Wawanakatwa chʼamañchtʼäwi katoqapjje
Diciembre 2009 maranjja, Rusia markan Jachʼa Tribunalapajj Jehová Diosan Qhanañchirinakapan Taganrog markan jan utjjañapwa amtapjjäna. Ukat Tantachasiñ Uta katuntasipjjäna ukhamaraki Bibliat apstʼat qellqatanakasat 34 ukhaw jilamp jilamp taqe kuns parli sasaw sapjjäna. Ukat Internetan Jehová Diosan Qhanañchirinakapat yatiyaski uka cheqanjja, uka jan waltʼäwit yatiyasirakïnwa. Ukat uka markankir jilat kullakanakana ukat wawanakan fotonakapas uñstarakïnwa.
Mä qhawqha phajjsi qhepatjja, Rusia markan kawkhantï Jehová Diosan Qhanañchirinakapar uñjaski ukankirinakaw Queensland (Australia) markankir Jehová Diosan Qhanañchiri mä familiat mä cajamp mä cartamp katoqapjjatayna, uka familiajja kuntï Jachʼa Tribunalajj amtkatayna uka yatiyäwinakwa liytʼapjjatayna. Jupanakajj uka cartan akham sapjjänwa: “Munat jilatanaka, Cody ukat Larissa sat wawanakajajj Rusia markankir jilat kullakanakan iyawsäwipata ukat yantʼat uñjasipjjatap yatisajj wal llaktʼasipjje. Taganrog markankir wawanakatakiw tarjetanaka ukat regalonak apayanipjje. Ukat jupanakat wali jayankirinakas Diosar taqe chuyma serviri wawanakan utjatapa ukat jupanakat llakisitap yatipjjañapwa munapjje. Munasiñampiw aruntanipjjtam” sasa.
Uka regalo katoqasajja, Taganrog markankir wawanakajj dibujonakani cartwa Australiankir familiatak apayapjjäna. Wawanakan ukham chʼamañchtʼäwi katoqapjjatapatjja, Rusia markankir sucursalan serviri mä jilatajj akham sasaw Cody ukat Larissar qellqatayna: “Kunapachatï ina chʼusat tʼaqhesiyapjjestu ukhajja, ¿jiskʼäskstansa jan ukajj jachʼäskstansa llakitajjay jikjjatastanjja? Taganrog markankir jilat kullakanakajj ukham llakitäpjjewa, kunattejj Tantachasiñ Utwa aparapjje. Ukampis jaya cheqankir jilat kullakanakajj jupanakat llakisitap yatisajj wal kusisipjjani. ¡Yuspära ukham munasiri ukat khuyaptʼayasirïpjjatamata!” sasa.
Cheqas Oraqpachankir mä familiätanwa, ukat maynit maynikam munasitasajj jan waltʼäwinakar saykatañatakiw yanaptʼistu. Tribunalankirinakajj Bibliat apstʼat qellqatanakasajj uñisiñaruw wiyti sasin chʼajjwasipkipanjja, wawanakajj jilat kullakanakan askipatwa llakisisipki, yaqha markatäsipkpasa ukat mayja sarnaqäwinïsipkpasa, Jesusan aka arunakap cheqätapwa uñachtʼayapjje: “Jumanakatejj maynit maynikama munasipjjätajja, taqeniw amuyapjjani nayan discipulonakajjäpjjatama” sasa (Juan 13:35).
[32 janan fotonakapa]
Rusia markankir wawanaka (chʼeqa), jupanakaw Australiankiri wawanakat (kupi) regalonak katoqapjje