¿Yatiyätati?

¿Judionakan kuna jan wali costumbrepatsa Jesusajj juramento lurañar jan walit uñjäna?

MOISESAN Leyiparjamajja, juramento lurañajj janiw jan walit uñjatäkänti. Ukampis Jesusajj aka oraqenkkäna ukhajja, judionakat jila partejj niya taqe kunatakiw juramento lurapjjerïna, ukhamat kuntï sapki uk creyipjjañapataki. Jesusajj ukham lurañarojj pä kutinwa jan walit uñjäna. Jupajj akham sänwa: “Jumanakatejj ‘jïsa’ sapjjsta ukhajja phoqapjjam, ‘janiwa’ sapjjsta ukhasti janiraki” sasa (Mat. 5:33-37; 23:16-22).

Talmud qellqatan yaqhep cheqanakanjja, judionakajj kun sañatakis juramento lurapjjapunirïnwa ukaw amuyasi sasaw teología toqet parlir mä diccionariojj qhanañchi. Kuna juramentonakas phoqasiñapapuni, kawkïrinakas janiraki ukanakajj Talmud qellqatan sumwa qhanañchasi.

Janiw Jesusakejj uka costumbrer jan walit uñjkänti. Sarnaqäwinakat qellqeri Flavio Josefo chachas akham sasaw judionakan mä sectapat säna: “Juramento lurañajj kʼarisiñat sipansa jukʼamp jan waliwa sasaw judionakajj amuyapjje, ukatwa juramento jan lurapkiti. Maynitï kuntï siski uk creyipjjañapatak juramento lurañapapunïchi ukhajja, uka jaqejj jan walit uñtʼatäjjewa sasaw sapjje” sasa. Judionakan wali uñtʼata Eclesiástico (23:11) sat librojj akham sarakiwa: “Inamayatak juramento lurir jaqejj juchampiw phoqantasini” sasa. Ukhamasti, taqe kunataki juramento lurañajj janiw Jesusatak walïkänti. Jiwasatï taqe kunan cheqpun parlañäni ukhajja, janiw creyiyasiñatak juramento lurañajj wakiskaniti.