BIBLIA TOQET JISKTʼANAKA
¿Kunatsa jan walinakajj utjpacha?
¿Khitis Jesusar jan walinak lurayañ munäna? (Mateo 4:8-10)
Janiw khitis kʼarisiña, mayninakar tʼaqhesiyaña munktanti. Antisas suma jaqëñ muntanjja. Ukhamajja, ¿kunatsa jan walinakasa, jan cheqapar uñjañas utji? Cheqas sapüruw jan wali yatiyäwinakajj istʼasi. ¿Khitis uka jan walinak utjayi? (1 Juan 5:19 liytʼäta.)
¿Diosat ukham jan walinak munir chuyman lurpachïstu? Janiwa. Diosajj Jupar uñtasitwa lurawayistu. Jupjam munasiri, khuyaptʼayasiri ukhama (Génesis 1:27; Job 34:10). Ukampis jiwaspach kuns amtjjañasatakiw lurawayistu. Adanampi Evampejj janiw Diosat yateqasipkänti, ukatwa jan walinak lurapjjäna. Ukhamatwa jan juchanïñsa aptʼasiwayapjje. Wawanakanëjjapjjäna ukhajja, wawanakapajj jupanakjam juchararaw nasipjjarakïna. (Deuteronomio 32:4, 5 liytʼäta.)
¿Jan walinakajj utjakipuniniti?
Jan walinak lurañ munañar atipjañaswa Diosajj muni (Proverbios 27:11). Suma jaqëñatakejj yanaptʼanak churistu. Jiwasatï ewjjtʼanakapar istʼañäni, Jupjam munasirïñatakis chʼamachasiñäni ukhajja, kusisitaw jakasiñäni. Ukampis jichha tiemponjja, janiw sumpun Jupat yateqasksnati. Ukhamajj ¿jan walinakajj utjakipuniniti? (Salmo 32:8 liytʼäta.)
Kunarus jan walinakajj purtʼasiyaspa uk amuyañasatakiw Diosajj jan walinak jan jankʼak tukjkiti. Ukampis janiw wiñay ukhamak jaytkaniti (2 Pedro 3:7-9). Niyaw aka Oraqejj suma jaqenakampi, Diosat taqe chuyma yateqasir jaqenakampi phoqantatäjjani. (Salmo 37:9-11 liytʼäta.)