Awk taykanaka, wawanakamar sum uñjapjjam

1, 2. 1) Nayra Israel markanjja, ¿kunsa awatirinakajj lurapjjerïna? 2) ¿Kunansa awk taykanakajj awatirinakar uñtasitäpjje?

NAYRA Israel markanjja, uwij awatirinakajj wal chʼam tukupjjerïna. Jupanakajj jaya pampanakanwa, thayansa lupinsa, uwijanakap awatipjjerïna, animalanakatsa lunthatanakatsa jarkʼaqapjjarakirïnwa. Sapa kutirakiw uwijanakaparojj uñakipapjjerïna. Usuntapjjäna jan ukajj usuchjasipjjäna ukhajja, jankʼakiw qolljjatapjjerïna. Yamas, jachʼa uwijanakat sipansa, jiskʼa uwij qallunakarojj pisi chʼamanïpjjatap laykojj jukʼamp sumwa uñjapjjerïna (Gén. 33:13).

² Awk taykanakajja, niya uka uwij awatirinakar uñtasitäpjjarakiwa. Wawanakar “cheqapar yatichasina” sum uywañatakisa ukhamarak ‘Jehová Diosar iyawsapjjañapatakisa’ uka awatirinakjamaw chʼamachasipjjañapa (Efe. 6:4). Wawanakar uywañajj chʼamakïspawa. ¿Kunatsa? Juchanïpjjatap laykojj jupanak pachpaw jan walir sarapjjaspa. Maysa toqetjja, Supayan jan wali amuyunakapampiw apayasipjjarakispa (2 Tim. 2:22; 1 Juan 2:16). Jumatï wawanakanïstajja, ¿kunjamsa jupanakar sum uñjasma? Jupanakarojj sum uñtʼañama, Diosan arunakapsa sum yatichañama, suma thakiruw irpañamaraki, uka kimsa toqetwa akan yatjjataskañäni.

SUM UÑTʼAÑAMA

3. ¿Kunjamatsa awk taykanakajj wawanakapar sum uñtʼapjjaspa?

³ Mä suma awatirejja, kunjamäsipkis uwijanakapajj uk yatiñatakejj sapa mayniruw sum uñakiptʼi. Niya ukhamarak awk taykanakajj lurapjjaspa. Biblianjja akham siwa: “Ovejanakamjja suma uñjasim [jan ukajj ‘sum uñtʼam’, NM]” sasa (Pro. 27:23). Ukhamajj awk taykanaka, wawanakamar sum uñtʼañatakejja, jupanakajj kunsa lurasipki, kunsa amtasipki, ukat kunjamas jikjjatasipjje ukwa sum yatipjjañama. Ukatakejj jupanakamp parlañaw wakisi.

4, 5. 1) Wawanakapan arsupjjañapatakejja, ¿kunsa awk taykanakajj lurapjjaspa? (17 janankir foto uñjjattʼam.) 2) Wawanakaman arsupjjañapatakejja, ¿kunas yanaptʼawayapjjtam?

⁴ Wawanakajj qʼajjo waynäjjapjje jan ukajj qʼajjo tawaqöjjapjje ukhajja, yaqhep awk taykanakatakejj jupanakamp parlañajj chʼamakëjjewa. Uka maranakar mantapjje ukhajja, wayn tawaqonakajj janiw khitimpis parlañ munjjapjjeti, janirakiw kunsa amuyapjje kunjamas jikjjatasipjje ukanak arsuñsa munjjapjjeti. Wawanakamajj ukham jikjjatasipjjchi ukhajja, ¿kunsa lurasma? Janiw munkir jan munkir parlayañamäkiti. Jan ukasti, yaqha horasanakanwa sumat parltʼasipjjasma (Deu. 6:6, 7). Ukatakejj tiemp apstʼasiñamawa. Inas thak sarkasina, autot sarkasina, utan kun lurkasina, jan ukajj kun anatkasina jupanakamp parltʼchisma. Ukhamanakanwa wayn tawaqonakajj kunjamas jikjjatasipjje ukanak jan ajjsaras arsupjjaspa.

