‘Jaqe masimarusti munasiñamarakiwa’

1, 2. 1) ¿Kawkïris payïr jachʼa mandamientojja? 2) ¿Kuna jisktʼanakatsa yatjjataskañäni?

JESUSAROJJA, akham sasaw mä fariseojj jisktʼäna: “Yatichiri, ¿kawkïr mandamientos taqet sipansa wali jachʼajja?” sasa. Kunjamtï pasïr yatichäwin yatjjatawayktanjja, Jesusajj juparojj sänwa: ‘Akawa taqet sipansa jachʼa mandamientojja: “[Jehová] Diosamaruw munäta taqe chuymamampi, taqe almamampi, taqe amuyumampiraki”’ sasa. Ukat Jesusajj payïr jachʼa mandamientojj akawa sarakïnwa: “Jaqe masimarusti juma kipkarjam munarakim” sasa (Mat. 22:34-39).

² Jaqe masinakamarojj jumanak pachparjamaw munasipjjañama sasaw Jesusajj säna. Ukhamajj ¿khitis jaqe masisajja? ¿Kunjamanakatsa munasirïtas uñachtʼaysna? Aka yatichäwinwa uka jisktʼanakat yatjjataskañäni.

¿KHITIS JAQE MASISAJJA?

3, 4. 1) Khitis jaqe masijajja sasin mä jaqejj jisktʼkäna ukhajja, ¿kunjamsa Jesusajj amuytʼayäna? 2) ¿Kunjamsa samaritano chachajj judiorojj yanaptʼäna? (Aka janankir dibujo uñjjattʼam.)

³ Jesusarojj akhamwa mä chachajj jisktʼäna: ‘¿Khitirak jaqe masijasti?’ sasa. Sum amuytʼañapatakejja, Jesusajj mä samaritano chachatwa parläna (Lucas 10:29-37 liytʼañataki). Mä judío jaqerojja, lunthatanakaw jaljjatasin nuwjapjjäna ukat niya jiwirjam jaytanukupjjäna. Uka ratusti mä sacerdotew pasäna, ukjjarusti mä levitaraki. Jupanakajj janiw uka judiorojj yanaptʼapkänti, jan ukasti jan yäqasakiw pasawayapjjäna. Ukampis mä samaritanow yanaptʼäna. Ukajj wali muspharkañänwa, uka tiemponjja, judionakampi samaritanonakampejj janiw sum apasipkänti (Juan 4:9).

⁴ Samaritano chachajj judior jakʼachasisinjja, usuchjatanakapjja aceitempi vinompiw qolljjattʼäna. Ukatsti mä qorpachasiñ utaruw apjjäna, uka usuchjat judior uñjañapatakejja, qorpachirirojj pä denario qollqe jaytawayäna, ukajj pä uru jurnäla trabajit qollqënwa (Mat. 20:2). Ukham khuyaptʼayasaw samaritanojj jaqe masipar munasitap uñachtʼayäna. Ukhamasti, Jesusajj samaritanot parlasajja, taqe jaqe masisar munasiñataki ukhamarak khuyaptʼayasiñatakiw yatichistu.

5. ¿Kunjamsa Jehová Diosan Qhanañchirinakapajj jaqe masipar munasipjjatap uñachtʼayapjje?

⁵ Aka “qhepa urunakanjja” janiw khuyapayasiñajj utj-jjeti, jaqenakajj qhorunaka, nuwasirinaka ukhamäjjapjjewa, janirakiw jaqe masiparus munasjjapjjeti (2 Tim. 3:1-3). Amuytʼañataki, 2012 maran octubre phajjsi tukuyarojja, Nueva York markan huracán Sandy sat jachʼa thayaw sartäna. Ukatwa jaqenakajj jan luzani jan calefaccionani uñjasipjjäna. Ukham tʼaqhesiñansa uñjasipkchïnjja, yaqhep jan wali jaqenakajj yanaptʼañat sipansa, jukʼampikiw lunthatjjapjjäna. Ukampisa Jehová Diosan Qhanañchirinakapajja, jupanakkam yanaptʼasiñatakisa ukhamarak mayni jaqenakar yanaptʼañatakisa programa de socorro satäkis ukwa uttʼayapjjäna. Jiwasajj jaqe masisar munasitas laykuw ukhamanakan yanaptʼastanjja. Ukampis ¿kunanakamp lurasas jaqe masisar munasitas uñachtʼayaskaksna?

