Sarnaqäwi

Paqallqo tunka maranakaw ‘mä judio jaqen isipat katuntasita’ sarnaqta

Leonard Smith jilatan arsutaparjama

Qʼajjo waynitükayäta ukhaw Biblian pä textopajj chuymar purtʼawayitu. Nayrïrejj Zacarías 8:23 qellqatawa. Ukanjja “tunka jan uñtʼatanakaw” “mä judío jaqerojj isipat katuntasip[jje]” ukat “¡jumanakamp saraña munapjjta, nanakasti istʼapjjtwa Diosajj jumanakampïtapa!” siwa, uka textojj kamsañsa muni uk kunjamsa amuyayäta ukjja jichhakamaw amtasiskta, ukhat jichhakamajj 70 maranakaw pasawayjje.

JUDIO jaqejja alajjpachar sarañataki ajllitanakampi sasiwa, ukat ‘tunka jan uñtʼata’ jaqenakajj ‘yaqha uwijanakjam’ sasirakiwa, uka tiemponjja, “Jonadab” sasin uñtʼatäpjjänwa (Juan 10:16).a Ukanak sum amuyasajja, ajllitanakar yanaptʼasakiw aka Oraqen wiñay jakañ suytʼäwinïrista sasin amuyayäta.

Payïri textojj Mateo 25:31-46 qellqatawa, ukanjja Jesusajj “uwijanakata” ukat “cabritonakatwa” parli. Uwijanakajja, Oraqenkasipki uka ajllitanakar yanaptʼapjjatapat qhepa urunakan askit uñjatäpki ukanakawa. Ukatwa “Jonadab” waynäsajj akham amuytʼasiyäta: “Jesucristojj nayar mä uwijaparjam uñjañapatakejj ajllit jilanakaparuw yanaptʼañajaspa, ukat jupanakampi irpayasiñajaspawa, Diosajjay jupanakampïskchejja” sasa. Ukham amuyatajaw jakäwijan yanaptʼawayitu.

“¿NAYAJJ KUNSA LURÄJJA?”

Mamajajj 1925 maranwa Betelankir tantachasiñ utan bautisasiwayi, uka tiemponjja Tabernáculo de Londres sasin uñtʼatänwa, uka cheqankir jilat kullakanakajj ukanwa tantachasipjjerïna. Nayajj octubre 15, 1926 maranwa nasta, ukatjja Inglaterra markankir Dover cheqanwa marzo 1940 maran mä jachʼa tantachäwin bautisasiwayta. Ukat sapürutjamaw Biblian yatichäwinakapar jukʼamp munasiyäta. Niyakejjay mamajajj alajjpachar sarañataki ajllitächïnjja, jupatwa ‘judío jaqen isipatsa katuntaskirista’ ukham Diosar jukʼamp serviñ qalltawayta. Uka tiemponjja tatajas jilïr kullakajas janiw Jehová Diosar servipkänti. Nänakajj Inglaterra markat niya aynach toqenkir Gillingham sat tamaruw sarapjjayäta, uka tamanjja niya taqeniw ajllitanakäpjjäna. Mamajajj yateqaskayaw Diosan arunakap taqe chuyma ukat kusisita yatiyäna.

Septiembre 1941 maranjja, Leicester markanwa mä jachʼa tantachäwejj apasïna, ukanwa “Integridad” sat pʼeqeñchäwin mä arstʼäwi istʼta, ukat khitis taqe kunjaru munañanejja uk qhanañchasïna. Uk istʼasaw kunjamsa Supayajj Jehová Diosan Apnaqäwipar qallasiwayi uk sum amuyawayta, ukatpï Dios toqet saytʼasiñasa ukat Taqe Kunjjaru Munañani Diosarojj taqe chuyma serviñasajja.

Uka tantachäwinwa precursorjam Diosar serviñajj wali askïtap qhanañchasïna, ukat wayn tawaqonakarojj ukatakiw chʼamañchtʼasïna. Ukat “El lugar de los precursores en la organización” sat arstʼäwi istʼasaw “¿nayajj kunsa luräjja?” sasin jisktʼasta. Tantachäwi tukuyarojja, Diosan arunakap yatiyañwa ajllitanakar yanaptʼañaja sasaw amtawayta. Uka pachpanwa precursorjam serviñatakejj solicitud churayäta.