⁵ Wawamatï janipuni arsuñ munkani ukhajja, aka ewjjtʼanakaw yanaptʼiristam. Sañäni, kunsa jichhürojj lurawayta sasin phuchamar jisktʼañat sipansa, kunsa jumajj lurawayta ukwa nayraqat awistʼañama. Inas ukhamat awistʼarakiristam. Jan ukajj kun jisktʼañ munasasa, janiw cheqaki jisktʼañamäkiti, jan ukasti, amigapajj uka toqet kamsaspasa ukwa jisktʼañama. Ukjjarusti, jupajj kunjamsa amigaparojj yanaptʼaspa ukwa jisktʼarakisma.

6. ¿Kunjamatsa wawanakamajj jupanakatak tiemponïtamsa ukat suma istʼasirïtamsa amuyapjjani?

⁶ Wawanakaman chuymap yatiñ munapjjsta ukhajja, tiempwa apstʼasipjjañama. Jumanakatï jan tiemponiki sarnaqapjjäta ukhajja, janiw wawanakamajj kuna llakipsa awistʼasipkätamti. Maysa toqetjja, parltʼatajj sumwa istʼapjjañamaraki. Janiw “yanaptʼa munät ukhajj jutaskakïtaw” sañakïkiti. Jan ukasti, parltʼatajj janiw jankʼaki colerasipjjañamäkiti, janirakiw jan yäqeris tukupjjañamäkiti. 19 marani Kayla sat tawaqojj akham siwa: “Tatajampejj kuna toqetsa parltʼasikiristwa, parltʼatajj sum istʼitu, janiw amuktʼaykitusa, ni juchañchkitusa. Qhepatsti sumwa ewjjtʼarakitu” sasa.

7. 1) ¿Kunjams awk taykajj casarasiñ toqeta jan ukajj yaqha ukham toqenakat wawanakapampejj parlapjjaspa? 2) ¿Kunas wawarojj mayjtʼasiyaspa?

⁷ Wawanakajj awisajj yaqhep toqenakat parlañjja ajjsarayasipjjaspawa, sañäni, casarasiñ toqetjja janiw facilak parlapkaspati. Ukhamajj wawamamp uka toqet parlasajja, janiw kuna jan walinakarus purtʼasispa uka mayak ewjjsuñamäkiti, jan ukasti kunjamsa casarasiñarojj uñjañapa ukwa sum amuytʼayañama. Mä restauranter manqʼeris sarkasma ukham amuytʼañäni. Ukanjja, kuna manqʼas utji ukat sapa manqʼajj kuna jan walirus puriyiristam ukanak pizarrapan qellqkatata uñjasma ukhajja, ¿kamachasmasa? Inas yaqha restauranter sarjjchisma. Niya ukhamarakiw wawamampejj pasaspa. Jumatï kuna jan walinakarus purtʼasispa ukanakaki wawamar ewjjsuskasma ukhajja, wawamajj mayjtʼasispawa, janirakiw kunsa jisktʼasjjeristamti (Colosenses 3:21 liytʼañataki). Ukhamajj awk taykanaka, jan sint ewjjsupjjamti, janirak aleq ukhamakis jaytapjjamti. Emily sat mä tawaqojj akham siwa: “Tatajamp mamajampejj casarasiñat parlapjjetu ukhajja, janiw casarasiñajj juchäkaspas ukham parlapkituti, jan ukasti maynimp casarasiñatak uñtʼasiñajj wali askiwa sasaw sapjjetu. Ukatwa jupanakamp uka toqet parlañjja jan ajjsarayaskti. Khitimp uñtʼasiñ qalltä ukhasa, jupanakajj yatipjjarakiniwa. Janiw jupanakat kuns imtʼkäti” sasa.