¿KUNJAMANAKATSA MUNASIRÏTAS UÑACHTʼAYSNA?

6. ¿Kunjamsa jaqe masisar munasitas uñachtʼaysna?

⁶ Diosar uñtʼapjjañapataki jaqe masisar yanaptʼapjjañäni. Yatiyir sarasajja, Diosan Arupampiw jaqenakarojj chuymachtanjja (Rom. 15:4, MT). Cheqansa, Diosan Reinopat yatiyir sarasajja, jaqe masisar munasitaswa uñachtʼaytanjja (Mat. 24:14). Suytʼañ churiri Diosan arunakapa yatiyañajj wali kusiskañapuniwa (Rom. 15:13).

7. Kunjam uñjatäñtï munktan ukham uñjañäni ukhajja, ¿kuna bendicionsa katoqañäni?

⁷ Kunjam uñjatäñtï munktan ukham uñjapjjañäni. Jesusajj sänwa: “Kunjämtï jumanakajj jaqenakampi uñjatäñ munapktas ukhamarak jumanakajj jupanakar uñjapjjam, Leyimpin, profetanakan qellqatanakapampin ukham yatichi” sasa (Mat. 7:12). ‘Ley’ sasajja, Génesis librot Deuteronomio librokama sañwa muni ukat ‘profetanakan qellqatapa’ sasasti hebreo aruta qellqaskän uka profecía libronaka sañwa munaraki. Jehová Diosajja, markapar munasisaw uka leyinak churäna ukhamat maynit maynikama munasipjjañapataki. Jiwasanakan ukham munasipjjañaswa munaraki. Isaías profet toqejj Jehová Diosajj sänwa: “Kunatejj cheqa aski uñjäwïki uk lurapjjam, kunatejj cheqapäki uka lurapjjam [...], kusisiñaniw kawkïri jaqetejj aka kamachinak taqe chuymampi phoqki ukajja” sasa (Isa. 56:1, 2). Jiwasatï jaqe masisaru munasiñäni ukat sum uñjarakiñäni ukhajja, bendicionanakwa katoqañäni.

8. 1) ¿Kunatsa uñisirinakasar munasiñasa? 2) Uñisirinakasar sum uñjañäni ukhajja, ¿kunas pasaspa?

⁸ Uñisirinakasar munasipjjañäni. Jesusajj sänwa: ‘Istʼapjjaraktawa kunatï satäkänsa ukjja: “Jaqe masimarojj munam, uñisirimarusti uñisirakim” sasa. Ukampis nayajj sapjjsmawa: Uñisirinakamarojj munapjjam, Diosat mayirapipjjarakim khitinakatejj jan walinaks lurapktam ukanakatakisa. Ukhamatwa jumanakajj alajjpachankir Awkiman wawanakapäpjjätajja. Jupasti taqenitakiw intsa jalsuyani, ukhamarak aski jaqenakatakisa, jan aski jaqenakatakisa jallsa puriyaniraki’ sasa (Mat. 5:43-45). Apóstol Pablosti niya ukhamarakwa säna: “Uñisirimatejj manqʼat awtjatächejja, manqʼañ churam, umat pharjatäch ukasti, um churarakim” sasa (Rom. 12:20; Pro. 25:21). Ukat Moisesan Leyiparjamajja, kunapachatï mä israelitajj uñisiripan asnopa cargampi tinkuta uñjäna ukhajja, yanaptʼañapänwa (Éxo. 23:5). Ukham lurasajja, uñisirinakapampis sumankthapipjjänwa. Jichhürunakanjja, uka ewjjanakarjam lurañajj wali askirakiwa. Jiwasatï uñisirinakasaru, khitinakatï uñisiñat arknaqkistu ukanakaru munasiñampi uñjañäni ukhajja, suma chuymampiw qhepat uñj-jjapjjestaspa ukat jiwas contra amtanakapsa mayjtʼayapjjarakispawa. Ukhamarus inas yaqhepanakajj Jehová Diosar servjjapjjarakchispa.

