Jehová Diosajj janiw jaytjasirïkiti ukat juchanak pampachiriwa

1, 2. 1) ¿Jan jaytjasiri ukat juchanak pampachañatak jankʼakïpki ukham amigonakarojj kunatsa wali askit uñjtanjja? 2) ¿Kuna jisktʼanakarus qhanañchaskañäni?

¿JUMATAKEJJ kunjamas mä cheqpach amigojja? Ashley sat mä kullakajj akham siwa: “Khititï jumamp chikäki ukat pantjaskta ukhas pampacharaktam ukaw nayatakejj mä cheqpach amigojja” sasa. Cheqpachansa, jan jaytjasirïpki ukat jan wal luratas pampachañatakejj jankʼakïpki uka kast amigonakarojj taqeniw wali askit uñjtanjja. Jupanakaw munata ukat sum jikjjatasiñatakis yanaptʼistu (Pro. 17:17).

² Jehová Diosjam jan jaytjasiri ukat juchanak pampachir Amigojj janipuniw utjkiti. Salmonak qellqer chachajj akham sasaw Jehová Diosat säna: “Tatay, jumajj munasiñanïtawa, juch pampachirirakïtawa, jumar artʼasirinakatakejj khuyapayasirïtawa” sasa (Sal. 86:5). ¿Jan jaytjasiri ukat juchanak pampachir jaqejj kunjamasa? ¿Kunjamsa Jehová Diosajj juchanak pampachañatak jankʼakïtap uñachtʼayi? ¿Ukat kunjamsa Jupat yateqassna? Uka jisktʼanakar qhanañchtʼañajja, Jehová Diosar jukʼamp munasiñataki ukat jilat kullakanakamp sum apasiñatakiw yanaptʼistani (1 Juan 4:7, 8).

JEHOVÁ DIOSAJJ JANIW JAYTJASIRÏKITI

3. ¿Jan jaytjasir jaqejj kunjamasa?

³ ¿Jan jaytjasir jaqejj kunjamasa? Jan jaytjasiri jaqejja, khitirutï munaski jupatjja janipuniw jitheqtkiti. Ukat munasiñampiw mayninakarojj yanaptʼi ukat chʼamañchtʼaraki. Ukat jan walin jikjjataski ukhasa janiw jaytanukkiti. Jehová Diosajj ‘cheqapawa’ jan ukajj janiw jaytjasirïkiti sasaw Bibliajj qhanañchi. Cheqas janipuniw Jupjamajj khitis utjkiti (Apo. 16:5).

4, 5. 1) ¿Kunjamsa Jehová Diosajj jan jaytjasirïtap uñachtʼayi? 2) Diosajj yupaychirinakapar jan jaytirïtap uñachtʼaykäna ukanakat lupʼiñajja, ¿kunjamsa chʼamañchtʼistu?

⁴ ¿Kunjamsa Jehová Diosajj jan jaytjasirïtap uñachtʼayi? Jupajj janipuniw jan jitheqtir yupaychirinakaparojj jaytjkiti. Ukajj ukhamätapjja David reyiw qhanañchawayi (Salmo 37:28 liytʼasiñapawa). David chachajj jan walinakan jikjjataskäna ukhajja, Jehová Diosajj jan jaytjasaw irpäna, jarkʼaqäna ukat qhespiyarakïna (2 Sam. 22:1). ¿Kunatsa Jehová Diosajj jupar jan jaytjkäna? Kunattejj David pachpaw jan jitheqtirïtap uñachtʼayäna. Jehová Diosajj Jupat jan jitheqtiri yupaychirinakaparojj wali askitwa uñji ukat janirakiw jupanakar jaytjkiti (Pro. 2:6-8).