8, 9. 1) ¿Kunatsa jan amuktʼayasa pacienciampi istʼañajj wal askejja? 2) Pacienciamp istʼasajj ¿kunjamsa wawanakamar yanaptʼawayapjjta?

⁸ Kunjamtï Kayla kullakajj siskänjja, wawanakan parltʼatajja, awk taykajj pacienciampiw sum istʼapjjañapa (Santiago 1:19 liytʼañataki). Katia sat mä kullakajj sapakiw phuchapar uywasi, jupasti siwa: “Nayrajj janiw paciencianïkayätti. Phuchajajj parlkitäna ukhasa, jankʼakiw amuktʼayirïta. Awisajj wali qaritaw jikjjatasirïta, janiw khitin parlatäñsa munirïkti. Jichhajj janiw nayrjamäjjtti, phuchajas janiw ukhamäjjarakiti. Jupajj taqe kunwa awistʼasjjetu” sasa.

⁹ Ronald sat mä jilatarojj niya ukhamarakiw phuchapampejj pasarakïna. Jupasti siwa: “Kunapachatï phuchajajj colegion mä waynampiw uñtʼasisipkta sasin situ ukhajja, walpun colerasta. Ukampis Jehová Diosat amtasiñaw wal yanaptʼawayitu, Jupajj servirinakaparojj wali pacienciampiw uñji, ukatjja wali amuytʼirirakiwa. Ukatwa janejj jankʼaki phuchajarojj cheqañchkti, jan ukasti pacienciampiw parlañ tukuyañapkam istʼta. ¡Walikjjay ukham lurchiyäta! Ukhamatakwa kunjamas jikjjatasïna uksa amuyawayta. Parlañ tukuyjjäna ukhajja, munasiñampiw ewjjtʼarakta. Jupasti uka ewjjanak sum katoqtʼasirakitu, ukatjja janiw ukham sarnaqjjäti sasaw sarakitu” sasa. Awk taykanaka, wawanakamampitï sapa kuti sum parlasipjjäta ukhajja, kunas chuymapansa amuyupansa utji ukwa yatipjjäta. Ukatjja, ukarjamaw suma amtanakar puriñsa yanaptʼapjjarakïta.a

DIOSAT SUM YATICHAÑAMA

10, 11. ¿Kunjamsa wawanakamarojj jan cheqa thakit saranukupjjañapatakejj yanaptʼapjjasma?

¹⁰ Yaqhep uwijanakajj awisajj saranukupjjaspawa, uk sum awatirinakajj yatipjje. Inas pasto laykojj jukʼat jukʼat jayarstʼasin chhaqapjjchispa. Niya ukhamarakiw wawanakamarojj pasaspa. Jukʼat jukʼatwa jan wali amigonakasa jan ukajj akapachan kuna kʼuchirtʼäwinakapasa jan wali thakir irpanukuspa (Pro. 13:20). ¿Kunjamatsa ukar jan purtʼasipjjañapatakejj wawanakamar yanaptʼapjjasma?

¹¹ Wawaman kunan aynachtʼaskatap amuysta ukhajja, jankʼaki yanaptʼam. Kunanaktï cristianjamajj sum luraski ukanak jukʼamp sum luraskakiñapatakis chʼamañchtʼaskakim (2 Ped. 1:5-8). Familian Diosar yupaychañataki tantachasipkta ukhaw uka toqenakat sum yanaptʼasma. Diosan Apnaqäwipat Yatiyañataki sat qellqatajj 2008 octubre phajjsin mistkäna ukanjja akham sänwa: “Jehová Diosan nayraqatapan luräwinakam phoqapjjañamataki ukhamarak familpach Bibliat yateqañ jan jaytasa sarantayasipkakiñamatakiw familia pʼeqtʼirinakarojj chʼamachtʼanipjjsma” sasa. Jumajj ukham tantachtʼasisajj ¿sumti wawanakamar yanaptʼaskta? Dios toqet yatichañataki chʼamachasitamarojj jupanakajj wali askitwa uñjapjje, uk janipun armasimti (Mat. 5:3; Fili. 1:10).

