Taman Librot Yatiqañatak sat tantachäwin askinakapa
1. Sapa semanax phisqa tantachäwinakaw utji, ¿ukan kuna askinaks apstanxa?
1 Sapa semanan phisqa tantachäwi utjki ukaxa kuna amtampisa ukat kunjam wakichatasa ukaxa mayj mayj wakichtʼatawa. Ukampisa, taqpachaw askixa, uka tantachäwinakaw ‘maynit maynikama yanaptʼasiñasatakisa munasiñasatakisa, ukhamarak suma luräwinak uñachtʼayañatakisa’ yanaptʼistu (Heb. 10:24, 25). ¿Kuna askinakasa Librot Yatiqañataki sat tantachäwinx utji?
2. ¿Kuna askinakas utji ukham jiskʼa tantachäwinakanxa?
2 Diosar jukʼamp sum yupaychañatakiw yanaptʼistu. Yaqha tantachäwinakat sipanxa, librot yatiqañatak tantachäwinxa jukʼanikïpxiwa, ukaw yaqhanakampi sum uñtʼasiñatak yanaptʼistu ukhamata Diosaru jukʼamp suma yupaychañataki (Pro. 18:4). ¿Ukankirinakarux taqpachaniruti uñtʼtanxa, jupanakamp yatiyir sartanti? Librot yatiqañataki tantachäwin sarayir irpir chuyman jilatarusa aka tantachäwix yanaptʼarakiwa sum uñtʼañataki sapa mayni jilat kullakanakaru ukhamata chuymachtʼañataki sapa mayniru (Pro. 27:23).
3. ¿Kunatsa aka tantachäwix arsuñatakisa Bibliat yatiqasipki ukanakatakisa wali askixa?
3 ¿Librot yatiqañataki tantachäwir jutapxañapataki Bibliat yatichasipktan ukanakar jawstanti? Khitinakatï tantachäwinakar sarañ axsarayasipki ukanakaruxa Bibliat yatiqañataki aka jiskʼa tantachäwixa jan axsarañwa yanaptʼani, yamas mä jilat kullakan utapankchi ukaxa. Mä familjam aka jiskʼa tantachäwixa machaqanakaru ukat waynitunakar jukʼamp arstʼapxañapatakiw yanaptʼani. Niyakixay jukʼanik tantachasipxchixa, jukʼampiw Jehová Diosar arstʼatanakasampi jachʼañchsnaxa (Sal. 111:1).
4. ¿Kuna askinakampis librot yatiqañataki sat tantachäwinx utji?
4 Librot yatiqañataki tantachäwixa kawkjanakantï wakiski ukawjanakan uttʼayatawa. Uka jiskʼa tantachäwixa janiw uta jakʼasankkapunispati, ukampisa Tantachasiñ Utat sipansa jakʼankaspawa. Uka jiskʼa tantachasïwi utatxa yatiyir sarañatakix tantachasiraksnawa.
5. ¿Kunjamsa librot yatiqañataki sat tantachäwi sarayir irpir chuyman jilatax jaqinakar sum yatiyañx yanaptʼistaspa?
5 Yatiyañatakiw yanaptʼistu. Librot yatiqañatak tantachäwi sarayir irpir chuymanixa uka jiskʼa tantachasïwinkirinakan sum yatiyapxaspa ukat kusisita sapa semana yatiyir sarapxaspa ukwa uñjañapa. Ukatwa, taqinimpi yatiyir mistsuñataki chʼamachasi ukat sum yatiyapxañapatakiw kunaymani tuqit yatiyirinakar yanaptʼaraki. Sañäni, inas yatiqañ munirinakar wasitampi kuttʼañax jiwasatakix chʼamächi, ukhamächi ukaxa jupampiw parltʼañasa. Jupanakax yatiyañatak jukʼamp yatxatat ukankir mä jilat kullakampiw irnaqayistaspa. Ukatxa, librot yatiqañatak sarayir irpir chuyman jilatax kunjamsa yatichi ukxa sumwa istʼañasa ukat yatiqasiñasarakiwa, ukhamatwa yaqhanakar Bibliat yatichañatakix suma yatxatatäñäni (1 Cor. 4:17).
6. ¿Kunatsa librot yatiqañataki tantachäwit askinak apsuñatakix chʼamachasiñasa?
6 Chiqanxa, Librot Yatiqañataki tantachäwixa mä suma bendicionawa. Munasiri Jehová Diosan aka churäwipaxa aka jan waltʼäwi urunakanxa Jupar jukʼampi yupaychaskakiñasatakiw chʼamañchistu (Sal. 26:12).