⁵ Jehová Diosajj ukham jan jaytjasir Diosätap uñachtʼaykäna uk yatiñajj wal chʼamañchtʼistu. Jehová Diosat jan jitheqtas loqtiri Reed sat jilatajj akham siwa: “Davitajj jan waltʼäwinakan uñjaskäna ukhajj kunjamsa Jehová Diosajj yanaptʼäna uk liytʼañajj walpun chʼamañchtʼitu. Jupajj arknaqat uñjasisasa ukat qarqa pʼiyanakar imantasisas sarnaqkchïnjja, Jehová Diosajj janipuniw jaytjkänti. ¡Ukajj walpun chʼamañchtʼitu! Kuna jan waltʼäwinakan uñjaskasas Jehová Diosat jan jitheqtkä ukhajj janiw jaytkitaniti, ukwa Davitan sarnaqäwipajj amtayitu” sasa. Cheqas jumajj ukhamarakwa amuypachätajja (Rom. 8:38, 39).

6. ¿Kunjamanakatsa Jehová Diosajj jan jaytjasirïtap uñachtʼayaraki, ukat kuna askinaksa yupaychirinakapajj jikjjatapjjaspa?

⁶ ¿Kunjamanakatsa Jehová Diosajj jan jaytjasirïtap uñachtʼayaraki? Mayjja, kamachinakap jan pʼakintasaw uñachtʼayi. Diosajj akham sistuwa: “Chuymani jaqenakäjjapjjät ukkhajj nayajj pachpakïskäwa” sasa (Isa. 46:4). Taqe amtanakapjja kamachinakaparjamaw Diosajj amti ukat kamachinakapajj janipuniw mayjtʼkiti (Mal. 3:6). Ukat jan jaytjasirïtapjja, kuntï arski uk phoqhasaw uñachtʼayaraki (Isa. 55:11). Jehová Diosan jan jaytjasir Diosätapatjja, yupaychirinakapajj askinakwa jikjjatsna. ¿Kunjamsa? Kamachinakapar istʼañatak chʼamachasiñäni ukhajja, kuna bendicionanaktï churañatak arsuwayki ukjja phoqhaniwa (Isa. 48:17, 18).

JAN JAYTJASIRÏÑJJA JEHOVÁ DIOSAT YATEQASIÑÄNI

7. ¿Kunjamsa Jehová Diosat jan jaytjasirïñ yateqassna?

⁷ ¿Kunjamsa Jehová Diosat jan jaytjasirïñ yateqassna? Khitinakatï yanaptʼa munapki ukanakar yanaptʼasaw uk yateqassna (Pro. 3:27). Amuytʼañataki, inas mä jilatasa jan ukajj kullakas usutäsina, familiapan uñisitäsina jan ukajj pantjasitap layku aynachtʼaskatap yatstan. ¿Janit ‘munasiña ukat khuyapayasiñ arunakampi’ chuymachtʼksna? (Zac. 1:13.)a Jiwasatï ukham lurañänejja, “jilat sipansa jukʼamp suma” ukat cheqpach amigötaswa uñachtʼayañäni (Pro. 18:24).

8. ¿Kunjamsa chacha warminakajj Jehová Diosat jan jaytjasirïñ yateqasipjjaspa?

⁸ Ukat khitinakarutï munasktan ukanakar jan jaytjasaw Jehová Diosat yateqasitas uñachtʼayaraksna. Jaqechatästan ukhajja, chachasarusa jan ukajj warmisarus janipuniw jaytanukuñasäkiti uk sum yattanjja (Pro. 5:15-18). Ukatwa kunatï wachoqa jucha lurañar apkistaspa uk janipun lurktanti (Mat. 5:28). Maysa toqetjja, jilat kullakanakasat jan walinak jan parlktan, jan kʼarintktan ukat jan walinak maynit parlapki ukanak jan istʼañ munktan ukhaw jupanakar taqe chuyma munasitas uñachtʼaytanjja (Pro. 12:18).

9, 10. 1) ¿Taqe kunat sipansa khititsa jan jitheqtañ munktanjja? 2) ¿Kunatsa Jehová Diosan kamachinakap istʼañajj chʼamakïspa?