9. Jesusajj sumankthapiñ toqetjja, ¿kamsänsa?

⁹ ‘Taqenimpis suman sarnaqañ thaqapjjañäni.’ (Heb. 12:14.) Cheqansa, jilat kullakanakasampejj sumwa apasipjjañasaraki, Jesusajj uka toqet sänwa: “Jumatejj altararu ofrenda apkasina amtassta jilamajj mä kunatsa juma conträtapjja, jumajj uka ofrendama altar nayraqatar jaytawayasinjja, jilamampi sumankthapiri saram, ukatsti kuttanim uka ofrendam altaran churañataki” sasa (Mat. 5:23, 24). Ukhamajj mä jilatampi jan ukajj mä kullakampi jan waltʼayasiñajj utjani ukhajja, munasiñat jankʼakiw sumankthapiñataki chʼamachasiñasa, ukhamatwa Jehová Diosan bendicionap katoqarakiñäni.

10. ¿Kunatsa mayninakan pantjasitanakap jan uñchʼukiñasäki?

¹⁰ Jan mayninakan pantjasitanakap uñchʼukipjjañäniti. Jesusajj sänwa: ‘Jaqe masimarojj jan juchañchapjjamti, Diosajj jan jumanakar juchañchañapataki. Kunjämtï jaqe masimarojj juchañchapktas ukhamarakwa Diosajj juchañchapjjätam; kunjämtejj jaqenakar lurapkäta ukhamarakwa Diosajj lurapjjätam. ¿Kunjämrak jumasti jilaman nayrapan mä jiskʼa qʼañun utjatapjja uñchʼuktasti, ukatsti jumajj janiraki amuyasktati mä jachʼa thuru lawajj nayramankaski ukjja? Jan ukajj ¿kunjäms jumajj jilamarojj sasmajj: ‘Suytʼam, nayaw juman nayramat uka jiskʼa qʼañu apsüma’ sasajja, juman nayramanjja mä jachʼa thuru lawa utjaskipanjja? ¡Kʼari chuyman jaqe!, nayraqat uka thuru lawa nayramat apsusim, ukatwa jumajj sum uñjasma uka jiskʼa qʼañojj jilaman nayrapan utjkis uk apsuñatakejja’ sasa (Mat. 7:1-5). Ukhamasti janiw mayninakan pantjasitanakap uñchʼukiñäsäkiti, jiwasas walj kuti pantjasirirakïtanwa.

¿KUNSA MUNASIRÏTAS LAYKOJJ LURAÑASA?

11, 12. ¿Kun lurasas jaqe masisar munasitas uñachtʼaysna?

¹¹ Diosan Reinopat suma yatiyäwinak yatiyasaw munasirïtas uñachtʼaysna, kunjamtï Jesusajj lurirïkäna ukhama (Luc. 8:1). Jupajj arkirinakaparojj sänwa: “Taqe akapachankir jaqenakar yatiyir sarapjjam” sasa (Mat. 28:19, 20). Jesusan arunakapar istʼasajja, chhaqañaru apir añcho thakit mistupjjañapatakiw yanaptʼasktanjja, ukhamat jakañar apir kʼullkʼu thaknam sarapjjañapataki (Mat. 7:13, 14). Ukham chʼamachasitasarojja, Jehová Diosajj bendiciniwa.

¹² Jesusat yateqasisaw jaqenakar “ajay toqen aynachtʼatäpjjatap” amuyasipjjañapataki yanaptʼtanjja, ukhamat Jehová Diosampi sum apasipjjañapataki (Mat. 5:3). Maynitï Diosar jukʼamp uñtʼañ munchi ukhajja, Diosan “qhespiyasiñ arunaka[patwa]” yatichtanjja (Rom. 1:1). Diosan Reinopar istʼirinakasti, Jesucriston loqtasïwip toqew Jehová Diosampi sumankthapipjje (2 Cor. 5:18, 19). Ukhamajj suma yatiyäwinaka yatiyir sarañajj wali wakiskiriwa, ukhamatwa jaqe masisar munasitas uñachtʼaysna.

13. ¿Kunjamsa Diosan Reinopat yatiyasajj jikjjatasta?

¹³ Bibliat yatichañatakisa jan ukajj wasitat kuttʼañatakis sum wakichtʼastan ukhajja, Diosan arunakaparjam sarnaqapjjañapatakiw yanaptʼtanjja. Ukhamarjam sarnaqañatakejja, yaqhepanakajj jakäwipsa qʼal mayjtʼayapjjaraki (1 Cor. 6:9-11). Jehová Diosajja, suma chuyman jaqenakarojj nayrar sartapjjañapatakisa Jupampi sum apasipjjañapatakisa wal yanaptʼi, uk yatiñajj wal kusisiyistu (Hech. 13:48). Bibliat yateqasajj waljaniw kusisit jakasjjapjje, alajjpachankir Awkiparus jukʼampiw confiyjjapjje, ukat llakinakapas chhaqjjarakiwa. Cheqas ukham nayrar sartapjjatapajja wali askiwa. Ukhamasti, jaqe masisar munasiñat yatichañajj Diosan jachʼa bendicionapawa.

