Aka qhipa urunakan Jehová Diosar atinisiñäni

“[Jehová] Tatiturupun iyawsapxam.” (ISA. 26:4.)

1. ¿Akapachankir jaqinakat sipansa khitirus jiwasax atinistanxa?

JANIW khitirus ni kunarus atinisiñjamäxiti sasaw jaqinakax sapxi. Ukax chiqäskapuniwa, chuym pʼakintasiñax kunjamatsa akapachan utjakipuniwa. Ukampis chiqa cristianonakax wal amuyastanxa. Janiw akapacharusa ni ‘jilïrinakaparus’ atinisktanti (Sal. 146:3). Jan ukasti, Jehová Diosaruw atinistanxa, Jupaw jutïrinxa wali munasiñampi uñjaskistani ukat arunakapsa phuqarakini sasaw taqi chuym atinistanxa (Rom. 3:4; 8:38, 39).

2. Jehová Diosan wali atinisiñjam Diosätapxa, ¿kunjamsa Josué chachax uñachtʼayäna?

² Jehová Diosax wali atinisiñjam Diosawa sasaw Josué chachax niya jiwañampïxasax nayra israelitanakar säna: “Muntwa jumanakan amtasiñanakama taqi chuymanakamampi, ukhamaraki taqi jakañanakamampiraki. Diosasti taqi suma arunakapwa jumanakampi phuqhi, kunjämtï jupax arsüna ukhama” sasa (Jos. 23:14).

3. ¿Diosan sutipax kunsa Jupxat yatichistu?

³ Jehová Diosax janiw yupaychirinakapar munasakix arunakap phuqkiti, jan ukasti, sutip laykuw phuqaraki (Éxo. 3:14, NM; 1 Sam. 12:22). Diosan sutipat parlkasinxa akham sasaw mä Bibliax qalltan qhanañchi: “Diosan arunakapasti jiwasatakix wali sumapuniwa: Diosax kuns lurakispawa, janiw Jupatakix kunas chʼamäkiti ukat kunay munaschi ukanakwa luraspa. Uka suti laykux taqi arunakapwa Diosax phuqani. Kunjam Diosas ukwa uka sutix qhanañchistu ukat Jupat amtasiñwa yanaptʼarakistu. Diosax uka Sutirjamapuniw kuns phuqi, janipuniw kunäkipansa uka suti imantkaniti” sasa (The Emphasized Bible, J. B. Rotherham).

4. 1) ¿Kunsa Isaías 26:4 qillqatax amtayistu? 2) ¿Kunanaksa aka yatichäwin uñjaskañäni?

⁴ Sapa maynis akham jisktʼasiñäni: “¿Diosarux sumti uñtʼtxa ukat taqi chuymat atinistxa? Kunanakas jutïr urunakan pasani ukxa, ¿Diosaw sum uñjaskani sasat atinistxa?” sasa. Isaías 26:4 qillqatax akham sistuwa: “Tatiturupun iyawsapxam, jupaw jiwasan wiñay arxatirisaxa” sasa. Jehová Diosax janis nayra tiemponjam milagronak lurkchixa, yupaychirinakapar ‘arxataskakiwa’, ukatwa jupar ‘iyawsañasaxa’. Ukhamax ¿kunjamatsa wali atiniskaña Diosax yupaychirinakaparux yanaptʼi? Ukanak kimsa tuqit uñjañäni. 1) Yantʼanakar atipañatakiw chʼam churistu. 2) Jan istʼañ munapki ukat uñisiñat arknaqapkistu ukhaw yanaptʼistu. 3) Llakinakan uñjastan ukhaw chuymacharakistu. Ukanakat yatiqkasaxa, kunjamatsa Diosar jukʼampi atinissna uk amuytʼapxañäni.

Yantʼanakanxa Diosar atinisiñäni

5. ¿Kunapachas Diosar jaysañax chʼamäspa?

