¿Khitinakas Jehová Diosampïpjjta?

1, 2. 1) ¿Kunatsa Jehová Dios toqet saytʼasiñasa? 2) ¿Kunsa aka yatichäwin yatjjataskañäni?

JANIW khitis Jehová Diosat sipan jukʼamp chʼamanisa ni munasiris utjkaspati. Ukatwa Jupa saparuki serviñ muntanjja, Jupa toqet saytʼasiñsa munaraktanjja (Sal. 96:4-6). Ukhamäkchisa, Diosan servirinakapat yaqhepajja, jan walinakan uñjasisajj Jupat jitheqtjjapjjänwa.

² Aka yatichäwinjja, Jehová Diosaruw servipjjta sasin jan walinak lurapkäna ukanakatwa yatjjataskañäni. Uka sarnaqäwinakat yatjjatañaw Jehová Diosat jan jitheqtañatak yanaptʼistani.

JEHOVÁ DIOSAJJ CHUYMAS SUM UÑTʼI

3. 1) ¿Kunatsa Jehová Diosajj Cainar ewjjtʼäna? 2) ¿Jehová Diosajj Cainar kamsänsa?

³ Caín chachat yatjjatañäni. Jupajj Jehová Dios saparukiw sirvta sasaw amuyäna. Ukampis Cainan chuymapan jan walinak utjatapatjja, Jehová Diosajj janiw jupar suma jaqet uñj-jjänti (1 Juan 3:12). Ukatwa Cainarojj akham säna: “Jumatejj kuna[tï] askïki uk lurasma ukkhajja ¿janit jachʼar aptatäkarakismajja? Ukampisa juman jan aski luratam laykojja juchajj jakʼamankaskarakiwa, jumar apnaqañ munaraktam, ukampis jumajj atipjañamawa” sasa (Gén. 4:6, 7). Mä arunjja, Jehová Diosajj akham sañwa munäna: ‘Jumatï arrepentisïta, naya toqet saytʼasïta ukhajj nayajj jumampïskäwa’ sasa.

4. Cainarojj Jehová Dios toqet saytʼasiñapatak tiempojj churatäkchïnsa, ¿kunsa jupajj luräna?

⁴ Cainajj Jehová Diosampi sum apasiskakiñatakejja, kuna jan walinakatï chuymapan utjkäna ukanak apanukuñapänwa. Ukampis ewjjtʼatajj janiw Jehová Diosar istʼkänti. Jan wali amuyunakapampi, jupatakik taqe kuns munañampi atipayasisajj kunatï jan walïki ukwa luräna (Sant. 1:14, 15). Cainajj waynitüskäna ukhajja, janipuniw Jehová Dios contra saytʼañ pienskpachänti. Ukampis tiempompejja, Dios contraw saytʼäna, jilaparus jiwayarakïnwa.

5. ¿Kunas Jehová Diosamp sum apasiñ aptʼasiyistaspa?

⁵ Mä cristianojj Caín chachjamarakiw Diosaruw adorta sasin saspa, ukampis jan walinakwa luraskaspa (Jud. 11). Inas wal predikchispa, tantachäwinakarus jan faltasis sarchispa. Ukampis chuymapan qʼañu juchanak lurañ lupʼiskani, jupatakik taqe kuns munaskani, jan ukajj mä cristiano masipar uñisiskani ukhajja, janipuniw walïkaspati (1 Juan 2:15-17; 3:15). Ukanakajj jucharuw purtʼasiyaspa. Jilat kullakanakajj inas kunanaksa lupʼisktan, kunanaksa lurasktan ukanak jan yatipkchiti, ukampis Jehová Diosajj taqe kunwa uñji. Jupar taqe chuymat servisktan janicha uksa yatirakiwa (Jeremías 17:9, 10 liytʼañataki).

6. ¿Kunjamsa Jehová Diosajj jan walinak lurañ munañar atipjañatak yanaptʼistu?