¿PABLOJJ MUNASIÑ TOQET KAMSÄNSA?

14. ¿Pablojj munasiñ toqet 1 Corintios 13:4-8 qellqatan kamsänsa?

¹⁴ Apóstol Pablojja, munasiñ toqetwa sum qhanañchtʼäna. Jiwasatï ukhamarjam jaqe masisar munasiñäni ukhajja, Jehová Diosampejj wali askit uñjatañäniwa, janirakiw kuna jan walirus purtʼaskañäniti, ukhamarus wali kusisitañäniwa (1 Corintios 13:4-8 liytʼañataki). Jichhajj Pablon arunakapat mä jukʼa yatjjatañäni ukat kunjamsa uka arunakarjamajj jaqe masisar uñjsna uk amuytʼarakiñäni.

15. 1) ¿Kunatsa paciencianïñasa suma chuymanïñasa wakisejja? 2) ¿Kunatsa jan envidiasirïñasäki ukat janirak jachʼa jachʼas tukuñasäki?

¹⁵ ‘Khitintejj munasiñajj utjki ukajj paciencianiwa, suma jaqewa’ sasaw Pablojj säna. Cheqas Jehová Diosajj jucharar jaqenakarojja, wali pacienciampi ukat suma chuymampiw uñjistu. Jiwasajj ukhamarakiw pantjasirinakarusa, chuyma ustʼayirinakarus uñjañasa. Ukatjja, munasir jaqesti “janiw envidiasirïkiti”. Jiwasatï jilat kullakanakasar cheqpachapuni munasstan ukhajja, janiw yänakapatsa ni taman lurañanakapatsa envidiasiñasäkiti. Ukat janirakiw jachʼa jachʼas tukuñasäkiti, ni jiwasakis kuns yatksna ukham jachʼañchasiñasäkiti. Biblianjja akham siwa: “Jachʼa jachʼa tukuñasa, amtañasa, jan walinak lupʼiñasa, juchawa” sasa (Pro. 21:4).

16, 17. ¿Kunjamsa 1 Corintios 13:5, 6 qellqatarjam phoqsna?

¹⁶ Munasirïstan ukhajja, ‘janiw kuna jan walsa lurkañäniti’. Janiw kʼariskañänisa, ni lunthataskañänisa, janirakiw Jehová Diosan kamachipsa pʼakintkañäniti. Ukhamaraki munasiñatï utjchistojja, janiw ‘jiwasatak llakiskañäniti’, jan ukasti mayninakan askipwa thaqarakiñäni (Fili. 2:4).

¹⁷ Munasir jaqejj “janiw coleraskiti, janirakiw colerasitapsa imjjasiskiti”. Maynejj chuym ustʼayistu ukhajja, janiw jankʼak colerasktanti, janirakiw qawqha kutis chuyma ustʼayistu uks jakkaraktanti (1 Tes. 5:15). Maynin pantjasitanakaptï imjjassna ukhajja, Jehová Diosajj janiw askit uñjkistaspati. Ukhamarusa, mä ninjamaw colerasiñajj chuymasan nakhaspa ukat jukʼampikiw jiwasarusa, mayninakarusa jan waltʼayjjaspati (Lev. 19:18). Ukhamajj perdonasinjja, armjjañasawa. Ukatjja, mä munasir jaqejj janirakiw ‘kunatejj jan walïki ukampejj kusisiñ yatkiti’. Ukhamajj uñisirisar tʼaqhesiskiri uñjasajja, janiw kusisiñasäkiti (Proverbios 24:17, 18 liytʼañataki).

18. ¿Kunsa 1 Corintios 13:7, 8 qellqatajj munasiñ toqet yatichistu?