⁵ Kunapachatï Diosan Arupanxa Paraíso tuqitsa jan ukax jiwatanakan jaktaniñapatsa parlki ukhaxa, jankʼakiw chuymar katuqasisin iyawstanxa. Ukampis qʼum sarnaqañ tuqit parlir kamachinakar istʼañax chʼamakïspawa, ukat yantʼanakan uñjastan ukhaw Diosar taqi chuym atinisitassa ukat askit uñjatassa qhan uñachtʼaytanxa. Wali yatiñani Salomón reyix akham iwxtʼistu: “Tatitur taqi chuymamampi katuyasim; juman chʼikhi kankañamarukix jan alkatasimti. Taqi luräwinakamanxa Tatitutxa amtasipunim, ukatsti jupax chiqa thakinjamwa irpaskätam” sasa (Pro. 3:5, 6). ¿Amuytanti? ‘Luräwinakampita’ ‘thakimpita’ parli. Ukhamasti, janiw jutïr bendicionanak suyasakix Diosar atinisitas uñachtʼayksnati, jan ukasti sarnaqäwisampi uñachtʼayañasawa. Ukhamax ¿yantʼanakan uñjasisax kunjamatsa Diosar taqi chuym atinisitas uñachtʼaysna?

6. ¿Jan wali amuyunakar atipañatakix kun lurañas wakisispa?

⁶ Kunjamtï yattanxa, jan walinak amuyasaw jan walinak lurtanxa, ukhamax kunanakas pʼiqir mantistu ukanak amuyañasawa (Romanos 8:5 ukat Efesios 2:3 liytʼasiñapawa). Ukampis ¿uka jan wali amuyunak pʼiqit apsuñatakix kun lurañas wakisispa? Uk jichhax phisqa tuqit amuytʼañäni. 1) Diosampi yanaptʼayasiñasawa (Mat. 6:9, 13). 2) Nayra tiempox khitinakas Diosar istʼasax askinak katuqapxäna, ukat khitinakas jan istʼasax jan walinakar puripxäna, ukanak yatxatasin lupʼiñasawa (1 Cor. 10:8-11).a 3) Juchar purisax qhawqsa chuym usuyassna ukat familiasarus llakisiysna uk amuytʼañasawa. 4) Juchar pursna ukhax kunjamsa Jehová Diosax jikxatasispa uk amtañasarakiwa (Salmo 78:40, 41 liytʼasiñapawa). 5) Ukat jaqin uñjkatas jan ukax sapäkasas jan walinak maysar apanukusin askinak lurañäni ukhaxa, qhawqsa Diosax kusisini uk amtañasarakiwa (Sal. 15:1, 2; Pro. 27:11). Jïsa, wali amuyumpi sarnaqañäni ukhaxa, Diosar taqi chuym atinisitaswa uñachtʼayañäni.

Jan istʼañ munatasa arknaqatas Diosar atinisiñäni

7. ¿Kuna jan walinakansa Jeremiasax uñjasïna, ukat kunjamas awisax jikxatasïna?

⁷ Yaqhip chiqanakanxa janiw Diosan arunakapat istʼañ munapkiti. Jeremías profetas ukhamarakiw aguantäna. Judá markax tukusiñampïkäna uka jan wali urunakanxa, jupaw Diosan arunakapat yatiyäna. Diosax kunjamsa uka markar tʼunjañapäna uk sapür yatiyasaw Diosar taqi chuym atinisitapxa uñachtʼayäna. Ukat mä tiemponxa, Baruc sat yanapiripas janiw aguantañ munxänti (Jer. 45:2, 3). ¿Taqi ukanak uñjasax pachparukit Jeremiasax aynachtʼxäna? Mä kutix chuyma ustʼataw akham säna: “¡Maldecitäpan kunürutix naskta uka uruxa! [...] ¿Kunataraki nayasti taykaxan purakapata mistpachätsti, tʼaqhisiñanaka, llakisiñanaka uñjañatakisti, ukhamaraki jakañaxasa mä pʼinqa tukuyatäñapataki?” sasa (Jer. 20:14, 15, 18).

8, 9. Jeremías 17:7, 8 ukat Salmo 1:1-3 qillqatanakarjamaxa, ¿achunak churaskakiñatakix kun lurañas wakisi?

