BIBLIA TOQET JISKTʼANAKA
¿Kunatï Diosat cheqäki uk yatsnati?
¿Kunatsa Diosajj kunatï cheqäki uk yatiñas muni? Juan 17:3 liytʼäta
Jehová Diosajj jaqenakamp parlänwa. Qollan ajayup toqew jan ukajj chʼamap toqew Biblia qellqerinakar amuytʼayäna (2 Pedro 1:20, 21). Ukhamajja, Diosan Arup liytʼasaw Jupar sum uñtʼsna. (Juan 17:17 ukat 2 Timoteo 3:16 liytʼäta.)
Jehová Diosajja, Biblia toqew kunjam Diosasa uk wali sum yatichistu. Ukanjja, kunatsa jaqenakar luräna ukhamarak kunsa jutïrin jupanak layku lurani ukat kunjam sarnaqañassa muni uka toqenakat sum qhanañchistu (Hechos 17:24-27). Ukhamasti kunatï Jupat cheqäki uk yatiñaswa muni. (1 Timoteo 2:3, 4 liytʼäta.)
¿Kunatsa Diosajj kunatï cheqäki uk thaqerinakar katoqe?
Jehová Diosajj cheqapa Diosawa, jupajj Jesucristo Yoqaparuw aka Oraqeru jaqenakar kunatï cheqäki uk yatichañapatak khitanïna. Ukhamajj cheqa yatichäwinak thaqapki ukanakajja, Jesusan yatichäwinakaparojj iyawsapjjewa (Juan 18:37). Diosajj uka kasta jaqenakamp yupaychayasiñ muni. (Juan 4:23, 24 liytʼäta.)
Supayajj kʼarinak yatichasaw Diosar uñtʼañat walja jaqenakar jarkʼi (2 Corintios 4:3, 4). Khitinakatï cheqa yatichäwinak jan thaqapki ukanakajja, kʼari yatichäwinakarjamakiw sarnaqapjje (Romanos 1:25). Ukampis jichhürunakanjja, millón millón jaqenakaw Bibliat yatjjatasajj Diosat kunatï cheqäki uk yateqawayapjje. (Hechos 17:11 liytʼäta.)