¹⁸ Munasiñan jaqejj “taqe kun tʼaqhesi” sasaw Pablojj sarakïna. Ukatwa kunapachatï chuyma ustʼayirejj perdón maykistu ukhajj munasiñat perdontanjja. Ukatsti munasiñan jaqejj ‘taqe kunwa iyawsaraki’. Ukatwa kuntï Biblian siski ukar iyawstanjja, ukhamaraki Diosan markapan yatichäwinakap katoqasas wal kusistanjja. Ukhamarusa munasir jaqejj ‘llampʼu chuymampiw taqe kunsa suytʼaraki’. Jiwasajj kuntï Diosajj arsuwayki ukjja jan pächasisaw suytanjja, ukat munasirïtas laykojja jankʼakiw uka toqenakat yatiyaraktanjja (1 Ped. 3:15). Ukhamaraki jan walinakan uñjasktan ukhajja, Jehová Diosaruw mayistanjja ukat jan walinak askichasiñapatakis Juparuw suytʼaraktanjja. Maysa toqetjja, munasir jaqejj taqe kunwa ‘aguantaraki’ (NM). Maynejj jiwas contra juch luri jan ukajj uñisiñat arknaqestu ukhajja, munasiñatwa aguanttanjja. Pablojj saskakïnwa: “Munasiñajj janipuniw tukuskiti” sasa. Cheqansa Jehová Diosan servirinakapan munasiñapajj janipuniw tukuskaniti.

JIWASPACHPARJAM JAQE MASISAR MUNASISKAKIÑÄNI

19, 20. ¿Kawkïr qellqatanakas jaqe masisar munasiskakiñataki yanaptʼistu?

¹⁹ Jiwasatï Biblian yatichäwipar istʼañäni ukhajja, jaqe masisarojj jiwaspachparjamaw munasiñäni (Mat. 22:39). Jehová Diosampi Jesusampejj taqe jaqenakar munasiñaswa munapjje. Ukhamajj kawki markatäskpasa kuna kasta jañchinïskpasa taqeniruw munasiñasa. Maynir munasiñajj chʼamäni ukhajja, Jehová Diosampi yanaptʼayasiñatakiw qollan ajayup mayiñasa. Ukham lurañäni ukhajja, wali askitwa uñjistani ukat munasiñampiw yanaptʼarakistani (Rom. 8:26, 27).

²⁰ Jaqe masisar munasiñajj wali wakiskiriwa, ukasti “Diosan jachʼa leyipa” satarakiwa (Sant. 2:8). Apóstol Pablojj Moisesan Leyipat parlkasajj akham sänwa: “Taqe aka mandamientonakajja yaqhanakamp kunajja, aka arunakwa phoqhasi: ‘Jaqe masimarojj juma kipkarjam munasim’ sasa. Maynitejj munasiñanïchejja, janiw kuna jan wals masiparojj lurkaspati, ukhamasti munasiñanwa leyejj sum phoqhasi” sasa (Rom. 13:8-10). Ukhamajja, jaqe masisar munasiskakiñäni.

21, 22. ¿Kunatsa Jehová Diosarusa jaqe masisarusa munasiñasa?

²¹ Jaqe masisar kunatsa munasiñasa uka toqet lupʼtan ukhajja, kuntï Jesusajj Awkipat siskäna uk amtañaw wakisispa, jupajj sänwa: “[Diosasti] taqenitakiw intsa jalsuyani, ukhamarak aski jaqenakatakisa, jan aski jaqenakatakisa jallsa puriyaniraki” sasa (Mat. 5:43-45). ¿Kunsa uka arunakajj yatichistu? Suma jaqenakarusa, jan wali jaqenakarusa, taqeniruw munasiñasa. Kunjamtï yatjjataniwayktanjja, Diosan Reinopat yatiyir sarasaw jaqe masisar munasitas uñachtʼaytanjja. Jupanakatï suma yatiyäwinak taqe chuyma katoqapjjestani ukhajja, ¡Jehová Diosampejj wali sumwa apasipjjarakini!

²² Kunatsa Jehová Diosarojj taqe chuymampi, taqe almampi, taqe amuyumpi munasiñasa ukwa yatjjatawaytanjja. Ukat kunjamsa jaqe masisarojj munasiñasa uksa jichhajj yatjjatawayaraktanwa. Ukhamasti Jehová Diosarusa jaqe masisarusa munasipjjañäni, ukhamatwa Jesusan mandamientopar phoqapjjañäni. Ukatjja, alajjpachankir Jehová Dios Awkisarusa kusisiyapjjarakiñäniwa.