesan uka arunakapaw wali chʼamañchtʼkirixa, kunattix ak amuytʼayistu: kuna jan walinsay aka ñanqha pachanx uñjasiwaystan Diosarux jan jithiqtas luqtaskaksnawa. Jehová Diosax chuymasarjam kuns luriri lurtʼasiwayistu, ukhamatwa jiwasarux wali askit uñjarakistu. Jupar munasiñsa, istʼañsa ukat jan jithiqtañsa sapa mayniw amtxañasa. Ukat chʼamachasitassa bendecirakiniwa.
Taqiniw Diosar luqtañ ajllsnaxa uk amtañaw qalltan parlkayätan uka kullakarux chuymachtʼäna. Jupax akham siwa: “Jehová Diosaruw taqi kunat sipans wal munasta ukat Jupar munasitaj laykuw luqtaskakïxa, ukampis awisax uk armtʼastwa” sasa. Jehová Diosan yanaptʼapampix Jupar luqtaraksnawa.
[Qhanañchäwi]
a “Diosar jakʼachasipxam: ¿Kunsa Jehová Diosax jiwasanakar mayistu?” siski uka yatichäwi uñxattʼäta. Uka yatichäwix 10 jananwa jikxatasi.