Milagronakat ¿kawkïrinakas niya phoqhasiñampïski?
NIYAS operacionar mantañampïskasma ukham amuytʼañäni, ukat operir doctoratï jan operañ yatkaspa ukhajja, ¿kunjamakis jikjjatasisma? Cheqas wali llakitaw jikjjatasisma. Ukampirus operir doctoratï walja kut operirïspa ukat wali sum operañ yatirakispa ukhajja, janiw llakiskasmati, jan ukasti taqe kunas walikiw mistuni sasaw wal atinisisma janiw pächaskasmati.
Akapachajj niya ukar uñtasitarakiw mä usump usuntatäkaspas ukham jikjjatasiraki. Ukat uka usupat qollasiñapaw wakisi. Aka Oraqjja, mä suma paraisoruw tukuyäjja sasaw Jehová Diosajj Biblia toqnam arsuwayi, uka arunakapajj phoqhasipuniniwa (2 Pedro 3:13). Ukatakejj jan walinakaw nayraqatajj tukusiñapa (Salmo 37:9-11; Proverbios 2:21, 22). Ukhamasti, aka Oraqen mä suma paraisor tukuñapatakejja, kunatï jaqenakar mayjtʼayki ukanakaw nayraqatajj qʼal chhaqtañapa. ¡Ukaw cheqans muspharkañ mä jachʼa milagrönejja! (Apocalipsis 21:4, 5.)
Jehová Diosan Qhanañchirinakapajja, uka milagronakajj utjapuniniw sasaw taqe chuym wal atinisipjje. ¿Kunatsa? Kunattejja, Jehová Diosajj arunakap phoqhañatakejj chʼamaniwa, ukwa nayra milagronakapajj qhan uñachtʼayistu. Ukhamasti, kunanaksa jutïrin lurani ukanak amuytʼañatakejj sojjta milagronakat jichhajj uñjañäni.
Kuntejj Bibliajj siskistu ukanak jukʼamp yatjjatañatakiw chʼamañchtʼapjjsma. Ukhamatwa iyawsäwimajj jukʼamp chʼamañchasini ukat sapa maynis Jehová Diosan jutïr milagronakapat askinak apsurakiñäni.
[9, 10 jananakan recuadropa/fotonakapa]
MILAGRO:
JESUSAJJ MÄ QHAWQHA TʼANTʼANAKAMPI UKAT MÄ QHAWQHA CHAWLLANAKAMPIW WARANQA WARANQA JAQENAKAR MANQʼAYÄNA. (MATEO 14:13-21; MARCOS 8:1-9; JUAN 6:1-14)
¿BIBLIAJJ KAMSISA?:
‘Oraqejj achunakap churani, Tatit Diosasaw askinak churistani.’ (SALMO 67:6)
¿KUNA ASKINAKAS UTJANI?:
JANIW KHITIS MANQʼAT AWTJAYASJJANITI.
MILAGRO:
JESUSAJJ JUYKHUNAKAROJJ QOLLÄNWA. (MATEO 9:27-31; MARCOS 8:22-26)
¿BIBLIAJJ KAMSISA?:
‘Juykhunakajj uñj-jjapjjaniwa.’ (ISAÍAS 35:5)
¿KUNA ASKINAKAS UTJANI?:
TAQPACH JUYKHUNAKAW UÑJ-JJAPJJÄNI.
MILAGRO:
JESUSAJJ USURNUKSTATANAKAROJJ QOLLÄNWA. (MATEO 11:5, 6; JUAN 5:3-9)
¿BIBLIAJJ KAMSISA?:
“Suchunakasti taruja qallunakjamaw sinkʼusipjjani.” (ISAÍAS 35:6)
¿KUNA ASKINAKAS UTJANI?:
TAQE USURNUKSTATANAKAW QOLLATÄJJAPJJANI.
MILAGRO:
JESUSAJJ KUNAYMAN KASTA USUNINAKARUW QOLLÄNA. (MARCOS 1:32-34; LUCAS 4:40)
¿BIBLIAJJ KAMSISA?:
‘Janiw khitis sisjjaniti: Usutätwa sasajja.’ (ISAÍAS 33:24)
¿KUNA ASKINAKAS UTJANI?:
TAQE USUNAKASTI CHHAQTAYATÄJJANIWA UKAT KʼUMARAKEJJAÑÄNIWA.
MILAGRO:
JALLUSA, THAYASA UKAT YAQHA UKHAMANAKASA JESUSAROJJ ISTʼÄNWA. (MATEO 8:23-27; LUCAS 8:22-25)
¿BIBLIAJJ KAMSISA?:
“Jaqenakasti utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini. Janiw inamaya irnaqapkaniti.” (ISAÍAS 65:21, 23)
“Qhespitaw uñjasirakïta, jachʼa ajjsarañas janirakiw mayampsa jumarojj llakisiykjjätamti.” (ISAÍAS 54:14)
¿KUNA ASKINAKAS UTJANI?:
JANIW ORAQ KHATHATINAKAS NI YAQHA UKHAMANAKASA UTJJANITI.
MILAGRO:
JESUSAJJ JIWATANAKARUW JAKTAYÄNA. (MATEO 9:18-26; LUCAS 7:11-17)
¿BIBLIAJJ KAMSISA?:
“Taqe [...] jiwatanakajj jaktapjjaniwa.” (JUAN 5:28, 29)
“Lamar qotasti jupan ukan jiwirinakwa katuyjjäna. Jiwañasa, jiwatanak katjjäskän ukasa, qawqhatï jupan utjkäna ukjpachwa katuyjjarakïna.” (APOCALIPSIS 20:13)
¿KUNA ASKINAKAS UTJANI?:
JIWATÄPKI UKA MUNAT FAMILIARANAKASAJJ JAKTANJJANIWA.