Pisinkirinakataki suytʼäwi
1 Jesucristox aka Uraqinkkän ukhaxa, pisinkirinakarux wal khuyaptʼayirïna. Chiqasa kunatï munaski ukanakampis jaqinakar yanaptʼkchïnxa, usutanaksa qullkchïnxa, ukampis ‘qhispiyasiñ utjatapatwa pobrenakarux yatiyäna’ (Mat. 11:5). Jichhürunakanxa, ukhamarakiw Diosat yatiyir sarktan ukax taqiniru pisinkirinakarus yanaptʼi (Mat. 24:14; 28:19, 20).
2 Chiqpach suytʼäwi. Iglesian pʼiqinchirinakaxa, ofrendanakwa churañama ukhamatwa suma jakasïta sapxiwa, ukatwa ofrendanakxa wal churapxi. Ukampis Diosan Apnaqäwipakiwa pisin jakasiñsa ukhamarak yaqha jan waltʼäwinaksa askichaspaxa. Ukham siw Bibliaxa (Sal. 9:18; 145:16; Isa. 65:21-23). Ukhamaxa, kunapachatï jaqinakaru Bibliax kunsa chiqpachapuni yatichi uk yatiyktan ukhaxa, mä suytʼäwi churtanxa ukhamaraki Dios tuqit jan aynachtʼatäpxañapatakisa yanaptʼaraktanwa (Mat. 5:3).
3 Jesús tiempon jakir fariseonakaxa pisinkiri jaqinakaruxa ‛am ha·ʼá·rets (“akapach jaqinaka”) sasawa jiskʼachapxirïna. Ukampis Jesusax pobrenakan jakäwinakapax wali jila alanïkaspas ukhamwa uñjirïna (Sal. 72:13, 14). Jiwasax Jesusjamarakiwa pisin utjasirinakarux khuyaptʼayaraksna munasiñampi uñjasa (Pro. 14:31). Janipuniw pisin jakasir jaqinakarux jiskʼachañasäkiti jan ukasti taqiniruw yatiyiri sarasax parlañasa. Chiqasa, Diosan Apnaqäwipata yatiyir sarktan ukhaxa, pisinkirinakaw jila partix jaysapxi.
4 Jichhataki yanaptʼa. Kunapachatï maynix Biblian yatichäwiparjam sarnaqxi ukhaxa, kunjamsa pisin jakasiñatxa nayrar mistsuspa uk yatiqi. Sañäni, machjasiñatsa, qullqit anatañatsa, jayrasiñatsa, jan wali qullanakampi qulljasiñatsa ukat kunanakatï jukʼampi pobreptaykistaspa ukanakatsa Bibliax jarkʼaqasipxam sistuwa (Pro. 6:10, 11; 23:21; 2 Cor. 7:1; Efe. 5:5). Ukhamaraki, Biblian yatichäwipax taqi kunansa jan lunthatasisa “taqi chuyma” irnaqañ yatichistu, ukham irnaqtʼirixa taqi irnaqäwinsa wali munatawa (Col. 3:22, 23; Heb. 13:18). Ukat khitinakarusa irnaqiritakix ajllipxi ukanak yatxatasaxa, akhamwa sapxi, “jan lunthatasiri ukat phuqir” jaqinakaw patronanakan wali munataxa sasa.
5 Jehová Diosax tʼaqhisirinak uñjasax walwa chuym ustʼayasi. Ukatwa, khitinakatix ‘yanapa mayisisa artʼasipki ukanakaruxa’, niyaw Jesucristo Yuqapaxa qhispiyxani (Sal. 72:12). Ukatwa wali aski luräwinïtanxa, kunattix Biblian jutïritak siski uka arunakampiw taqiniru ukhamarak pisinkirinakarusa chuymachtanxa.