Aka revista liytʼirinakan jisktʼäwinakapa

‘Diosasti janiw jumanakarojj jachʼa jan atipkaya yantʼanakan uñjasiyapkätamti’ sasaw apóstol Pablojj säna (1 Cor. 10:13, NM). Uka arunak liytʼasajja, ¿kunanaktï aguantañ puedksna ukanak sum amuytʼasaw Diosajj kuna yantʼanakansa uñjasiñäni ukanak amtjje sasat amuyañasäspa?

Uka toqet jichhajj sum amuytʼañäni. Mä jilatan wawapajj jupa pachpaw jiwayasïna. Ukatwa jilatajj akham säna: “Wawajan jiwatapat aguantapjjäti ukjja, ¿Diosajj janïrakipanti yatpachäna? ¿‘Jupanakajj aguantapjjaniwa’ sasin amuyasati Diosajj uka yantʼan uñjasiyapjjpachïtu?” sasa. Ukhamajja, ¿kunas jutïrin pasistani uk sumti Diosajj yatpacha? ¿Bibliajj kamspachasa?

Sum amuytʼañatakejja, 1 Corintios 10:13 qellqatan apóstol Pablon arunakapajj jikjjataski uk amuytʼañäni. Ukarjamajja, kunsa aguantsna kunsa jan aguantkaraksna ukjja Jehová Diosajj janiw janïräkipan amtkiti. Ni ukarjam amuytʼasas yantʼanakan uñjasiykistuti. ¿Kunatsa ukham sistanjja? Uk jichhajj pusi toqet yatjjatañäni.

Maya, Jehová Diosajj amtasarjam sarnaqerwa lurtʼawayistu. Jakäwisan kunsa lurañäni uk jiwas pachpa amtsna ukwa Diosajj muni (Deu. 30:19, 20; Jos. 24:15). Jiwasatï Jehová Diosar serviñ ajlliñäni ukhajja, Juparuw yanaptʼap mayiñasa (Pro. 16:9). Ukampis Jehová Diosampi jan yanaptʼayasiñ ajlliñäni ukhajja, jan walinakan uñjasisajj jiwasaw ukat mistuñatak chʼamachasiñasa (Gál. 6:7). Ak amuytʼañäni: kuna jan walinakansa uñjasiñäni uk Jehová Diosatï janïräkipan ajllispa ukhajja, jiwas pachpa amtir lurawaykistu ukar jan respetatapwa uñachtʼayaspa.

Paya, “horasajj jan waltʼañajj taqeniruw puri”, janiw Jehová Diosajj ukat jarkʼaqkistuti (Ecl. 9:11). Jan wali accidentenakaruw purtʼassna, inas ukajj jan suma lugarankatasata, jan ukajj yaqha ukhamanakat paschistaspa. Mä kutejja, Jesusajj Siloé torrempi tinkjjatata jiwarapkäna uka 18 jaqenakatwa parläna. Jupanakajj janiw Diosan munañapat ukham jiwarapkiti sasaw sarakïna (Luc. 13:1-5). Jiwasatï ‘Jehová Diosaw khitis jakani, khitis jiwarakini uk amti’ sasin amuysna ukhajja, pantjasisksnawa.

Kimsa, Jehová Dios toqet saytʼasiñäniti janicha ukjja sapa mayniw amtjjañasa. Supayajja, Jehová Diosar akham sänwa: ‘Jumatï servirinakamar jan yanaptʼkasma ukhajja, janiw jumar sirvjjapjjeristamti’ sasa (Job 1:9-11; 2:4; Apo. 12:10). Diosatï ‘servirinakajajj janiw aka yantʼar aguantapkaspati’ sasin jarkʼaqestaspajja, ‘interés laykukiw servipjjtamjja’ sasin Supayajj siskäna ukajj cheqäkaspas ukhamäspawa.

Pusi, kunanakas jutïrin pasistani ukanakjja Jehová Diosajj janiw janïräkipan amtkiti. Kunanakas jutïrin pasistani uk yatiñ munaspa ukhajja, Diosajj yatispawa (Isa. 46:10). Ukampis Bibliarjamajja, Diosajj janiw kunatï jutïrin paskani ukanak ajllkiti (Gén. 18:20, 21; 22:12). Jehová Diosajj wali munasiri cheqap Diosawa. Ukhamajj jiwas pachpa mä amtar puriñataki lurawaykistu uk respetiwa (Deu. 32:4; 2 Cor. 3:17).