GUERRA TIEMPON PRECURSORÄTA

Diciembre 1, 1941 maranwa precursor especialjam serviñ qalltawayta, ukhajj 15 maranïyätwa. Mamajampiw precursor especialjam irnaqayäta, ukampis jupajj mara qhepatwa usuntasajj precursor especialjam irnaqtʼañ jaytjjäna. Ukatwa Londres markankir sucursalajj Ron Parkin jilatamp khitapjjetu. Uka jilatajja, Puerto Rico markankir sucursalanwa sarayirit irnaqtʼaski.

Kent markankir Broadstairs ukat Ramsgate sat markanak thiyanakaruw khitapjjetu, ukanwa mä cuarto alquilasipjjta. Precursor especialanakar yanaptʼañatakejj 40 chelines (8 dólar) qollqwa sapa phajjsejj churapjjerïtu. Uka qollqejj uta alquiler pagañatakikiw alcansiri, ukat jukʼitakiw jiltʼjjeri, awisajj kunsa manqʼasipjjäjja uk janiw yatisipjjerïkti. Ukampis kunanakatï wakiski ukanakjja Jehová Diosaw kunjamatsa churapjjerïtu.

Bicicletat wal sarnaqapjjayäta, alay toqenkir lamar qotat wal thaytʼaniri ukat jathi qʼepin kun sarañas chʼamakïriwa. Ukatjja, avionanakasa ukat alemanankir V-1 bombanakas sinti jakʼwa Kent marknam Londres markar pasapjjeri. Mä kutejja bicicletat saraskayäta, ukat mä bombajj pʼeqe patwa pasawayitu, ukatwa bicicletat jaqoqtasajj thaki kʼuchur liwkatta, ukat uka bombajj Kent jakʼarukiw phalli. Ukhampachasa, precursorjamajj wali kusisitaw jikjjatasiyäta.

‘BETELAN YANAPIR WAYNÄTWA’

Mamajajj wali sumpunwa Betelat parlirïna. “Betelan yanaptʼir mä waynäsmajj walpun kusisirista” sasaw sirïtu. Kunapachatï enero 1946 maran Londres markaru Betelan kimsa semana yanaptʼañatak mä invitación katoqasajj wal kusisiyäta. Uka tiempo tukuyatarojj Pryce Hughes jilataw akan quedasim situ, jupajj sucursal sarayirinakat maynïrïnwa. Kunanaktï Betelan yateqkta ukarjamaw sarnaqawayta.

Uka tiemponjja, 30 betelitanakakiw Londres markan utjäna, jila partejj soltero waynanakänwa, ukat ajllitanakas utjarakïnwa, jupanakatjja mä qhawqhanejj akanakawa: Pryce Hughes, Edgar Clay ukat Jack Barr, jupasti qhepatjj Oraqpachan Jilïr Irpirëjjänwa. ¡Waynatpach Criston jilanakapampi irnaqtʼañajj wali askipunïnwa! (Gál. 2:9.)

Mä urojja, mä kullakaw thaqasktam, punkunkaskiwa sasaw mä jilatajj situ. Uka kullakajj mamajataynawa ukat mä paquete aptʼataw suyaskitütu. Janiw mantkäti, lurañanakamatwa tiempo apaqerisma sasaw situ, ukat paquet churasin sarawayjje. Uka paquetenjja, thayataki mä suma abrigow utjatayna. Ukham munasiñampi apanitapajja, Anatwa amtayitu, jupajj tabernaculon serviri jiskʼa Samuelotakiw mä suma isi aparapirïna (1 Sam. 2:18, 19).

GALAAD: JAN ARMKAY EXPERIENCIA

Khä 1947 maranjja, Betelatwa phesqa jilat kullakanakar Estados Unidos markar Galaad escuelar sarañatak invittʼapjjetu. Ukat 1948 maranwa 11 yatichäwir sarapjjta. Ukat Nueva York markar kawkhantï uka Escuelajj apaskäna ukar puripjjta ukhajja, wali thayapunïnwa. ¡Mamajan abrigo churatapat walpun yuspärta!

Sojjta phajjsi Galaad escuelankañajj jan armkayapunïnwa. Kuna lurañanakajas utji ukjja, 16 markanakat jutiri jilat kullakanakampi parltʼasaw amuyta. Uka escuelanjja, janiw Diosar yupaychañ yatichäwinakakejj askïkänti, jan ukasti jilïr jilatanakamp chikachasiñasa wali askirakïnwa. Jupanakat kimsanitwa parltʼapjjäma, jupanakajj qhepatjja Oraqpachan Jilïr Irpirinakjamaw uttʼayatäjjapjjäna: Lloyd Barry, jupajj Galaad escuelan compañerojänwa; Albert Schroeder, jupajj yatichirijänwa, ukat John Booth, jupasti kawkhantï escuelajj apaskäna uka cheqanwa Granja del Reino ukan pʼeqtʼäna. Uka jilatanakan ewjjtʼanakapajja nätakejj qorïkaspas ukhamawa, ukat kunjamsa Jehová Diosaru taqe chuyma servipjjäna ukat markaparus atinisipjje ukajj yateqaskayapuniwa.

