AKA REVISTA LIYTʼIRINAKAN JISKTʼÄWINAKAPA
Magog markat Gog satäkis ukajj ¿khitïpachasa?
Bibliat apstʼat qellqatanakasan akham sasaw walja maranak qhanañchasiwayi: ‘Alajjpachat jaqoqanitäkäna ukhat aksaruw Supayarojj uka sutimp uñtʼasi’ sasa. ¿Kunatsa? Supayaw Diosan markap contra saytʼasipjjañapatak taqe markanakar pʼeqtʼani sasaw Apocalipsis librojj qhanañchi (Apo. 12:1-17, NM). Ukatwa ‘Gog siski uka sutejj Supayan yaqha sutipäpachawa’ sasin amuyasïna.
Ukampis walja jisktʼanakaw uka toqet utjäna. Amuytʼañataki, Gog satäkis ukajj atipjat uñjasiñapäkäna uka tiempot parlkasajja, Jehová Diosajj akham sänwa: “[Jañchimjja] alajjpach jamachʼinakaru, monte animalanakaru manqʼantapjjañapataki katuyäjja” sasa (Eze. 39:4). Ukat sarakïnwa: “Uka urunakasti Gog siski juparusti mä cheqwa Israel markan churarakëjja, [...] ukanwa Gog siski ukarojj imantjjapjjarakini, ukhamaraki taqpach ejercitoparusa” sasa (Eze. 39:11). Ukampis ajay cuerponirojja, ¿‘jamachʼinakasa’ ukat ‘montenkir animalanakas’ manqʼantapjjaspati? Ukat ¿Supayan cuerpopajj aka Oraqen imantatäspati? Janiwa. Supayajj waranq maranakaw mikʼayar jaqontatäni sasaw Bibliajj yatichi, janiw manqʼantatäniwa jan ukajj imantatäniw sasin siskiti (Apo. 20:1, 2).
Ukat waranq maranak tukuyarojja, Supayajj “taqe markanakar [engañjañatakiw] mistuni, Gog ukhamarak Magog satäkis ukanakarusa. Ukatsti ukanakan ejercitonakaparurakiw nuwasiñataki tan[tachthapini]” sasaw Bibliajj saraki (Apo. 20:8). Supayatï Gog sasin satäspa ukhajja, ¿kunjamsa jupapachpajj engañjasispa? Ezequiel ukat Apocalipsis libronakan parlki uka Gog satäkis ukajj janiw Supayäkaspati.
Ukhamajj Magog markat Gog satäkis ukajj ¿khitïpachasa? Uk yatiñatakejj khitinakas Diosan markap contra saytʼapjjani ukwa nayraqat yatjjatañasa. Diosan markaparojj ‘Magog markat Gog satäkis’ ukaw nuwantani, ‘alayankir reyiw’ nuwantani ukat ‘akapach reyinakaw nuwantapjjani’ sasaw Bibliajj yatichi (Eze. 38:2, 10-13; Dan. 11:40, 44, 45; Apo. 17:14; 19:19). ¿May may nuwasïwinakatti Bibliajj parlaskpacha? Amuyatajja, mä nuwasïwitakwa Bibliajj parli. ¿Kunatsa ukham sissna? Taqe markanakaw Diosan markap contrajj saytʼapjjani sasaw Bibliajj qhanañchi, ukhamatwa Armagedón chʼajjwäwejj qalltani (Apo. 16:14, 16).
Khitinakas Diosan markap contra saytʼapjjani uk Bibliat sum yatjjatasajja, Magog markat Gog satäkis ukajj khitisa uk amuyjjsnawa, janiw Supayäkiti, jan ukasti, mayachtʼat walja markanakawa. Uka markanakajja, ¿‘alayankir reyin’ pʼeqtʼatäpjjpachäniti? Inas ukhamächini. Ukatwa Jehová Diosajj Gog satäkis ukjjat parlkasajj akham sispachäna: “Markamatpachwa sartawayäta, uka jaya amsta [jan ukajj alaya] toqetpacha, walja chʼamani ejercitomampi, caballería soldadonakampi chika” sasa (Eze. 38:6, 15).
Ukat Ezequiel profetan tiempopan jakiri Daniel profetajj alayankir reyit parlkasajj akham sarakïnwa: “Inti jalsu toqeta, ukhamaraki amsta toqenakatwa yatiyäwinakajj juparojj purinirakini, uka yatiyäwinakasti juparojj wali thoqtasiyarakini; ukhamasti jupajj sinti coleratapuniw misturakini, walja jaqenaka jiwarayañ chuymampiraki. Ukatsti campamentopjja jachʼa qotampi, ukhamaraki Suma Oraqen qollan qollupäki uka taypiruw uttʼayasirakini. Ukampisa uka pachparuw jiwañapa horasajj purinirakini, janirakiw khitis jupar yanaptʼirejj utjkaniti” sasa (Dan. 11:44, 45). Gog satäkis ukajj kunanaksa lurañapäna uka toqetwa uka qellqatajj parli, Ezequiel librojj niya ukhamarakwa qhanañchi (Eze. 38:8-12, 16).
Uka qhepatjja, ¿kunas pasañapäna? Daniel profetajj akham siwa: “Ukapachaw [Armagedón chʼajjwäwina] Miguel angelajj [Jesucristojj] uñstanirakini, kawkïri jachʼa arjjatasiri angelatejj markamarojj [1914 marat aksarojj] arjjatki uka: ‘Ukasti mä llakisiña horasäniwa [jachʼa tʼaqhesiñ urunaka], uka horasjamasti janipuniw kunapachas utjkänti, kunapachattejj markanakajj uñsti ukat aksarojja. Kunapachatejj uka horasajj purinini ukapachasti, markamankirinakajja taqeniw qhespipjjani, kawkïrinakatejj sutinakapajj libron qellqatäki ukanakajja’” sasa (Dan. 12:1). Kuntï Diosan uttʼayat Jesucristojj lurkani ukajj Apocalipsis 19:11-21 qellqatanwa qhanañchasiraki.
Apocalipsis 20:8 qellqatajj parlki uka ‘Gog ukhamarak Magog’ satäkis ukanakajja, ¿khitinakäpjjesa? Waranq maranak tukuyatar Jehová Dios contra saytʼasipkani ukanakawa, jupanakajj Magog markat Gog satäkis jupjam jan wali chuymanïpjjatapwa uñachtʼayapjjani. Armagedón janïr qalltkipan Diosan markap contra saytʼasipkani uka markanakjamäpjjaniwa. Uka markanakasa, ‘Gog ukhamarak Magog’ satäkis ukanakasa, wiñayatakiw tukjatäpjjani (Apo. 19:20, 21; 20:9). Ukatwa akham sissna: ‘Waranq maranak tukuyatar Dios contra saytʼasipkani ukanakaw “Gog ukhamarak Magog” satäpjje’ sasa.
Bibliat yatjjatirinakjamajja, jutïr urunakan ‘alayankir reyejj’ khitïnisa uk wal yatiñ muntanjja. Cheqas Diosan markap contra saytʼasipkani uka markanakarojj khitis pʼeqtʼani uk janiw sum yatktanti. Ukampis aka pä toqenakat janiw pächasktanti: 1) Magog markat Gog satäkis ukasa ejercitopasa tukjatäpjjaniwa; ukat 2) Reyjam uttʼayat Jesucristojj Diosan markaparuw qhespiyani ukat mä suma oraqen jakasipjjañapatakiw yanaptʼani, ukanjja taqe kunas sumapunïniwa (Apo. 7:14-17).