Bibliat yatiqirinïñataki amtapxañäni
1 “Uñtapxam, yapunakax niyaw puquratäxi” sasaw Jesusax arkirinakapar säna (Juan 4:35). Uka arunakaxa jichha tiemp jakir cristianonakatakix wali askipuniwa.
2 Walja jaqinakawa Criston machaq arkirinakapäpxañapatakix sapa mara bautisatäsipki, ukhamasti Jehová Diosan munañapat yatxatañ munir suma chuyman jaqinakax utjaskakiwa. Jumax Bibliat mä jaqir chiqpachapuni yatichañ munsta ukaxa, ¿kamachasmasa?
3 Amtañamawa. Bibliat yatiqir jikxatasaxa jan jaytasa Bibliat yatichañatakiw amtañama. Ukat kunapachatï yatiyir sarkäta ukhaxa uka amtampiw yatiyañama. Chiqpachansa, taqiniw cristianonakjamax jukʼampi irnaqañataki ukat Bibliat yatichañataki chʼamachasiñasaxa, kunattix janiw yatiyir sarañakïkiti jan ukasti yatichañasarakiwa (Mat. 24:14; 28:19, 20).
4 Yaqha yanaptʼanaka. Diosat taqi chuyma maytʼasiñax wali wakisiripuniwa. Awisax yaqhip jaqinakax Bibliat yatxañatakiw Diosat mayisisipki. Jehová Diosat yanaptʼa mayisiñäni ukhaxa, ukham mayisiskir jaqinakaruw jikxatañäni, ukat Bibliatwa yaticharakiñäni, ukax wali askipunïniwa (Hech. 10:1, 2).
5 Bibliat yatiqirinïñatakiwa mä kullakax Diosat yanap maytʼasïna. Ukat ¿Bibliat jukʼampi yatiqañ munasmati? sat tradonakwa irnaqäwipanxa qhanar ucharakïna. Ukatxa, mä warmiw mä tratado aptasax liytʼäna, ukat uka tratadoruw sutipa direccionapa qillqxataskäna, ukhamatwa kullakax jupampi jikistʼäna, ukat Bibliat yatichañ qalltäna.
6 Kawkïr yatiyirinakatix Bibliat sum yatichtʼañ yatipki uka jilat kullakanakaw Bibliat yatiqir jikxatañsa, yatichañsa yanaptʼiristamxa. Bibliat yatxatañ munir jaqinakar thaqhäta ukhaxa, Diosat maytʼasipunïtawa, ukat taqi yanaptʼanakatsa askinakxa apsuñamarakiwa. Inas Bibliat mä yatiqiri jikxatasin jumax wal kusisirakchïta.