⁹ Taqe kunat sipansa, Jehová Diosat janiw jitheqtañ munktanti. ¿Kunjamsa uk uñachtʼaysna? Kunanaktï Jupajj uñiski uk uñisisa ukat kunanaktï munki uk munasa. Ukatjja, Jehová Diosar kusisiykirwa sarnaqañasaraki (Amós 5:15 liytʼasiñapawa). Kunjamtï Jehová Diosajj amuyki ukham amuyasajja, kamachinakapar istʼañatakejj jankʼakïñäniwa (Sal. 119:104).

¹⁰ Ukampis Diosan kamachinakap istʼañajj chʼamakïspawa. Jupat jan jitheqtañatakejj inas chʼamachasiñasajj wakischispa. Amuytʼañataki, inas mä solter jilatasa jan ukajj kullakas jaqechasiñ munchi, ukampis Diosan markap taypin janïraw jupatakjam suma chacha jan ukajj warmi jikjjatkiti (1 Cor. 7:39). Inas mä kullakatakejj Diosar jan uñtʼapki uka irnaqer masinakapajj maynimpi uñtʼasiñapatak thaqharapipjjchispa. Ukat jupajj sapakis jikjjataskchejja, Diosar jan yupaychirimpejj janipuniw jaqechasiñ munkiti, kunattejj Jehová Diosan kamachinakap janiw pʼakintañ munkiti. ¿Jupjam sarnaqer jilat kullakanakajj wali yateqaskayajjaya? Ukham jan walinakan jikjjataskasas Jehová Diosar jan jitheqtas yupaychasipkaki ukanakarojj Jupajj bendiciniwa (Heb. 11:6).

JEHOVÁ DIOSAJJ JUCHANAK PAMPACHIRIWA

11. ¿Kunjamas pampachasir mä jaqejja?

¹¹ Jehová Diosajj juchanak pampachañatakejj jankʼakirakiwa. ¿Kunjamas jucha pampachir jaqejja? Jan wal jupa contra lurki ukar perdonasajj janiw jupamp coleratäjjeti. Ukampis ukajja, janiw mayninakan jan wal luratajj ukhamak uñchʼukiña jan ukajj jan wali luratanakap janis juchäkaspa ukham uñjaña sañ munkiti. Jehová Diosajj taqe chuyma arrepentisipki ukanakar ‘juch pampachañatakejj’ jankʼakiwa sasaw Bibliajj qhanañchi (Sal. 86:5).

12. 1) ¿Kunjamsa Jehová Diosajj perdonirïtap uñachtʼayi? 2) Maynin ‘juchanakapajj perdonatäniwa’ sasinjja, ¿Pedrojj kun sañs munäna?

¹² ¿Kunjamsa Jehová Diosajj juchanak pampachirïtap uñachtʼayi? Jupajj “perdonañatakejj jankʼakiwa”, ukat perdonki ukhajja, taqe juchanak wiñayatakiw perdoni (Isa. 55:7). ¿Kunjamsa Jehová Diosajj taqe juchanak perdoni? Kuntï Hechos 3:19 qellqatan siski uk amuytʼañäni (liytʼasiñapawa). Apóstol Pedrojj akham sasaw istʼapkäna ukanakar säna: “Jan wali lurañanakjja apanukupjjam, ukatsti arrepientisipjjam” sasa. Kunapachatï maynejj jucha luratapat taqe chuyma arrepentiski ukhajja, jan wali luratanakapat wal chuym pisayasi ukat juchar jan purtʼasiñatakiw amtaraki (2 Cor. 7:10, 11). Ukhamarusa jan wali lurañanak apanukuwa ukat Jehová Diosatakjamaw sarnaqjjaraki. Pedror istʼirinakatï arrepentisipjjaspäna ukhajja, ¿kunsa jikjjatapjjaspäna? Kunjamtï Pedrojj siskänjja, ‘juchanakapat perdonatäpjjaspänwa’. Perdonatäpjjataw sasin griego arut jaqokipatäki uka arojja, “qʼomachaña jan ukajj qaqtas chhaqtayaña” sañ muni. Ukhamajj Jehová Diosajj perdonki ukhajj janiw mayamps amtjjeti, mä arunjja, taqe juchanakapwa perdoni (Heb. 10:22; 1 Juan 1:7).