⁸ Ukhampachas Jeremiasax Diosar atinisiskakïnwa. Ukatwa kuntï Jeremías 17:7, 8 qillqatan siski uka arunak phuqasirsa uñjäna, ukan akham siwa: “Qullanawa kawkïri jaqitix nayaru iyawskitu, ukhamaraki taqi suytʼañapsa nayaru uskkaraki ukaxa. Jalir umani jawir thiyaru ayruntata quqjamäniwa, saphinakapasti uka uma tuqiru saphintatarakiwa, kunapachatix lupix purinki ukkhasti janiw axsarkarakiti, laphinakapasa taqi horasansa chʼuxñakïskaniwa. Waña horasa purinipansti janiw mayjtʼaskaniti, taqi horasansa achunikïskaniwa” sasa.

⁹ Jïsa, Jeremiasax “jawir thiyan ayruntat quqar uñtatawa” suma achunak churaskakïna. Uñisirinakax jan wali arunakampis chuym ustʼayapkchïnxa, jakañ uma churiri Jehová Diosaruw wal katuntasïna, ukat arunakapsa taqi chuymaw katuqasïna (Salmo 1:1-3 liytʼasiñapawa; Jer. 20:9). Chiqas taqiniruw Jeremiasan sarnaqäwipax yanaptʼistaspa, ukampis Diosan arunakap jan istʼañ munapki uka chiqanakan yatiyir jilat kullakanakaruw jukʼampix yanaptʼaspa. Jumatix ukhaman jikxatassta ukhaxa, Diosar taqi chuym atinisiñamawa. Jupaw ‘sutipat qhanañchañamatakix’ chʼam churätamxa (Heb. 13:15, MT).

10. ¿Kuna bendicionanakas jiwasatakix utji, ukat kunsa jisktʼasiñasa?

¹⁰ Aka qhipa urunakanxa, Jehová Diosax kunayman tuqitwa jan walinakar saykatañ yanaptʼistu. Mayax pachpa Bibliawa, jichhax walja arunakaruw phuqatpach sum jaqukipasiski. Ukatxa, Amuyasiri Chiqapa Uywata tuqirakiw arunakapat tiempopar yatichistu, mä suma manqʼäkaspas ukham churistu. Ukat tantachäwinakansa, jachʼa tantachäwinakansa kunayman jilat kullakanakampiw maynit maynikam chʼamachastanxa. ¿Jumax uka bendicionanakat askinak apsusktati? Khitinakatï ukham lurapxani ukanakaxa, “kusisiñatsa qʼuchusipxaniwa, chuymanakapan kusisiñax utjatap layku”. Ukampis jan istʼasirinakax wal “wararipxa[ni], llakisiñatsa chuymanaka[pax] kawkstʼatarakïniwa” (Isa. 65:13, 14).

Llakinakan uñjasisax Diosar atinisiñäni

11, 12. Aka jan wali pachanxa, ¿kunjamatsa amuytʼasirïtas uñachtʼaysna?

¹¹ Kunjamtï profecianakan siskixa, akapachax jan walinakampi phuqantatawa (Mat. 24:6-8; Apo. 12:12). Amuytʼañäni, kunapachatï umax wal qutantasi jan ukax apasirjamäki ukhax jankʼakiw uta patarusa jan ukax qullu patarus makattanxa. Niya ukar uñtasitaw jaqinakax jan walinak jilxattipanxa politicarus yupaychäwinakarus atinisipxi. Jan walinakat jaltañatakix ciencia tuqirus jan ukax kuna organizacionarus atinisipxakiwa. Ukampis ukanakax inamayakiwa (Jer. 17:5, 6). Cristianonakasti, Jehová Diosaruw atinistanxa, jupaw “jiwasan wiñay [‘imantasiñ qarqasaxa’, NM]” (Isa. 26:4). Ukatwa salmonak qillqirix akham säna: “[Jehová Diosaw] qhispiyitu, arxatarakitu. Janiw tinkkäti, jupaw imantasiñaxaxa” sasa (Salmo 62:6-9 liytʼasiñapawa). Ukampis ¿uka jachʼa Qarqan imantasiñatakix kun lurañas wakisi?