⁶ Jan walinaksa awisajj lurkstanjja, Jehová Diosajj janiw jankʼak jaytanukkistuti, yanaptʼañ munaskakistuwa. Jupat jitheqtaskatas amuyi ukhajja, akham sistuwa: “¡Nayaru kuttanjjapjjam ukatsti nayajj jumanakaru kuttanjjarakïwa!” sasa (Mal. 3:7). Jehová Diosajj jan walinak jan lurañatak chʼamachastan ukhajja, uka jan walinak contra saytʼasiñaswa muni (Is. 55:7). Ukham lurañäni ukhajja, uka jan walinak lurañ munañar atipjañatakejj yanaptʼistaniwa (Gén. 4:7).

JAN JIWAS PACHPA ENGAÑJASIÑÄNITI

7. ¿Kunatsa Salomonajj Diosamp sum apasiñ aptʼasïna?

⁷ Salomón reyit parltʼarakiñäni. Waynäskäna ukhajja, Jehová Diosan yanaptʼapwa thaqäna, ukatwa Jehová Diosajj yatiñ churäna, Jerusalenan mä suma templo lurañapatakis mayirakïna. Ukampis qhepatjja, Salomonajj Jehová Diosamp sum apasiñ aptʼasïnwa (1 Rey. 3:12; 11:1, 2). Diosan Leyiparjamajja, israelit reyinakajj janiw walja warminakamp casarasipjjañapäkänti, ukhamat Jehová Diosat jan jitheqtapjjañapataki (Deut. 17:17). Ukampis Salomonajj janiw uka leyir istʼkänti. Tiempompejja, 700 warminakampiw casarasïna, 300 uñtʼatanakapaw utjarakïna (1 Rey. 11:3). Uka warminakat waljanejj janiw israelitäpkänti, yaqha diosanakaruw adorapjjäna. Ukhamasti, ‘janiw yaqha markankir warminakampi casarasipjjätati’ siskäna uka leyirus janiw Salomonajj istʼkänti (Deut. 7:3, 4).

8. ¿Kunanak lurasas Salomón reyejj Diosan chuymap ustʼayäna?

⁸ Salomonajj jukʼat jukʼatwa Diosan leyinakapar jan munasjjänti, ukatwa jan walinak lurjjäna. Astarté sat diosatakisa, Quemos sat kʼari diosatakis altaranakwa lurayäna. Ukanwa warminakapamp chikajj uka diosanakar adoräna. Uka altaranakjja, Jehová Diosan templop jakʼaruw lurayäna, Jerusalenat uñkatasinkkäna uka qolluru (1 Rey. 11:5-8; 2 Rey. 23:13). Salomón reyejj inas akham sas amuychïna: ‘Sacrificionak templon loqtaskakï ukhajja, Jehová Diosajj jan walinak luratajat janiw coleraskaniti’ sasa.

9. Salomón reyin Diosar jan istʼatapatjja, ¿kuna jan walinakas utjäna?

⁹ Ukampis Jehová Diosajj janiw juchanak ukhamak uñchʼukkiti. Bibliajj akham siwa: “Israelan Tatit Diosapajj colerasïnwa Salomonataki, jupa Diosar munañ chuymapajj jan utj-jjatapata, kunjämatejj Diosajj pay kuti uñstasina, siskäna jan yaqha diosanakar yupaychañapataki. Ukampis jupajj janiw istʼkänti kuntejj Tatitojj siskäna ukjja” sasa. Ukhamïpanjja, Jehová Diosajj janiw Salomón reyir sum uñj-jjänti ni yanaptʼjjarakïnsa. Israel markajj payaruw jaljtäna, ukhamasti Salomonat jutir reyinakajj janiw markpachar apnaqjjapjjänti, walja maranakaw kunayman jan walinakan uñjasipjjarakïna (1 Rey. 11:9-13).

10. ¿Kunas Diosamp sum apasiñ aptʼasiyistaspa?

¹⁰ Kunatï Salomonar paskäna ukajj jiwasar pasarakistaspawa. Jiwasatï Diosan leyinakap jan amuyapki, jan ukajj uka leyinakar jan respetapki ukanakampi amigösna ukhajja, Diosat jitheqtjjaraksnawa. Jupanakat yaqhepajj Jehová Diosar jan taqe chuyma serviri Testigonakäspawa, jan ukajj Diosar jan servir familiaranaka, utas jakʼan jakirinaka, yateqer masinaka, trabajir masinaka ukanakäpjjaspawa. Amigonakasatï Diosan leyinakapar jan respetapkchejja, tiempompejj Diosamp sum apasitas aptʼasiyistaspawa.