12. 1) ¿Kunjamsa familian Diosar yupaychañajj wayn tawaqonakarojj yanaptʼaspa? (“Wali askitwa uñjapjje” sat recuadro uñjjattʼam.) 2) ¿Kunjamsa familian Diosar yupaychañajj jumar yanaptʼawaytam?

¹² Carissa sat mä tawaqojja, Familiana Diosar Yupaychañ Arumarojj kunjamsa uñji ukjja akham siwa: “Taqeni sum parltʼasiñatak juntuki qontʼasipjjta, ukajj nayatakejj wali sumawa. Ukaw wal mayachthapipjjetu ukat kunjamas tantachasiwayapjjta uksa sum amtasirakta. Tatajajj sapa semanapuniw waktʼayatarjam phoqe. Jupan chʼamachasitap uñjasajja, nanakajj ukhamarakiw chʼamachasipjjta. Ukatwa tatajarojj wal respetta ukat Diosan uttʼayat pʼeqtʼirjamaruw jupar uñjarakta” sasa. Brittney sat yaqha tawaqojj sarakiwa: “Familian Diosar yupaychañataki tantachasiñajja, nayarojj tatajar mamajar jakʼachasiñwa yanaptʼawayitu. Ukanwa nayat llakisipjjatapsa amuyarakta. Wal chʼamañchtʼapjjetu, familpachsa wal mayachthapipjjarakitu” sasa. Ukhamajj awk taykanakajja, ukham tantachtʼasisaw wawanakaparojj Dios toqet sum yatichapjjaspa, cheqansa ukhamatakwa wawanakaparojj sum uñjapjjaspa.b

SUM IRPAÑAMA

13. ¿Kunjamatsa wawanakamajj Diosar serviñ amtapjjaspa?

¹³ Mä suma awatirejj lawapampiw uwijanakarojj sum irpi ukat jan walinakatsa jarkʼaqarakiwa. Taqe kunat sipansa, nayraqatjja “suma pastonak” manqʼasipjjaspa ukwa awatirejj muni (Eze. 34:13, 14). Awk taykanaka, ukhamwa wawanakamarojj irpapjjañamaraki. Jehová Diosar servipjjañapatakiw yanaptʼapjjañama. Kunjamtï Salmo qellqerejj siskäna ukham wawanakamajj sapjjaspa ukajj wali askipunïspawa. Jupasti sänwa: “Dios Tatitojjay, munañam lurañaw kusisiyitu; yatichäwinakamajj chuymajjankiwa” sasa (Sal. 40:8). Wawanakamatï ukham jikjjatasipjjani ukhajja, Jehová Diosar jakäwip katuyasisaw bautisasipjjani. Ukampis ukham amtañatakejj sumwa wawanakamajj amuytʼasipjjañapa, ukat cheqpachapuniw Jehová Diosar serviñsa munapjjañaparaki.

14, 15. 1) ¿Kunatakis cristiano awk taykanakajj chʼamachasipjjañapa? 2) ¿Kunatsa yaqhep wayn tawaqonakajj pächasipjjaspa?

¹⁴ Wawamatï Diosar serviñatak jan chʼamachaskchi jan ukajj janis cheqa religionankkaspa ukham amuyaschi ukhajja, ¿kamachasmasa? Jehová Diosar munasiñapataki ukhamaraki kuntï Diosajj lurawayki ukanakar wali askit uñjañapataki yatichaskakim (Apo. 4:11). Amuytʼasjjani ukhajja, jupaw Diosar serviniti janicha ukjja amtjjani.