¹² Jaqinakatakix Diosan Arupar istʼañax janis askïkchixa, jiwasax taqi chuymaw istʼtanxa (Sal. 73:23, 24). Akapachanxa mayj amuyapxi. “Wiñayat jakañänisti, taqi kunas tiemponikiwa”. “Jachʼa yatiqañ utanakar sarañasawa”. “Jakkasakiw qullqs muntanxa”. “Jumatix ak alasïtaxa, khusaw sarnaqäta”. “Yaqha chiqanaks uñtʼaniñasawa” sasaw parlapxi. Ukampis Diosan Arupanxa akham sasaw amtayistu: “Akapachan kuna aski jikxatirinakasa, janis kunsa jikxatapkaspa ukhamaw tukupxañaparaki, aka uraqisti niyaw tukusiski” sasa (1 Cor. 7:31). Jiwasax ukarjam sarnaqañatakiw chʼamachastanxa. Ukat kunjamtï Jesusax siskänxa, Diosan Apnaqäwip nayrar uchasaw alaxpachar jan khitin apaqkañ “suma yänaka imas[tanxa]” (Mat. 6:19, 20).

13. Kuntï 1 Juan 2:15-17 qillqatan siski ukarjamaxa, ¿kuna tuqinakat jisktʼasiñasasa?

¹³ ¿Jumax kunjam chuymampis akapacharus ukat yänakaparus uñjaskta? ¿Diosar taqi chuym atinisitamti uñachtʼayaskta? (1 Juan 2:15-17.) ¿Jumatakix Diosar luqtañasa ukat taman luräwinak katuqañas yänakat sipansa jukʼamp askiti? (Fili. 3:8.) ¿‘Suma nayranïñatakit’ chʼamachasta? (Mat. 6:22.) Diosax janiw lurañanakam jaytapxam siskiti, yämas familianinakax trabajapxañapawa (1 Tim. 5:8). Ukampis Jupar atinissna ukwa Jehová Diosax muni, janiw Supayan apnaqat tukusir akapachar atinisiñas munkiti (Heb. 13:5).

14-16. ¿‘Suma nayranïsasa’ ukat Diosan Apnaqäwip nayrar uchasas kuna bendicionanaksa yaqhip jilat kullakanakax katuqapxi?

¹⁴ Kimsa wawani mä chacha warmit parltʼañäni, Ricardo ukat Ruth satäpxiwa. Jilatax kham siwa: “Sumakiw familiajan qamasipxayäta. Ukampis chuymajanxa, jukʼamp Diosatakix irnaqañ munaskirïta, jiltʼaksa churkirista ukham amuyasiyäta. Ukatwa Diosat maytʼasisax chacha warmix qullqi tuqit parltʼasipxta. Markan qullqi tuqit pistʼañas utjkchïnxa, pusürukiw irnaqir jutäxa sasaw pʼiqtʼirijar sista. Iyaw satax ukarjamaw mä phaxsit irnaqañ qalltawayta” sasa. ¿Jichhax kunjamakis jikxatasipxpacha?

¹⁵ Ricardox akham saskakiwa: “Jichhax sapa patakat pä tunka iraqapxitu. Ukampis familiajatakis wawanakar yatichañatakis phisqa tunka urunakampiw maran utjxitu. Ukat qhawqha horanaktï yatiyirïkta ukat sipans jichhax mä ukhampi yatiyxta, ukat waljaniruw Bibliat yaticharakta, tamatakis tiempox utjxarakiwa. Ukat niyakixay wawanak uñjañatakis tiempox utjxchixa, esposajax precursor auxiliarjamaw mä qhawqha phaxsinakax irnaqtʼawayi. Jichhax ukham irnaqtʼañatakix chʼamachasisipkakïwa” sasa.

¹⁶ Ukat Roy jilatampi Petina kullakampix Diosan arunakapat jukʼamp yatiyañ munasarakiw jukʼa tiempoki trabajxapxi, jichhax mä wawampikiw utan jakxapxi. Jilatax akham siwa: “Nayax kimsa urukiw semanan irnaqxta, esposajax pä urukiw irnaqxaraki. Ukat mä jachʼa uta jaytasinxa tantiy mä utar qamirikiw sarxapxta. Janïr wawanïkasax precursorjamaw luqtapxayäta, ukat pä wawanïkasas ukham lurañ munasipkakiyätwa, ukatwa wawanakan jilarxipanxa mayampi precursorjam qalltawayapxta. Nanakatakix Diosan bendicionanakapax qullqit sipansa, qurit sipansa wali askipuniwa” sasa.