11. ¿Kunas suma amigonak ajlliñatak yanaptʼistaspa?

¹¹ (1 Corintios 15:33 liytʼañataki). Jila parte jaqenakajj suma chuymanïsipkiwa, jan Testigöpki ukanakas janirakiw taqenejj jan walinak lurapkiti. Ukhamajj ¿jupanakan amigopäñajj walikïskaspati? Akham jisktʼasiñasawa: “¿Jupanakajj Jehová Diosamp sum apasiñatak yanaptʼapjjetaniti? ¿Kunjam chuymanïpjjesa? ¿Kuna toqenakatsa parlapjje? ¿Jichhak mistki uka isinakata, kusistʼañanakata, qollqeta, kuna aparatonakatï utjki ukanakatti parlapjje? ¿Mayninakat jan walinakti parlapjje, jan ukajj jan wali arunakampit sawkasipjje?” sasa. Jesusajj akham sänwa: “Mä jaqejja, kunatï chuymapan phoqantatäki ukwa parlaraki” sasa (Mat. 12:34). Chikachasktan ukanakatï Jehová Diosamp sum apasitas aptʼasiyirjamächi ukhajja, janiw añch chikachasiñasäjjeti, jan ukajja janiw jupanakamp parlañasäjjeti (Prov. 13:20).

JEHOVÁ DIOSAJJ JANIW YAQHA DIOSANAKAR SERVIÑAS MUNKITI

12. 1) Israelitanakajj Egipto markat mistjjapjjäna uka qhepatjja, ¿Jehová Diosajj jupanakar kamsänsa? 2) Jehová Diosajj “janiw munkti yaqhanakampïpjjañama” siskäna ukhajja, ¿israelitanakajj kamsapjjänsa?

¹² Israelitanakajj Egipto markat mistjjapjjäna uka qhepat kunatï paskäna ukanakats yateqaraksnawa. Sinaí Qollur puripjjäna ukhajja, Jehová Diosajj wali musparkañanakampiw jupanakar uñstäna. Alajjpachanjja, chʼamak qenayaw qollu patjjar jitjjattäna, lliju llijunakasa, qʼejjo qʼejjonakasa, jiwqʼesa, pututunakan suenatapas jukʼampiw jachʼat istʼasïna (Éx. 19:16-19). Ukanjja, Jehová Diosajj jupanakar akham sänwa: “Janiw munkti yaqhanakampïpjjañama” sasa. Ukatjja, ‘khitinakatejj munapkitu, mandamiento arunakajarus phoqapjjaraki ukanakarojja janipuniw jaytanukkäti’ sasaw sarakïna (Éxodo 20:1-6 liytʼañataki). Mä arunjja, ‘naya toqet saytʼasipjjäta ukhajja, nayajj jumanakampïskäwa’ sasaw Jehová Diosajj jupanakar saskäna. Jiwasatï ukanksnänjja, ¿kunjam chuymampis uka arunak katoqsnäna? Israelitanakjamarakiw katoqsnäna. Bibliajj akham siwa: “Taqe jaqenakajj mayakiw arsupjjäna: ¡Kunanaktejj Tatitojj arski ukanakjja lurapjjäwa!” sasa (Éx. 24:3). Ukampis mä qhawqha tiempotjja, Jehová Dios toqetti saytʼasipjjani janicha ukwa uñachtʼayapjjañapäna.

13. ¿Kunas israelitanakarojj Diosat jitheqtayäna?

¹³ Israelitanakajj chʼamak qenaya, lliju llijunaka, yaqha ukhamanakampi uñjapjjäna ukhajja, ajjsarayasipjjänwa. Ukatwa Moisesarojj jumaki Jehová Diosampejj parlam sasin sapjjäna (Éx. 20:18-21). Moisesasti, Sinaí Qollur mistusajj walja urunakaw ukankäna. Ukatwa israelitanakajj wasaran jan pʼeqtʼirini, jaytanukutjam amuyasipjjäna. Niyakejjay pʼeqtʼiripar wal confiyapjjchïnjja, Moisesajj jan jupanakampëjjäna ukhajj ratukiw Aaronar akham sapjjäna: ‘Mä dios lurarapipjjeta jiwasaru irpañapataki, kunapunejj Egiptota apsunkistu uka Moisesampejj pasjjchi, janipuniw kunas yatiskjjeti’ sasa (Éx. 32:1, 2).

