¿Bibliajj jisktʼanakar qhanañchaspati?

¿Jumajj ukanak jisktʼasirïtati? Jumjamajj waljaniw jisktʼasipjjaraki. Taqe jaqenakaw jisktʼanakapan qhanañchäwip jikjjatañ munapjje. ¿Uk jikjjatsnati?

Millón millón jaqenakajj ‘jikjjatsnawa’ sapjjewa. Jupanakajj Biblianwa cheqpach qhanañchäw jikjjatapjje. ¿Kamsis Bibliajj uk yatiñ munasmati? Uk yatisajj inas kuntï Jehová Diosan Qhanañchirinakapajj jan qollqe mayisaki Bibliat yatichapki uk katoqañ munarakchïta.a

Yaqhep jaqenakajja, Bibliat yatjjatañ toqet akham sapjjewa: “‘Janiw tiemponïkti’, ‘chʼamawa’, ‘janiw kuns yatiñ munkti’” sasa. Ukampis Bibliat yatjjatawayapki ukanakajj kamsapjjesa uk uñjañäni:

• “Católica ukat protestante iglesianakarusa, sijismo religionan temploparusa, budistanakan monasterioparus sartwa ukat Teología toqetsa universidadan yateqaraktwa. Ukampis janiw taqe jisktʼanakajan qhanañchäwip jikjjatkti. Jehová Diosan mä qhanañchiripaw visittʼitu. Jupaw Bibliampi jisktʼanakajar qhanañchitu, ukajj wal muspharayitäna, ukatwa Bibliat yatichäma satajj iyaw sista.” (Gill, Inglaterra.)

• “Jakäw toqet wal yatiñ munayäta, ukampis kuntï iglesiajankir pastorajj qhanañchkitäna ukajj janiw yanaptʼkitänti. Ukampis Jehová Diosan mä qhanañchiripaw kunanakattï pächaskayäta uk Biblia sapampiki sum qhanañchtʼitu. ‘¿Bibliat yateqañ munasmati?’ sasin jisktʼatajj jïsa muntwa sasaw sista.” (Koffi, Benín.)

• “Jiwatanakat wal yatiñ munayäta. Jupanakajj ñanqhachitaspawa sasaw amuyayäta ukat Bibliajj kamspachasa sasaw jisktʼasiyäta. Ukatwa Jehová Diosan mä qhanañchiripampi Bibliat yateqañ qallta.” (José, Brasil.)

• “Qalltanjja, Biblia liyisajj janiw kuns amuykayätti. Mä uruw Jehová Diosan Qhanañchirinakapajj visittʼapjjetu ukat Biblian walja jiskʼa tʼaqanakapatwa qhanañchapjjetu. Ukaw jukʼamp yatjjatañatak yanaptʼawayitu.” (Dennize, México.)

• “Diosajj cheqapunit nayat llakispacha sasaw jisktʼasiyäta. Biblian parlki uka Diosaruw mayisiñ qalltta. Qheparmantejja, Jehová Diosan Qhanañchirinakapaw visittʼapjjetu ukat jupanakampiw Bibliat yateqañ qalltta.” (Anju, Nepal.)

Uka experiencianakajj Jesusan aka arunakap amtayistu: “Kusisiñanïpjjew khitinakatejj ajay toqen aynachtʼatäpjjatap amuyasipjje ukanakajja” sasa (Mateo 5:3). Taqeniw kusisit jakasiñ muntanjja, Diosakiw Biblia toqe yanaptʼistaspa.

¿Kunjamsa Bibliata yatichasi? ¿Kunjamsa ukajj yanaptʼiristamjja? Uk jichhajj uñjañäni.