Amparamp qellqat mä rollow jikjjatasi

KHÄ 1970 maranjja, arqueología toqet yatjjatatanakajj Ein Gedi (Israel) cheqan phichantat mä rollwa jikjjatapjjäna, mar Muerto sat qotat inti jalanta toqena. Uka rolljja, phichantat mä sinagogan oraq allisipkäna ukhaw jikjjatapjjäna. Uka sinagogajj Ein Gedi markajj 500 marat 550 (después de Cristo [d.C.]) maranakan tʼunjaskäna ukhaw phichantasirakpachäna. Uka nakhantat rollojj janiw liytʼañjamäkänti, cheqaptayañ munasas pʼakinoqañjamänwa. Ukhamajj ¿kunsa liytʼañatak lurasïna? Yatjjatatanakajja, jichhak mistur maquinanakamp mä foto apsusina (escaneo tridimensional), ukhamarak computadorampi yanaptʼayasisaw uka rollo liytʼapjjäna.

¿Kunas ukan jikjjatasïna? Amparamp qellqat nayra rollönwa. Ukanjja, Levítico libron mä qhawqha nayrïr versiculonakapaw uñsti. Diosan sutipajj hebreo arun qellqaski uka pusi letranakas (Tetragrámaton) uñstarakiwa. Uka rollojj 50 d.C - 400 d.C maranakanwa qellqaspachäna. Ukhamajj uka rollojja, hebreo arut nayra qellqatanakajj jichhakam jikjjatasiwayki uka qellqatanakat nayrïrispawa. Mar Muerto cheqan (Qumrán) jikjjataskäna uka rollonakat(Rollos del mar Muerto) sipansa, jukʼamp nayraw qellqaspachäna. Gil Zohar chachajj akham sasaw The Jerusalem Post sat periodicon qellqäna: “Ein Gedi cheqan jikjjatat rollojj (fragmento de Levítico de Ein Gedi) computadoramp liytʼasjjäna ukapachkamajja, mar Muerto cheqan jikjjataskäna uka rollompi (uka rollojj 2.000 maranak nayraw qellqaspachäna, payïr templojj utjkäna ukhaw qellqaspachäna) Códice de Alepo (uka qellqatajj 930 maranwa qellqaspachäna) sasin uñtʼatäki uka nayra qellqatampejj 1.000 maranakaw jaljasïna. Yatjjatatanakajj akham sapjjewa: ‘Fragmento de Ein Gedi uka rollorjamajja, Torá sat qellqatajj walja maranak pasatatsa janiw mayjtʼayatäkiti, janirakiw Biblia copiaqerinakan (copistas) pantjasitanakapas mayjtʼaykataynati’ sasa.