14. 1) ¿Kunjamsa israelitanakajj jupanak pachpa engañjasipjjäna? 2) Kuntï israelitanakajj lurapkäna uk uñjasajja, ¿kunjamsa Jehová Diosajj jikjjatasïna?

¹⁴ Yaqha diosanakar adorañajj kunja jan walisa uk israelitanakajj sum yatipjjäna (Éx. 20:3-5). Ukhamäkchïnsa, ratukiw qorit lurat mä vacaqallur adorjjapjjäna. Ukham lurasajj Diosan mandamientonakap janiw istʼapkänti, uk yatipkchïnsa, Diosarus adorasipkaspa ukhamwa amuyasipjjäna. Yamas Aaronajja, Jehová Diosar jachʼañchañatak fiestawa sasaw säna. Ukampis ukham lurapjjatapatjja, Jehová Diosajj chuym wal ustʼayasïna. Moisesarojj akham sänwa: ‘Jaqenakajj jan waltʼañaruw puripjje. Jupanakasti jankʼakiw saraqtapjje nayajj sarapjjam sapksma uka thakitjja’ sasa. Jehová Diosajj walpun colerasïna, markpachar tʼunjañwa amtäna (Éx. 32:5-10).

15, 16. Moisesampi Aaronampejja, ¿kunjamsa Jehová Dios toqet saytʼasipjjatap uñachtʼayapjjäna? (Página 17 ukankir dibujo uñjjattʼäta).

¹⁵ Jehová Diosajj khuyaptʼayasirïtap laykojj janiw israelitanakar tʼunjkänti. Jupat jan jitheqtirinakarojj jupa toqet saytʼasipjjañapatakiw tiempo churäna (Éx. 32:14). Moisesajj israelitanakar qorit lurat vacaqallu nayraqatan thoqosipkiri, cantasipkiri, arnaqasipkiri uñjasajja, qorit lurat uka vacaqallurojj qʼal tʼunjäna. Ukatsti akham sänwa: “Khitinakatejj Tatitumpïpkta ukanakajja nayampi mayachasipjjam” sasa. Ukatsti “taqpach Leví sat chachan wawanakapaw Moisesampi mayachasipjjäna” (Éx. 32:17-20, 26).

¹⁶ Aarón chachas uka vacaqallu lurkchïnjja, qhepat arrepentisïnwa, mayni levitanakamp chikarakiw Jehová Dios toqet saytʼasïna. Uka chachanakajj janiw Jehová Dios toqetak saytʼasipkänti, jan ukasti Diosat jitheqtir mayni israelitanakatsa jitheqtapjjarakïnwa. Ukham lurañ amtapjjatapajj wali wakiskirïnwa, kunattejj uka urojja, waranq waranqa jaqenakaw uka kʼari diosar adorapjjatapat jiwarapjjäna. Ukampis Jupa toqet saytʼasirinakarojja, ‘bendisipjjämawa’ sasaw Jehová Diosajj säna (Éx. 32:27-29).