TAMANAK TUMPTʼIRJAMAW IRNAQTA UKAT BETELARUW KUTʼTA

Galaad escuelat mistusajja, Estados Unidos markankir tamanak tumptʼiriw khitapjjetu, Ohio sat markaru. Uka tiemponjja nayajj 21 maranikïyätwa, ukampis jilat kullakanakajj wali munasiñampiw katoqapjjetäna. Ukan irnaqtʼasaw wali experienciani jilatanakar yanaptʼañ yateqawayta.

Ukat mä qhawqha phajjsitjja, Brooklyn markankir Betelaruw jukʼampi wakichtʼatäñajatak invittʼapjjetu. Ukankasaw Diosan markapan jilïrinakaru uñtʼawayta, jupanakat mä qhawqhanejj akanakawa: Milton Henschel, Karl Klein, Nathan Knorr, T. J. (Bud) Sullivan ukat Lyman Swingle, jupanakajj Oraqpachan Jilïr Irpirinakjamaw yanaptʼawayapjjäna. ¡Kunjamsa trabajipjjäna ukat cristianonakjamas sarnaqapjjäna uk uñjasajj walpun yateqawayta! Ukat jukʼampiw Jehová Diosan markapar atinisiwayta. Ukatjja, Diosan arunakap yatiyaskakiñajatakejj wasitatwa Europa toqer khitapjjetu.

Mamajajj febrero 1950 maranwa jiwawayi. Imawïp qhepatjja, qhanwa tatajampi ukat Dora kullakajampi parlta. Niyakejjay mamitajj jiwatajjchejja, Bibliat yateqapjjätati jan ukajj kunsa lurapjjäta sasaw jisktʼta. Jupanakasti, Harry Browning ajllit jilataruw uñtʼapjjäna, juparojj wal respetapjjäna, ukat jupampiw Bibliat yatjjatañ qalltawayapjjäna. Ukat mä mara qhepatwa tatajampi kullakajampejj bautisasjjapjjatayna. Ukatjja, tatajajj irpir chuymanin yanapiripjamaw Gillingham taman uttʼayatäna. Jupan jiwatap qhepatjja, Dorajj irpir chuyman Roy Moreton sat jilatampiw casarasiwayi, ukat 2010 maranwa jiwawayjje, ukhakamaw Jehová Diosar yupaychawayaraki.

FRANCIA MARKANWA YANAPTʼTA

Mä escuelanwa alemán, latín ukat francés arunak yateqayäta, ukat francés aruw nätakejj jukʼamp chʼamänjja. Ukatwa París markankir Betelar yanaptʼir saram sapkitu ukhajj llakita ukat kusisitarak jikjjatasiyäta. Ukanjja, Henri Geiger jilatampiw trabajta, uka jilatasti ajllitarakïnwa ukat sucursal sarayirjamaw irnaqtʼäna. Kuntï lurkayäta ukanakajj janiw faciläkänti ukat walirak pantjasiyäta, ukampis taqenimpi sum apasiñ yateqawayta.

Ukhamarusa, walja markanakat jutapjjañapataki nayrïr jachʼa tantachäwi wakichañwa yanaptʼawayta. Uka tantachäwejj guerra tukuyata qheparuw 1951 maran París markan apasïna. Uk wakichañatakejj tamanak tumptʼir mä wayna jilataw yanaptʼitu, jupasti Léopold Jontès satawa, jupajj Betalaruw yanaptʼañatak jutäna, tiempompejj sucursal sarayirëjjänwa. Uka jachʼa tantachäwejj Torre Eiffel jakʼan Palais des sports ukanwa apasïna. Ukat 28 markanakatwa uka tantachäwir jutapjjäna. Qhep qhepa urusti, 10.456 jilat kullakanakaw tantachasipjjäna, uk yatisasti Francia markankir 6.000 jilat kullakanakajj walpun kusisipjjäna.