Diosaw samarañ churistani

17. ¿Jutïr urunakat jan sinti llakisiñatakix kunjamsa Diosan Arupax yanaptʼawaytamxa?

¹⁷ Kunas qharürux pasani ukxa janiw khitis yatktanti, ukat mä akatjamatwa kuna ‘jan waltʼañas’ utjaraki (Ecl. 9:11). Ukampis jiwasax janiw Diosar jan uñtʼir jaqinakjamax sinti llakisktanti (Mat. 6:34). Pablox akham sasaw sistu: “Jan jumanakax kunats llakisipxamti, taqi kunsa Diosar sapxam oracionana, mayipxam yuspagarapxarakim. Diosax jumanakarux churapxarakïtamwa samarañapa, ukasti taqi kuntix jaqix amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa” sasa (Fili. 4:6, 7).

18, 19. ¿Kuna tuqinakatsa Jehová Diosax yanaptʼistu? Uk qhanañchtʼam.

¹⁸ Wali llakinakan uñjaskasas walja jilat kullakanakaw Diosan samarañap katuqawayapxi. Mä kullakax akham siwa: “Mä kutixa, akham sasaw operañapäkäna uka doctorax tuqitu: ‘¿Luqhïtat kunaraki wila jan uchayasiñatakisti?’ sasa. Ukat kunayman parlasaw wil uchayañ munitu. Nayax ukhasa yaqha horasasa Jehová Diosaruw chuymajan maytʼasta, ukat jupaw jan aynachtʼañatakix chʼam churitu. Ukat usutpachasa, wila tuqit jan waltʼkasas walpun thurtʼasiwayta. Kunatsa wila uchayasiñax jan walïki ukxa Bibliampiw doctorarux sum qhanañchawayta” sasa.

¹⁹ Awisaxa jilat kullakanak tuqiw Jehová Diosax yanaptʼistaspa. Ukat Bibliat apstʼat qillqatanak tuqiw tiempopar yanaptʼarakistu. Ukatwa yaqhip jilat kullakanakax akham sapxi: “Aka qillqatax nayatakjamapuniwa” sasa. Jïsa, walinsa jan walinsa Jehová Diosar taqi chuym atinisiñäni ukhaxa, wali munasiñampiw yanaptʼistani. Ukhamarus jiwasax munat uwijaparakïtanwa, ukat qullan sutip apiri markapätanwa (Sal. 100:3; Juan 10:16; Hech. 15:14, 17).

20. Supayan apnaqat akapachax tukusini ukhaxa, ¿kunatsa Diosan yupaychirinakapax jan axsarapkani?

²⁰ “Tatitun colerasïwi urupanxa” kunanakarutï akapachan atinisipki ukanakax qʼala tʼunjatäniwa. Qullqipasa, quripasa, yänakapas inamayäniwa (Sof. 1:18; Pro. 11:4). Ukampis jiwasax Jehová Diosaruw imantasiñäni, jupaw “wiñay [‘imantasiñ qarqasaxa’, NM]” (Isa. 26:4). Ukhamasti, sapürus arunakapar istʼasapuni sarnaqapxañäni, jan istʼañ munatasa uñisitpachasa arunakapat yatiyasipkakiñäni ukat kuna llakinaksa juparu katuyapxañäni. Ukarjam sarnaqirix “sumankañanwa jakasini, ukatsti janiw axsarayaskaniti kuna jan waltʼañanakansa” (Pro. 1:33).

[Qhanañchäwi]

¿Qhanañchtʼasmati?

• ¿Yantʼanakan uñjasisax kunjamatsa Diosar atinisitas uñachtʼaytanxa?

• ¿Jan istʼañ munatasa ukat arknaqatasa kunjamatsa Diosar atinisitas uñachtʼaytanxa?

• ¿Llakinakan uñjasisax kunjamatsa Diosar atinisitas uñachtʼaytanxa?

[13 janan fotopa]

Diosan kamachinakap taqi chuym phuqasax kusisitaw jakasiñäni

[15 janan fotopa]

Jehová Diosaw wiñay imantasiñ qarqasaxa