¹⁵ Wawamatï pächaschi ukhajja, ¿kunjamatsa yanaptʼasma? Jehová Diosar servisakiw jichhasa jutïrinsa sum sarnaqassna sasin ¿kunjamatsa amuytʼayasma? Nayraqatajj kunatsa pächasi ukwa yatjjatañama. ¿Kuntï Bibliajj siski ukanakatti pächasi, jan ukajj yateqer masinakapar Diosat yatiyañ ajjsarasakich ukhamäski? ¿Janis Jehová Diosan kamachinakapajj askïkaspa ukhamti amuyi, jan ukajj sapaki ukat yaqhachata jikjjatasisakich ukhamäski?

16, 17. ¿Kunjamsa awk taykanakajj wawanakaparu Jehová Diosar jakʼachasipjjañapatakejj yanaptʼapjjaspa?

¹⁶ ¿Kunjamsa wawamarojj Diosar serviskakiñapataki, jan pächasiñapataki yanaptʼasma? Yaqhep awk taykanakajj akham jisktʼasaw yanaptʼawayapjje: “Diosar servisajj ¿kunjamas jikjjatasta? ¿Kunatsa Diosar serviñajj askejja? ¿Diosar serviñajj chʼamati? Kuna bendicionanaktï katoqtan ukhamaraki jutïrin katoqkañäni ukajja, ¿kunjamakis jumatakejja? ¿Janit bendicionanakajj taqpach chʼama tukutasat sipansa jukʼamp askïki?” sasa. Uksti kunjamtï parlasirïkta ukarjamaw munasiñamp jisktʼañama. Janiw qontʼayasin jisksuñamäkiti. Parltʼasipkäta ukhajja, inas Marcos 10:29, 30 qellqatat parltʼapjjchisma. Yaqhep wayn tawaqonakajj mä papelaruw pä lista qellqtʼasipjjaspa. Mayarojj bendicionanak usktʼapjjaspa, maynirusti kunanakatï jupatakejj chʼamäki ukwa qellqtʼasipjjarakispa. Ukanak uñjasaw kunatsa pächasiski uk amuyasini, jumas ukarjamaw yanaptʼarakïta. Ukatjja, niyakejjay jaqenakarojj Kunsa yatichi ukat Diosan munasiñapa sat libronakamp yatichstanjja, ¿wawanakasarojj uka libronakamp yaticharaktanti?

¹⁷ Wawanakamajj jupanak pachaw Jehová Diosar servipjjaniti janicha ukjja tiempopar amtjjapjjani. Janiw jumanakar uñjasakejj arkanipkätamti. Jan ukasti, jupanak pachpaw Jehová Diosarojj jakʼachasipjjañapa (Pro. 3:1, 2). Wawamatejj Diosar jan jakʼachasirjamäkchi ukhajja, qallta yatichäwinakatwa amuytʼayasma. Akham jisktʼasiñapatakiw yanaptʼasma: “¿Kunjamatsa Diosan utjatap yattjja? ¿Kunatsa Diosajj nayat llakisiw sasajj sistjja? ¿Kunatsa Diosan mayitanakapajj nayan askijatakiw sasajj sistjja?” sasa. Awk taykanaka, suma awatirïñataki chʼamachasipjjam. Wawanakamarojj wali pacienciampi yanaptʼapjjam, ukhamat jupanak pachpa Jehová Diosar serviñajj kunja askisa uk amuyapjjañapataki (Rom. 12:2).c

18. ¿Kunsa awk taykanakajj Jehová Diosat yateqasipjjaspa?

¹⁸ Taqe cristianonakaw Jehová Dios Awatirisat yateqasiñ muntanjja (Efe. 5:1; 1 Ped. 2:25). Ukampis awk taykanakaw wawanakapar sum uñtʼañatakejj alajjpachankir Awkisat yateqasipjjañapa. Jehová Diosan bendicionanakap katoqapjjañapatakiw wawanakaparojj wal yanaptʼapjjañapa. Ukhamasti awk taykanaka, wawanakamar sum uñjapjjam, alajjpachankir Awkipar uñtʼapjjañapataki yatichapjjam.