13. “Jucha luratanakapatsti janiw mayampsa amtaskjjarakïti” sasin Jehová Diosajj siski ukajja, ¿kunsa amuytʼayistu?

¹³ Jehová Diosajj juchanakas wiñayatak perdonirïtapjja, ¿kunjamatsa yattanjja? Jeremiasan profeciapat amuytʼañäni, ukanjja ajllitanakamp mä machaq arustʼäwir mantapkäna uka toqetwa parli, uka arustʼäwi toqew khitinakatï Jesucriston loqtasïwipar iyawsapki ukanakajj juchanakapat perdonatäpjjaspa (Jeremías 31:34 liytʼasiñapawa). Jehová Diosajj akham sänwa: “Ñanqha luratanakapatjja perdonarakïwa, jucha luratanakapatsti janiw mayampsa amtaskjjarakïti” sasa. Kunjamtï amuyktanjja, Jehová Diosajj juchanakas perdonkistu ukhajja, janipuniw juchanakasat amtasjjeti. Ukhamajj Jehová Diosajj janiw jiwas contra kuns lurkaniti, mä arunjja, janiw uka jan wali luratanakasat mutuykistaniti (Rom. 4:7, 8).

14. Jehová Diosajj juchanaka pampachiri Diosätap lupʼiñajja, ¿kunjamsa chuymachtʼistu? Uk mä experienciamp qhanañchtʼam.

¹⁴ Jehová Diosajj kunja perdonasirisa uka toqet amuytʼañajj wal chuymachtʼistu. Mä kullakajja, tamat jaqsutänwa ukat walja maranak qhepatwa tamar kuttʼanjjäna. Jupajj akham siwa: “Jehová Diosajj perdonjjetuwa sasaw nä pachpajj sasirïta ukat yaqhanakarus sarakirïta, ukampis Diosajj nayat sipansa mayninakarukis wal munaskaspa ukhamwa amuyirïta” sasa. Jehová Diosajj kunjamsa juchanak perdoni uk Bibliajj uñachtʼäwinakamp qhanañchki uk liytʼasaw jupajj chuymachtʼat jikjjatasïna. “Ukat wali munataw jikjjatasta, janiw kunapachas ukham jikjjatasirïkti” sasaw kullakajj saraki. Ukat akham amuyañaw juparojj wal chuymachtʼarakitayna: “Cheqas pampachkistu uka juchanakjja wiñayatakiw Diosajj armasjje”.b Kullakajj saskakiwa: “Jehová Diosajj janis juchanakaj taq perdonkitaspa ukhamwa amuyaskatäta; uka juchanakajat jiwañajkamay pisayaschï sasaw amuyayäta. Ukampis tiempompejja, Jehová Diosarojj jakʼachasiristwa, ukajj mä jathi qʼepsa apaqaskirista ukhamawa” sasa. Jehová Diosajj wali munasiri ukat juchanak pampachiri Diosawa (Sal. 103:9).

JEHOVÁ DIOSAT PERDONASIRÏÑ YATEQASIPJJAÑÄNI

15. ¿Kunjamsa Jehová Diosat perdonasirïñ yateqassna?

¹⁵ Maynit maynikam perdonasisaw Jehová Diosat yateqassna (Lucas 17:3, 4 liytʼasiñapawa). Ak amtapuniñäni, kunapachatï Jehová Diosajj juchanakas perdonki ukhajja, juchanakasat armasjjewa, mä arunjja, janiw mutuyañatak uka juchanak mayampi amtaykistuti. Jiwasatï mayninakan juchanakap jan amtjjañäni ukhajja, Jehová Diosjamarakiw armsna.

16. 1) Perdonañatakejj jankʼakïña siski ukajja, janiw juchanaka ukhamak uñchʼukiña jan ukajj jan walinak lurapkistu ukanak ukhamak uñchʼukiña sañ munkiti ¿kunatsa? Uk qhanañchtʼam. 2) ¿Diosampi perdonayasiñ munstan ukhajj kuns lurañasa?