17. Kuntï Pablojj qorit lurat vacaqalluta siskäna ukatjja, ¿kunsa yateqsna?

¹⁷ ¿Kunsa jiwasajj ukat yateqsna? Apóstol Pablojj akham sänwa: ‘Ukanakajj jiwasan amuyasiñasatakiwa, ukhamat idolonakar jan adorañasataki, kunjamtï jupanakat yaqhepajj idolonakar adorapkäna ukhama’ sasa. Ukatsti akham sarakïnwa: “Kunanakatejj jupanakar paskäna ukanakajja, jiwasar yatichañatakïnwa, jiwasan amuyasiñasatakiw ukanakajj qellqasirakïna, khitinakatejj akapachan tukusiñapan jakasktan ukanakataki. Khititejj suma saytʼatjam amuyaschi ukajja, wal amuyaspan, ukataraki tinkuskaspa” sasa (1 Cor. 10:6, 7, 11, 12). Kunjamatï Pablojj siskänjja, Diosar adoririnakas jan walinak lurañarojj purtʼasipjjaspawa. Juch lurasajja, inas Diosampejj sumsa apasipkaspa ukham amuyasipjjchispa. Ukampis maynejj Diosan amigopäñwa munta sasin inas sischispa, jan ukajj Diosar jan jitheqtasaw sirvta sischispa, ukampis janiw ukham sasakejj Diosan amigopar tukkaspati (1 Cor. 10:1-5).

18. ¿Kunas Diosat jitheqtayistaspa, ukat kunanakarus purtʼassna?

¹⁸ Kunjamtï uñjaniwayktanjja, Moisesan Sinaí Qollut jan jankʼak kuttʼanitapatjja, israelitanakajj llakisjjapjjänwa. Ukajj jiwasanakar pasarakistaspawa. Diosan jachʼa urupasa Paraisos janis jankʼak purinkaspa ukhamwa amuyjjsna. Jan ukajja, Diosan arsutanakap phoqasiñapatakejj jaya tiempos faltaskaspa, janis cheqaw sañjamäkaspa ukhamwa amuyjjsna. Ukhamïpansti, Diosan munañap lurañat sipansa munañasakwa thaqjjsna. Tiempompejj Diosat jitheqsnawa, kuntï nayrajj jan pienskayätan ukanakwa lurjjsna.

19. ¿Kunsa janipun armañasäki, ukat kunatsa?

¹⁹ Janipuniw ak armañasäkiti: Jehová Diosajj jupar taqe chuyma istʼañasa, Jupa saparuki serviñaswa muni (Éx. 20:5). Diosan munañap jan lurasajja, Supayan munañapwa lurasksna, ukajj jan waliruw purtʼayistaspa. Ukatwa Pablojj akham sistu: “Janiw jumanakajj Jehová Diosan copapampita demonionakan copapampit umapkasmati, janirakiw ‘Jehová Diosan mesapampita’ demonionakan mesapampit manqʼapkasmati” sasa (1 Cor. 10:21).

JEHOVÁ DIOSAT JANIPUN JITHEQTAÑÄNITI

20. Pantjasktan ukhasa, ¿kunjamsa Jehová Diosajj yanaptʼistaspa?

²⁰ Caín chachasa, Salomonasa, israelitanakasa, arrepentisipjjaspänwa jan wali sarnaqäwipsa jaytapjjaspänwa, ukampis janiw ukham lurapkänti (Hech. 3:19). Cheqas jan walinak lurtan ukhajja, Jehová Diosajj janiw jankʼak jaytanukkistuti, yanaptʼañ munaskakistuwa. Amtañäni, Aarón chacharojj pantjasitapat perdonänwa. Jichhürunakanjja, Diosajj Biblian qellqatäki uka sarnaqäwinak toqe, Bibliat apstʼat qellqatanak toqe, jan ukajj jilat kullakanak toqew ewjjtʼistaspa. Uka ewjjtʼanakar istʼañäni ukhajja, Jehová Diosajj jiwasat khuyaptʼayasistaniwa.

21. Jehová Diosat jitheqtañatak yantʼat uñjasiñäni ukhajja, ¿kunsa lurañasa?

²¹ Jehová Diosajj mä amtampiw khuyapayasiñap uñachtʼayistu (2 Cor. 6:1). Jupajja, ‘jan wali sarnaqañanak apanukuñasataki, akapachan utjki uka jan wali munañanak apanukuñasatakiw’ khuyaptʼayistu (Tito 2:11-14 liytʼañataki). “Akapachankir jaqenak taypin” jakkasajja, qhawqsa Diosar munastan ukajj yantʼat uñjasikipuniniwa. Ukhamasti, Jehová Dios toqet taqe chuyma saytʼasiñatakejj listokïñasawa, janipuniw jupat jitheqtañasäkiti, Jupa saparukiw serviñasa (Deut. 10:20).