‘Diosasti janiw jumanakarojj jachʼa jan atipkaya yantʼanakan uñjasiyapkätamti’ sasin Pablojj siskäna ukajja, ¿kun sañsa munpacha? Yantʼanakan uñjasktan ukhajj kunsa Diosajj luri ukjjatwa Pablojj parlaski, janiw kunsa yantʼanak janïr purinkipan luri uka toqet parlkiti. Jiwasatï Jehová Diosar confiyañänejja, taqe kunanwa yanaptʼistani (Sal. 55:22). Kunatsa Pablojj ukham sispachäna uk pä toqet yatjjataskakiñäni.

Nayrïri, taqe jaqenakaw yantʼanakan uñjastanjja. Diosar servirinakasa Diosar jan servirinakasa, niya pachpa yantʼanakanwa uñjastanjja. Jiwasatï Jehová Diosar taqe chuyma confiyañäni ukhajja, yanaptʼapampejj uka yantʼanakar saykatañäniwa (1 Ped. 5:8, 9). 1 Corintios 10 capitulopanjja, kuna yantʼanakansa israelitanakajj wasaran uñjasipjjäna uka toqetwa Pablojj parli (1 Cor. 10:6-11). Kuna yantʼanakantï jaqenakajj uñjasipkäna uka yantʼanakanwa israelitanakajj uñjasipjjarakïna, janiw mä yantʼas jan aguantañjamäkänti. Israelitanakat yaqhepajja, Diosaruw kutkatasipjjäna sasajj pusi kutiw Pablojj ayti. Cheqas Diosar jan confiyapjjatap laykuw yaqhepajj jan wali lurañanakampi apayasipjjäna.

Payïri, Diosajj jan jaytjasiriwa. Jehová Diosasti “khitinakatï taqe munasiñ chuymampi munapki ukhamaraki mandamiento arunakapsa phoqhapkaraki ukanakar[ojj]” sum uñji (Deu. 7:9). Nayrat jichhakamasa, Jehová Diosajj taqe arsutanakap phoqerïtapwa uñachtʼayistu (Jos. 23:14). Jan jaytjasir Diosätap yatisajja, Jupar munasipktan istʼapjjaraktan ukanakajj taqe chuymaw Jupar confiyañasa. Diosajj akanak phoqapuniniwa: 1) Janiw jachʼa jan atipkaya yantʼanakan uñjasiykistaniti, 2) yantʼanakat mistuñatakejj yanaptʼistaniwa.

¿Kunjamsa Diosajj taqe chuyma servirinakaparojj yantʼanakat mistupjjañapatakejj yanaptʼi? Jupajj jankʼakiw kuna yantʼantï uñjasktan uk chhaqtayaspa. Ukampis Pablon aka arunakapat amtañäni, jupajj sänwa: “Diosajj kunjämatsa uka yantʼar atipjañjja yanapapjjarakïtamwa” sasa. Ukhamasti jan walinakat mistuñatakejja, kunatï wakiski ukampiw Diosajj niya jila parte yanaptʼistu. ¿Kunjamsa yanaptʼistu? Uk jichhajj uñjañäni:

• “Taqe tʼaqhesiñanakasanwa Diosajj chuymachistu” (2 Cor. 1:3, 4). Chuymasana amuyusana sumakïñatakejja, Jehová Diosaw Bibliampi, qollan ajayupampi ukhamarak Amuyasiri Cheqapa Uywatampi yanaptʼistaspa (Mat. 24:45, MT; Juan 14:16; Rom. 15:4).

• Qollan ajayupampiw yanaptʼistaspa (Juan 14:26). Yantʼanakan uñjasktan ukhajja, Diosan qollan ajayupaw Bibliankir jiskʼa tʼaqanakap amtañataki ukhamarak sum amuytʼasiñatak yanaptʼistaspa.

• Jehová Diosajj angelanakampiw yanaptʼistaspa (Heb 1:14).

• Jilat kullakanak toqew Diosajj yanaptʼistaspa, jupanakaw arunakapampisa, jiwasatak kun lurasas chʼamachtʼapjjestaspa (Col. 4:11).

Pablojj 1 Corintios 10:13 qellqatan siskäna uka arunakatjja, ¿kunsa jichhajj amuytanjja? Kuna yantʼanakansa jutïrin uñjasiñäni ukjja, Jehová Diosajj janiw ajllkiti. Ukampis yantʼanakan uñjasiñäni ukhajja, Jehová Diosaruw confiyañasa, Jupaw yantʼanakar atipjañ yanaptʼistani. Uk yatiñajj ¡wal chuymachtʼistu!