¹⁶ Perdonañatakejj jankʼakïña siski ukajja, janiw juchanaka ukhamak uñchʼukiña jan ukajj ina chʼusat jan walinak lurapkistu ukanak ukhamak uñchʼukiña sañ munkiti. Jan ukasti, jan chuyma ustʼatäskakiña sañ muni. Ukhamarusa ak amtañasapuniwa, Jehová Diosampi perdonayasiñatakejja, Jupat yateqasisaw mayninakan juchanakap perdonañasa (Mat. 6:14, 15). Jehová Diosajj jiwasat sinttʼasiwa, ukat “laqʼätas” amtasirakiwa (Sal. 103:14). ¿Jiwasajj janit mayninakat ukham sinttʼasis juchanakap perdonkaraksna? (Efe. 4:32; Col. 3:13.)

17. Mä jilatatï jan ukajj kullakatï jan wal luristaspa ukhajja, ¿kunas perdonañatak yanaptʼistani?

¹⁷ Awisajja, yaqhanakaru perdonañajj chʼamakiwa. Nayra patak maranakansa ajllit cristianonakajj jupanakkam sum apasiñatakejj yanaptʼatäñwa munapjjäna (Fili. 4:2). Mä jilatatï jan ukajj kullakatï jan wal luristaspajja, ¿kunas perdonañatak yanaptʼistani? Job chachat amtañäni. Kunapachatï Elifaz, Bildad, Zofar chachanakajj ina chʼusat juchañchapjjäna ukhajja, jupajj chuym ustʼataw jikjjatasïna (Job 10:1; 19:2). Qhepatsti, Jehová Diosaw uka jan wali amigonakaparojj cheqañchäna ukat juchanakap pampachatäpjjañapatakejj Job chachan ukaruw sacrificio loqtañapatak khitäna (Job 42:7-9). Ukat Jehová Diosajj jupanakatak orañamawa sasaw Job chacharojj säna. Kunapachatï Job chachajj ukham lurasin perdonañatak jankʼakïtap uñachtʼayäna ukhajja, Jehová Diosajj jupar bendicïnwa (Job 42:10, 12, 16, 17 liytʼasiñapawa). ¿Kunsa ukat yateqsna? Jan wal lurapkistu ukanakatak Diosat mayirapiñajja, chuyma jan ustʼatäskakiñatakiw yanaptʼistu.

JEHOVÁ DIOSAJJ KUNJAM DIOSÄKITÏ UK WALI ASKIT UÑJASKAKIÑÄNI

18, 19. Jehová Diosajj kunjam Diosäkiti ukjja, ¿kunjamsa jukʼamp askit uñjaskaksna?

¹⁸ Jehová Diosajj kunjam Diosäkiti uka toqenakat yatjjatañajj wal chʼamañchtʼawayistu. Juparojj khitis jakʼachasikispawa, janiw khitirus yaqhachkiti, taqe kun churasiriwa, amuytʼiriwa, janiw jaytjasirïkiti ukat juchanak pampachirirakiwa, ukanakwa Diosat yateqawaytanjja. Ukampis mä qawqhakwa Jupat yatjjatawaytanjja. Jutïrinjja wiñayaw Jupat jukʼamp yatjjataskañäni (Ecl. 3:11). Apóstol Pabljamarakiw jikjjatastanjja, jupajj akham sänwa: “¡Kunja sumas Diosan yatiñ kankañapajja, munañapasa, amuytʼapasa!” sasa. Ukhamarakwa munasiñapatsa ukat sojjta toqet yatjjatawayktan ukanakat sissna (Rom. 11:33).

¹⁹ Jehová Diosajj kunjam Diosäkiti uk yatjjataskakiñäni, ukanakat lupʼiñäni ukat ukarjam sarnaqañäni ukhajja, Juparojj jukʼamp askitwa uñjaskakiñäni (Efe. 5:1). Ukhamatwa salmonak qellqerjam jikjjatasiñäni, jupajj akham sänwa: “Diosaruw jakʼachasï, ukaw nayarojj kusisiyitu” sasa (Sal. 73:28).