Kunapachatï nayajj Francia markar purkayäta ukhajja, janiw francés sum parlirïkayätti. Ukatjja, kunsa sañ munta uk sum yatiyäta ukhakiw parlirïta, ukampis ukajj janiw walïkänti. Kunattejj janitï pantjaskätajj janiw kunjamsa arsuña uk sapkätamti ukat janirakiw jukʼamp yateqkätati.

Ukatwa yaqha markat jutirinakan francés aru yateqapjjañapataki mä escuelar sapa arum sarirïta. Ukampis tantachäwinak utjkäna ukhakiw jan sarirïkti. Ukhamatwa francés aru parlañ yateqawayta, ukat marat maratjamaw jukʼamp sum parljjayäta. Uka aru yatiñajj wali askïnwa, kunattejj traduccionanwa sucursalan yanaptʼawayta, ukat tiempompejj inglés arutwa francés arur jaqokipjjayäta. Kuntï Amuyasir Cheqapa Uywatajj apayanki uk francés aru parlir jilat kullakanakar puriñapatak traduccionan yanaptʼañajj wali askipunïnwa (Mat. 24:45-47, MT).

CASARASTWA, YAQHA LURAÑANAK KATOQARAKTA

Khä 1956 maranwa Esther sat kullakamp casarasta, Suiza markatänwa ukat precursorjamaw serviskäna, juparojj mä qhawqha maranak nayraw uñtʼayäta. Londres markankir Betelan utjkäna uka Tantachasiñ Utanwa casarasipjjta, nayrajj Tabernáculo de Londres sasin uñtʼatänwa, ukanwa mamajajj bautisasïna. Hughes jilataw casarasipta ukhajj arstʼarapipjjetu. Estheran mamapajj ukankänwa, jupajj alajjpachar sarañatak suytʼäwinirakïnwa. Jaqechasisajja, janiw taqe chuyma munasiri ukat suma esposak jikjjatawaykti, jan ukasti Jehová Diosar taqe chuyma serviri suma suegra jikjjatawayarakta, jupajj 2000 maranwa Oraqen jakäwip tukuyawayjje.

Casarasjjasajj Betel jakʼaruw jakir sarjjapjjayäta. Nayajj Bibliat apstʼat qellqatanak traduciñwa yanaptʼaskayäta, Esterasti precursor especialjamaw París marka thiyan (qawayan) jakasir jaqenakarojj Diosan arunakap yatiyaskäna, ukat waljaniruw Diosan markapar mantañ yanaptʼawayi. 1964 maranwa Betelan jakañatak invitapjjetu, ukat 1976 maran Betel sarayirinak uttʼayañ qalltaskäna ukhajja, Francia markankir Betelaruw khitapjjetu. Esposajajj walja maranakaw wal yanaptʼawayitu.

“NAYAJJ JANIW JUMANAKAMPIPUNÏKÄTI”

Awisajj Nueva York markankir Betelaruw kuttʼirïta, ukasti nayatakejj wali kusiskañapunïnwa. Ukham sarasajja, Oraqpachan Jilïr Irpirinakan ewjjtʼanakap katoqasiskakiyätwa. Mä kutejja, kuna lurañanakatï Betelan utjkäna ukat tiempopar tukuyasiñapäkäna ukanakat llakisitajwa Knorr jilatar yatiyta, jupasti lartʼasisaw “jan llakisimti, jumajj luraskakim” sasin situ. Ukhat jichhakamaw walja lurañanaka utjkitu ukhajj jan sinti llakiskti, jan ukasti mayat mayatwa lurta. Ukham luratajj tiempoparuw tukuyasiraki.

Jesusan jiwañap jakʼäjjäna ukhajja, “nayajj janiw jumanakampipunïkäti” sasaw dicipulonakapar säna (Mat. 26:11). Ajllitanakajj janirakiw wiñayatak yaqha uwijanakampi chikajj aka Oraqenkapkaniti. Ukat jupanakar 70 maranak mä judío jaqen isipatsa katuntaskirista ukham yanaptʼasajj wal kusista.

[Qhanañchäwi]

[19 janan fotonakapa]

(Chʼeqa) Mamajampi tatajampi

(Kupi) Mamajajj churkitäna uka abrigoniw Galaad Escuelankaskta, 1948 mara

[20 janan fotopa]

Franciankir sucursalajj Diosar katuyaskäna ukhaw Lloyd Barry jilatan arstʼäwip francés arur jaqokipaskta (1997)

[21 janan fotonakapa]

(Chʼeqa) Esterampi casarasipkta uka uru

(Kupi) Diosan arunakap yatiyasipkta